Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde wy maken v kenlijck broeders die gratie Godts die gegheuen is in die kercken van Macedonien,

+ A

2

hoe dat sij in veel proeuinghe van tribulacien oueruloedicheit van blijschap gehadt hebben, ende hen alderdiepste armoede is oueruloedich gheweest in die rijcdommen van haerder simpelheyt,

3

want nae hen macht (ic gheue hen ghetuyghenis) ende bouen hen macht, hebben sij willich gheweest,

4

met veel vermanens ons hertelijcke biddende om die gratie ende mede deylinghe des diensts die aen die heylegen ghedaen wort.

5

Ende niet ghelijck wy ghehoept hebben, maer sij hebben hen seluen gegheuen, ten iersten den heere, daer nae ons door den wille Godts,

6

alsoo dat wy Titum moesten bidden, dat hijt (ghelijck hijt begonst hadde) alsoo oeck soude volbrenghen in v lieden oock dese gratie,

7

maer ghelijck ghy in alle oueruloedich sijt int ghelooue ende int woort ende wetenheyt, ende alle sorchuuldicheyt, ⁺ende daer bouen oeck in v liefde tot ons waerts, op dat ghy in dese gratien oock moecht oueruloedich wesen,

+ B

8

Ick en segs niet als gebiedende, maer doer ander menschen sorchuuldicheyt, oeck uwer liefden oprechten aert prijsende,

9

want ghy weet wel die gratie ons heeren Iesu Christi, dat hij om uwen wille arm gheworden is, doen hy rijck was, op dat ghy doer sijn armoede rijck soudt sijn,

10

Ende ick gheue hier in raet, want dits v profijtelijck, die niet alleen en hebt beghonst te doen, maer oock te willen van dat voorleden vorste iaer,

11

maer nu volbrenghet oock metten wercke, op dat ghelijck die begheerte van den wille bereyt is, alsoo sij die begheerte ooc om te volbrenghen, van tghene dat ghi hebt,

12

Want eest dat den wille bereydt is, soo is dien ghenaem nae dat hy heeft, niet nae dat hy niet en heeft,

13

⁺Want ten is niet ghedaen om dat den anderen soude een verlichtinghe wesen, ende v lieden benautheyt, maer wt ghelijckheyt.

+ C

14

Laet uwe oueruloedicheyt in desen teghenwoordighen tijt haerlieder armoede veruullen, op dat hen oueruloedicheyt uwer armoeden een veruullinge sijn mach,

15

alsser ghescreuen es. Die vele, vergadert haddedi, en en heeft niet gheouert, ende die luttel, vergadert hadde, en heeft niet te min gehadt,

16

Maer God hebs danck, die die selue sorchuuldicheyt ghegheuen heeft in Titus herte voer v lieden,

17

Want die vermaninghe heeft hy voerwaer ontfanghen, maer doen hy sorchuuldiger was, so is hy door

[p. *875]

sijnen wille ghereyst tot v lieden.

18

Wy hebben oock met hem ghesonden eenen broeder wiens lof is in deuangelie, door alle die kercken,

19

maer niet alleen en is dit waer, maer hy is oock gheordineert van die kercken een medegheselle van onser pelgrimagien in dese gratie die van ons bedient wort, ter glorien des Heeren, ⁺ende onsen voorghescicten wille,

+ D

20

scouwende dit op dat ons niemant en lastere in dese volheyt die bedient wort van ons,

21

Want wij besorgen goede dinghen niet alleen voor Gode, maer ooc voor die menschen,

22

Ende wij hebben met die oock ghesonden onsen broeder, den welcken wij beuonden hebben dat hy in veel dinghen dicmael seer sorchfuldich is gheweest, maer nv noch veel sorchfuldigher, door veel betrouwens op v lieden

23

tsij van Titus weghen die mijn gheselle is, ende onder v lieden een helpere, oft van weghen onser broeders die apostelen sijn van die kercken der glorien Christi.

24

Daer om die bewijsinghe die daer is van uwer liefden ende onser glorien voor v lieden wilt in hen betoonen int aenscouwen van die kercken.