Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺O Ghy onuerstandighe Galaten, wie heeft v lieden betoouert om der waerheyt niet onderdanich te sijne, voor der welcker ooghen Iesus Christus bethoont is gheweest in v lieden ghecruyst?

+ A

2

Dit wil ick alleen van v lieden weten. Hebdy wt die wercken der wet den gheest ontfanghen, oft wt dat ghehoor des gheloofs?

3

Sijdi soo onuerstandich, dat ghy nv voleynden wilt nae den vleesche als ghy nae den gheest begonst hebt?

4

Hebdi soo vele gheleden te vergheefs? ist anders te vergheefs,

5

Die dan v gheeft den gheest, ende werct die wercken in v lieden, doet hy dat wt die wercken der wet, oft wt dat ghehoor des gheloofs.

6

+ Ghelijc Abraham Gode ghelooft heeft, ende het is hem gherekent ter rechtuerdicheyt,

7

Daerom bekent dat die ghene die wten ghelooue sijn, Abrahams kinderen sijn,

8

Ende die scriftuere te voren siende dat Godt die Heydenen wten ghelooue rechtuerdich maket, heeft te voren Abraham vercondicht. In v sullen ghebenedijt worden alle die Heydenen

9

⁺Daerom die wten ghelooue sijn, sullen gebenedijt worden metten gheloouighen Abraham,

+ B

10

want alle die wt die wercken der wet sijn, die sijn onder die maledictie, want daer is ghescreuen. Vermalendijt is hy alle die niet en blijft in alle die dinghen die ghescreuen sijn inden boec der wet, dat hy die doe,

11

Ende want in die wet niemant gherechtuerdicht en wort bi Gode, soo eest openbaer dat die rechtuerdighe wt dat ghelooue leeft.

* 12

Maer die wet en is wten ghelooue niet, maer diese doet, die sal daer in leuen,

13

Christus heeft ons verlost van die maledictie der wet, voor ons gheworden sijnde een vermalendidinghe (want daer is ghescreuen. Vermalendijt is hy soe wie aent hout hanghet)

14

op dat in die Heydenen die benedijdinghe van Abraham gheschieden soude in Christo Iesu, op dat wij die belofte des gheests ontfanghen souden doort ghelooue.

15

Broeders (ic spreeck nae den mensch) nochtans eens menschens vast gemaect testament en versmaet niemant, oft niemant en ordineert daer iet meer toe.

+ 16

⁺Abrahe sijn beloften toe gheseyt, ende sijnen sade, hy en seyt niet in die saden, als in vele, maer als in eenen, Ende uwen sade dwelck is Christus,

+ C

17

Maer ick seg dit. Het testament vast ghemaect van God en maect die wet niet van onweerden die nae vier hondert ende dertich iaren ghemaect is om te niet te doen die belofte,

18

Want is die erffelijcheyt wt die wet, soo en is sij nv wt die belofte niet, maer Abrahe heeft god die ghegheuen door die belofte,

19

Wat is dan die wet? Sij is ghestelt om die ouertredinghen tot dat comen soude tsaet den welcken hy dat beloeft hadde, gheordineert door die Enghelen in die hant des middelaers

20

Een middelaer en is niet van eenen alleen, Maer God is een,

21

Is dan die wet teghen Gods beloften? Dat sij verre. Want waer daer een wet ghegheuen die soude moghen leuende maken, soo waer warachtelijck die rechtuerdicheyt wter wet,

22

⁺Maer die scriftuere heuet al besloten onder die sonde, op dat die belofte wt dat ghelooue Iesu Christi ghegheuen soude worden den gheloouighen.

+ D

[p. *879]

* 23

Maer te voren eer tghelooue quam, soo worden wij onder die wet bewaert, ghesloten totten ghelooue dwelck gheopenbaert worden soude,

24

Aldus heeft die wet ons scoolmeester gheweest tot Christum, op dat wij wt den ghelooue souden gherechtuerdicht worden

25

Maer nae dat tghelooue ghecomen is, soo en sijn wij nv voorts niet meer onder den scoelmeester,

26

want ghy sijt alle Gods kinderen doort ghelooue in Christo Iesu,

27

Want alle ghy die in Christo Iesu ghedoopt sijt, die hebt Christum aenghedaen,

28

Daer en is gheen Iode, noch griec, daer en is gheen knecht, oft vrij mensch daer en is gheen man oft vrouwe, want ghy alle sijt een in Christo Iesu,

29

Ende eest dat ghy Christo toebehoort, soo sijdi dan Abrahams saet, nae die belofte erfghenamen.