Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺OCh oft ghy verdroecht een weynich van mijnder onwijsheyt, maer verdraecht my wat,

+ A

2

want ick ben ialours op v lieden met een Goddelijcke ialoursheyt, want ick hebbe v toebeloeft eenen man om Christo een reyne maecht te leueren,

3

Maer ick vreese, dat ghelijck het serpent Heuam verleyt heeft door sijn listicheyt dat alsoo v sinnen ooc souden verargert worden, ende vallen van die simpelheyt die in Christo is,

4

want eest sake dat die ghene die daer coemt, eenen anderen Christum preect den welcken wij niet ghepreect en hebben, oft dat ghy eenen anderen gheest ontfanct den welcken ghy niet ontfanghen en hebt, oft een ander euangelie, ⁺dat ghy niet ontfanghen en hebt, soo soude ghilieden die dinghen te rechte verdraghen,

+ B

5

want ick meyne dat ick niet min ghedaen en hebbe dan die groote apostelen,

6

Want al ben ic slecht van

[p. *876]

woerden, maer niet nochtans in wetenheyt, ende in alle dinghen sijn wij v lieden openbaer gheworden,

7

Oft heb ick sonde ghedaen my seluen verootmoedighende, om dat ghy soudt verhauen worden? om dat ick sonder loon het Euangelie Godts v lieden ghepreect hebbe?

8

Andere kercken heb ic ghebloot, nemende loon tot uwen dienst.

9

Ende doen ick by v lieden was, ⁺ende ghebreck hadde, soo en heb ick niemanden lastich gheweest, want tghene dat my ghebrack, dat hebben veruult die broeders die ghecomen sijn van Macedonien, ende in alles heb ick my tot v lieden sonder last ghehouden, ende houden sal.

+ C

10

Die waerheyt Christi is in my, want dese gloriatie en sal in my niet ghebroken worden in die lantscappen van Achaien,

11

waerom? om dat ick v lieden niet lief en hebbe? Dat weet Godt,

12

Maer dat ick doe, dat sal ick noch doen, op dat ick soude beletten die oorsaken der gheender die oorsake soecken, op dat sij (int ghene daer si in glorieren) moghen gheuonden worden, ghelijc wij,

13

want alsulcke valsche apostelen sijn heymelijcke bedrieghende wercluyden, ⁺hen seluen in ghedaente veranderende in Christus Apostelen,

+ D

14

Ende ten is gheen wonder, want Satanas selue verandert sijn ghedaente in eenen Enghel des lichts,

15

daerom ten is niet groots, eest dat sijn dienaers hen ghedaente veranderen als die dienaers der rechtuerdicheyt, der welcker eynde sal wesen nae hen wercken,

16

Ick segt wederom (op dat niemant en meyne dat ick onwijs ben, maer anders soo ontfanckt my als eenen onwijsen op dat ick oock een weynich mach glorieren)

17

dat ick spreke, en spreec ick niet nae Godt, maer als in onwijsheyt, ter saken van deser glorien,

18

Aenghesien datter veel glorieren nae den vleesche, soo sal ick oock glorieren.

19

+ ⁺Want ghy verdraecht gheerne die onwijse al sij di selue wijs,

+ E

20

Want ghy verdraghet eest dat iemant v in slauernie brenget, eest dat v iemant verslint, eest dat iemant neemt, eest dat hem iemant verheft, eest dat iemant v int aensicht slaet.

21

Ick spreke nae die onedelheyt, recht oft wij cranck gheweest hadden in dit deel Waer in dat iemant stout is (ic segt in onwijsheyt) daer ben ick oock stout in,

22

Sijn sij Hebreen, ick bent ook, Sijn si Israeliten, ick ooc, Sijn si Abrahams saet, ick oock,

23

Sijn sij Christus dienaers, ick oock (iae ick segt als onwijs) ic bent noch meer, in veel arbeyden, in veel meer gheuanghenissen, in slaghen bouen maten, in doots nooden dickmael,

24

Vanden Ioden heb ick vijfmael veertich slaghen een min ontfanghen,

25

⁺Drijmael heb ick met roeden ghegheesselt gheweest, eens heb ick ghesteent gheweest, drijmael heb ick scipbrekinge gheleden, nacht ende dach heb ick in die diepte der zee gheweest,

+ F

26

int reysen dicmael, in perikelen der wateren, perikelen der moordenaren, perikelen wt die Ioden, perikelen wt die Heydenen, perikelen in die stadt, perikelen in woestijnen, perikelen in die zee, perikelen in valsche broeders,

27

in arbeyt, ende allendicheyt, in veel wakens, in hongher, ende dorst, in veel vastens, in coude ende naectheyt,

28

sonder die dinghen die van buyten sijn, mijn daghelijcsche neersticheyt, die sorchuuldicheyt voor alle die kercken,

29

⁺Wie wort daer cranck, ick en worde oock cranck? Wie wort daer verarghert ende ick en berne niet?

+ G

30

Eest datmen moet glorieren, soo sal ick glorieren van tghene dat mijnder crancheyt aen gaet,

31

Godt ende die vader ons Heeren Iesu Christi die ghebenedijt is inder eewicheyt, die weet dat ick niet en lieghe,

32

Die prouoost van Damascus van des conincs Arethe volck bewaerde die stadt van Damaseenen, om dat hy my vanghen soude,

33

ende door een vinster in een mande worde ick neder ghelaten ouer den muer, ende alsoo ben ick sijnen handen ontvloden.