Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺VVant vanden dienst die ghedaen wordt den heylighen en is gheen noot v daer af te scrijuen,

+ A

2

want ick kenne uwen bereeden moet, waer af dat ick van v lieden gloriere by die van Macedonien. Want Achaien is oock bereyt van dat voerleden iare, ende v lieder vierich exempel heefter seer vele verweckt,

3

maer ick heb die broeders ghesonden, op dat het tghene daer aff dat wy glorieren van v lieden, niet verloren en gae in dese sake op dat ghi (ghelijck ick gheseyt hebbe) bereydt moecht wesen.

4

Op dat wy (ick en wil niet segghen ghy) niet beschaemt en worden, ⁺desen aengaende, als die van Macedonien met my sullen ghecomen sijn ende v onbereedt vinden.

+ B

5

Daerom heuet my nootlijck gedocht die broeders te bidden, dat sij vore tot by v lieden comen souden, ende te voren bereyden dese voerbeloefde benedictie, dat sij soo mach bereyt wesen als een benedictie ende niet als een ghiericheyt.

6

+ Ende dit segghe ick, Wie spaerlijck saeyet, die sal oock spaerlijck mayen, ende soo wie saeyt in benedictien, die sal van die benedictien oock maeyen.

7

Een ieghelijck nae dat hy te voren ghescict heeft in sijn herte, niet wt droefheyt oft noot, want eenen blijden gheuere bemint Godt,

8

⁺ende Godt is machtich alle gratie oueruloedich te maken in v lieden, op dat ghi in alles altijt alle dat ghenoech is hebbende oueruloedich moecht sijn tot alle goede wercken

+ C

9

alsoo daer ghescreuen is. Hy heuet ghedeelt, hy heuet den armen ghegheuen, sijn rechtuerdicheyt blijft inder eewicheyt.

10

Ende die tsaet den sayere gheeft, die sal oock broot om teten geuen, ende sal v saet vermenichfuldighen, ende vermeerderen dat ghewas van die vruchten uwer rechtuerdicheyt.

* 11

op dat ghy in alles rijc ghemaect sijnde, moecht oueruloedich wesen in alle simpelheyt, ⁺die welcke door ons werckt danck,

+ D

12

want die ghediensticheyt van deser weldaet en veruult niet alleene het behoef der heylighen, maer is ooc oueruloedich doer veel dancksegghinghen inden heere,

13

doert ghenieten van desen dienst Godt glorificerende, in die ghehorsaemheyt van uwer belijdinghen in Christus euangelie, ende in die oprechticheyt van die mededeylinghe tot henlieden,

14

ende tot allen anderen in hen ghebedt voer v lieden, die v begheren, om die groote gratie Godts die in v lieden is.

15

Danck sij Gode voer sijn ontsprekelijcke gratie.