Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde ick selue Paulus bidde v hertelijck doer die saechtmoedicheyt ende goedertierenheyt Christi, die int aenschijn voerwaer cleyn ben onder v lieden, maer niet teghenwoerdich wesende ben ick stout op v,

+ A

2

ende ick bidde dat ick teghenwoerdich niet en moet stout sijn doer dat betrouwen, waer mede ic gheacht worde stout te wesen teghen die sommighe, die ons achten als oft wij nae den vlesche wandelden.

3

Want wi int vleesch wandelende niet en strijden nae den vleesche,

4

want die wapenen van onser ridderschap en sijn niet vleeschelijck, maer machtich voor Godt tot verderuinghe der stercten, vernielende die raden,

5

ende alle hoecheyt haer verheffende teghen die wetentheyt Godts, ende gheuanghen nemende allen verstant tot Christus dienst,

6

ende ghereedt hebbende te wreken alle onghehoorsaemheyt, ⁺als volbracht sal wesen v ghehoorsaemheyt.

+ B

7

Besiet tghene dat nae daenschijn es. Eest dat iemant hem seluen betrout dat hy Christo toe behoert, die dencke dit wederom bij sij seluen ghelijck hy Christo toebehoert, dat wy oock alsoo Christo toebehoeren,

8

want al eest dat ick noch wat meer glorieere van onser macht, die ons die heere ghegheuen heeft tot ghestichticheyt, niet tot uwe onstichticheyt soo en sal ick niet bescaemt worden.

9

⁺Maer op dat ic daer voor niet gheacht en worde als oft ic v veruaerde doer brieuen

+ C

10

want voerwaer die brieuen (segghen sij) die sijn swaer ende sterc, maer die teghenwoerdicheyt des lichaems is cranc, ende die sprake versmadelijc)

11

hy die alsulck is die dencke dit, dat ghelijck wij sijn int dwoert doer brieuen niet teghenwoerdich alsulck sijn wij oock teghenwoordich in die daet.

12

Want wi en derren ons niet by brenghen oft verghelijcken by die sommighe, die hen seluen prijsen, maer wy meten ons in ons seluen, ende verghelijckende ons seluen teghen ons,

13

Maer wij en sullen niet onmetelijck glorieren, maer nae die mate der reghelen, ⁺waer mede ons Godt ghemeten heeft een mate om aen te reyken tot v lieden,

+ D

14

want wij en strecken ons niet te verre ouer, als niet aenreyckende tot v lieden, want tot v lieden reyken wij int euangelie Christi,

15

niet onmetelijc glorierende inden arbeyt van iemant anders, maer hope hebbende om van v wassende ghelooue in v lieden groot ghemaect te worden na onsen regele in oueruloedicheyt,

16

om ooc in die plaetsen die bouen v lieden sijn het euangelie te vercondighen, niet om in iemants anders reghele in tghene dat te voren bereyt was te glorieren,

17

Maer soo wie glorieert, die gloriere inden Heere,

18

want hy en is niet oprecht die hem seluen prijst, maer hy den welcken Godt prijst.