Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺DAer nae ouer veerthien iaren ben ick wederom op ghegaen nae Ierusalem met Barnaba oock mede ghenomen hebbende Titum,

+ A

2

Maer ick ben opwaerts ghereyst nae die openbaringhe, ende ick heb met hen ouerleydt het Euangelie dat ick preke onder die Heydenen, ende besonder metten ghenen die scenen wat te sijne, dat ick by auontueren niet ydelijck en soude loopen, oft gheloopen hebben,

3

Maer Titus die met my was, al was hy een Heyden, en is oock niet ghedwonghen gheweest besneden te worden,

4

maer om die ingheleyde valsche broeders die heymelijck inghecomen waren om te ondersoecken onse vrijcheyt, die wij hebben in Christo Iesu, om dat sij ons in slauernie brenghen souden,

5

Den welcken wij niet een vre lanc en hebben gheweken ter onderdanicheyt, ⁺op dat die waerheyt der Euangelien by v soude moghen blijuen,

+ B

6

maer van die ghene die scenen wat te sijne (hoedanich sij voortijts geweest sijn daer en legt mi niet aen, God en verkiest den persoon vanden mensch niet, want die ghene die scenen wat te sijne en hebben my niet ghegheuen,

7

Maer ter contrarien doen sij ghesien hadden dat mi betrout was het Euangelie der onbesnedenheyt, ghelijck Petro der besnedenheyt

8

(want die met Petro ghewracht heeft tot het apostelscap der besnijdenissen, die heeft met my oock ghewracht onder die Heydenen)

9

ende doen sij verstaen hadden die gratie die my ghegheuen is, Iacobus ende Cephas ende Iohannes die scenen columnen te sijn, soo hebben sij my ende Barnabe ghegheuen die rechte handen der verselscappinghen, dat wi onder die Heydenen ende sij onder die besnijdenisse preken souden,

10

alleenlijc dat wij der armen souden ghedachtich wesen, int welcke ick ooc sorchuuldich heb gheweest om dat selue te doen,

11

Maer doen Cephas ghecomen was in Antiochien, ⁺soo heb ick hem int aensicht weder staen, want hy was berispelijc,

+ C

12

Want te voren eer die sommighe van Iacobo comen waren, soo adt hi metten heydenen, maer doen die ghecomen waren soo ontrack hy ende sceyde sij seluen af, vreesende die ghene die wter besnijdenisse waren,

13

Ende sijnder gheueynstheyt consenteerden die ander Ioden, alsoo dat Barnabas ooc van hen ghebracht worde in die gheueynstheyt,

14

Maer doen ic hadde ghesien dat sij niet te recht en wandelden nae die waerheyt der Euangelien, soo heb ick Cephe gheseyt voor hen allen. Eest sake dat ghy, daer ghy een Iode sijt, nae die Heydensche manier leuet ende niet na Ioetsche manier, Hoe dwingde ghy die Heydenen op die Ioetsche manier te leuen

15

Wij sijn van natuere Ioden, ende niet wten Heydenen sondaers,

16

Maer wetende dat gheen mensch gherechtuerdicht en wort wt die wercken der wet, ⁺dan doort ghelooue Iesu Christi, ende wij gheloouen in Iesu Christo, op dat wij gherechtuerdicht souden worden wt Christus ghelooue, ende niet wt die wercken der wet, waerom dat wt die wercken der wet gheen vleesch en sal gherechtuerdicht worden,

+ D

17

Ende eest dat wij begheerende gherechtuerdicht te worden in Christo, selue oock gheuonden sijn sondaers, is dan Christus een dienaer der sonden? Dat si verre,

18

Want eest dat ick tghene dat ick omgheworpen hebbe, wederom optimmere, soo make ick my seluen een ouertreder,

19

Want ick ben door die wet, der wet ghestoruen, op dat ick Gode leuen soude, Met Christo ben ick ghecruyst,

20

Ende ick leue, nv voorts niet ick, maer in my leeft Christus, Maer dat ick nv leue int vleesch, dat leue ick int ghelooue des soons Godts, die my lief ghehadt heeft, ende heeft sij seluen ghegheuen voor my.

21

Ick en verworpe die gratie Gods niet, want eest dat door die wet die rechtuerdicheyt is, soo is Christus dan te vergheefs ghestoruen.