Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xij. Capittel.

+ 1

⁺EEst dat ick moet glorieren (ten is voorwaer niet orberlijck) soo sal ick comen tot die visioenen ende openbaringhen des Heeren,

+ A

2

Ick weet eenen mensch in Christo ouer veerthien iaren, (Ick en weet niet oft int lichaem, oft wten lichaem en weet ick niet, Godt weet) dat sulcke opghenomen was totten derden hemel.

3

Ende ick weet dat alsulck mensch (tsij int dlichaem oft wten lichaem ic en weets niet, Godt weet)

4

dat hy opghenomen is gheweest int Paradijs, ende heeft ghehoort verborghen woorden, die gheen mensch ghespreken en can,

5

⁺Voor alsulcke sal ick glorieren, maer voor my en sal ick niet glorieren dan in mijn crancheden,

+ B

6

want eest sake dat ick oock wil glorieren, soo en sal ick niet onwijs wesen, want ick sal die waerheyt segghen, maer ick, wacht my dies op dat my niemant en achte bouen tghene dat hy siet in my, oft iet dat hy hoort van my,

7

Ende om dat die grootheyt der openbaringhen my niet verheffen en soude, soo is mi ghegheuen het steecsel mijns vleeschs Satanas enghel, dat hy my soude aen mijn wanghen slaen,

8

⁺Waerom ick den Heere drijmael ghebeden hebbe, dat die van my gaen soude,

+ C

9

ende hy heeft my gheseydt. Mijn gratie is v ghenoech, want die cracht wort in die crancheyt volmaect, Hierom sal ic gheerne in mijn crancheden glorieren, op dat in my mach woonen die cracht Christi.

* 10

Daerom heb ick mijn behaghen in crancheden in versmaetheden, in nooden, in veruolghinghen, in benautheden om Christo, want als ic cranc ben, dan ben ick machtich.

11

⁺Ick ben onwijs gheworden, ghilieden hebter my toe ghedwonghen, want ic behoorde van v ghepresen te worden, want ick en heb niet min gheweest dan die ghene die douerste Apostelen sijn, Hoe wel ick niet en ben,

+ D

12

Nochtans sijn die teekenen mijns Apostelscaps gheschiet ouer v lieden in alle verduldicheyt, in teekenen, ende wonder wercken ende myrakelen,

13

want wat eest dat ghy min ghehadt hebt dan die ander kercken, dan dat ick selue v niet verlast en hebbe? Vergheeft my dit onrecht.

14

⁺Siet ick ben nv tot dese derder reysen bereydt tot v lieden te comen, ende ic en sal v niet swaer wesen, want ic en soec niet dat uwe is, maer v lieden, want die kinderen en behooren niet te vergaderen, voor die ouders, maer die ouders voor die kinderen,

+ E

15

Maer ick sal seer gheerne gheuen ende selue oock daer bouen ghegheuen worden voor uwe zielen, hoe wel dat ick v meer beminnende, min bemint worde,

16

maer laetet alsoo sijn, ick en heb v niet lastich gheweest, maer want ick listich was, soo heb ick v met bedroch gheuanghen,

17

⁺Heb ick v veronghelijct door iemanden vanden ghenen die ick tot v ghesonden hebbe?

+ F

18

Ick heb Titum ghebeden, ende ick heb met hem eenen broeder ghesonden, Heeft v Titus veronghelijct? en hebben wij niet in eenen gheest ghewandelt, ende met eenderley voetstappen?

19

Ghy laet v duncken van ouerlanck dat wij ons ontschuldighen voor v lieden, Wij spreken voor Gode in Christo, ende alle dinghen mijn alderliefste om uwe gestichticheyt,

20

want ic sorghe dat ick by auontueren (als ic comen sal) v lieden niet vinden en sal sulc als ic wille, ⁺ende dat ic van v sal geuonden worden sulc als ghi niet en wilt, wantter by auontueren kijuagien, nijdicheden, moedicheden, tweedrachtic-

+ G

[p. *877]

heden, achterclappinghen, oorblasinghen, opgheblasentheden, ende oploopen onder v lieden mochten sijn

21

dat my Godt wederom niet en verootmoedighe by v lieden als ick sal comen sijn, ende dat icker soude moeten beweenen vele vanden ghenen die te voren ghesondicht hadden, ende gheen penitencie ghedaen en hebben van die onsuyuerheyt ende hoereringhe ende oneerbaerheyt die sij bedreuen hebben.