Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde ic segghe + alsoo langhen tijt als die erfghenaem een cleyn kint is, soo en isser gheen ondersceyt tusschen hem ende eenen knecht, hoe wel hy een Heere is van allen,

+ A

2

maer hy is onder momboirs ende voechden tot den ghestelden tijt vanden vader,

3

Alsoo wij oock, doen wij cleyn kinderen waren, soo waren wij onder die elementen der werelt dienende.

4

Maer doen ghecomen is die volheyt des tijts, so heeft Godt sijnen sone ghesonden, gheboren wt een vrouwe, gheworden onder die wet,

5

op dat hy, die ghene die onder die wet waren, soude verlossen, op dat wi die verkiesinghe souden ontfanghen,

6

Maer want ghy kinderen sijt, soo heeft Godt sijns soons gheest ghesonden in v herten roepende Abba vader,

7

Daerom en is hy nv gheen knecht maer een sone, Ende eest dat ghi een sone sijt, soo sijdi oock erfghenaem door Godt.

* 8

Maer ghilieden, doen voorwaer God niet kennende, diende den ghenen die van natueren gheen goden en waren,

9

⁺Maer nv als ghy Godt ghekent hebt, iae seluer ghekent sijt van Gode, hoe wordi wederom ghekeert tot die crancke ende arme elementen, den welcken ghy wederom wilt dienen?

+ B

10

Ghy onderhoudt daghen ende maenden, ende tijden ende iaren.

11

Ick vreese voor v dat ick by auontueren te vergheefs sal in v ghearbeyt hebben,

12

Weest ghelijc ick, want ick ben ooc ghelijck ghy. + Broeders ick bidde v hertelijck, Ghy en hebt my gheen leet ghedaen,

13

Ende ghy weet wel dat ic door die crancheyt des vleeschs v Deuangelie ghepreect hebbe nv corts gheleden, ende v proeuinghe in mijn vleesch

14

en hebdi niet versmaet, noch verworpen maer ghelijck eenen Enghel Gods hebdi my ontfanghen ghelijc Christum Iesum,

15

waer is dan v salicheyt? Want ick gheue v ghetuyghenisse dat ghi (waert dat moghelijc gheweest ware) v ooghen soudt wtghetrocken hebben ende my ghegheuen.

16

⁺Ben ick dan v lieder viant gheworden v die waerheyt segghende?

+ C

17

Sij sijn ialours van v lieden niet int goede, maer sij willen v wt sluyten dat ghy hen soudt naeuolghen,

18

Maer volcht het goet altijt int goede, ende niet alleene als ick teghenwoordich ben by v lieden,

19

Mijn kinderkens die welcke ic wederom met arbeyt bare tot dat Christus in v lieden volmaect worde.

20

Ic wilde nv wel bi v lieden sijn, ende mijn stemme veranderen, want ick worde bescaemt in v lieden.

21

Segt mi ghi die onder die wet wilt sijn, en hebdi die wet niet ghelesen?

22

Want daer is ghescreuen. Dat Abraham twee sonen heeft ghehadt den eenen van die dienstvrouwe, den anderen van die vrije huysvrouwe,

23

Maer die vander dienstvrouwen, die is naeden vleesch gheboren, maer die vanden vrijer huysvrouwen was, door die belofte,

24

die welcke woorden sijn door een ghelyckenisse ghesproken, want dit sijn die twee testamenten, Het eene vanden berch Sina ter slauernien barende, ⁺welck is Agar

+ D

25

(want Sina is eenen berch in Arabien die gheuoecht is met dien die nv is Ierusalem) ende sij is een slaue met haren sone,

26

maer Ierusalem die bouen is die is vrij, die welcke is onse moeder,

27

Want daer is ghescreuen. Verblijt v ghy onvruchtbaer vrouwe die niet en baert, berst wt, ende roept, die niet bevrucht en sijt, want daer sijn veel kinderen vander verlatender vrouwen, meer dan van dier die eenen man heeft,

28

Maer wij broeders sijn nae Isaacs kinderen der beloften,

29

maer ghelijck doen die ghene die nae den vleesch gheboren was, hem veruolchde die nae den gheest was, alsoo eest nv oock,

30

Maer wat seydt die scriftuere? Worpt wt die dienstvrouwe ende haren sone, want die sone der dienstvrouwen en sal gheen erfghenaem wesen metten sone der vrijer vrouwen.

31

Aldus broeders en sijn wij gheen kinderen der dienstvrouwen, maer der vrijer vrouwen, door welcke vrijcheyt Christus ons vrij ghemaect heeft.