Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺DAerom mijn alderliefste laet ons dese beloefte hebbende ons seluen suyueren van alle onsuyuerheyt des vleeschs ende des gheests, volmakende die heylichmakinge in die vreese Godts

+ A

* 2

Verstaet ons) Niemanden en hebben wy ghequetst, niemanden en hebben wy verarghert, niemanden en hebben wi bedroghen,

3

Ick en segts tot uwer verdoemenissen niet, want ick heb te voren gheseyt dat ghy in onse herten sijt om mede te steruen, ende om mede te leuen,

4

Ick heb veel betrouwens tot v lieden, ick heb veel gloriatien voer v lieden, ick ben veruult met troost, ick ben seer oueruloedich van blijschappen in alle onse tribulatie,

5

Want doen wy oock ghecomen waren in Macedonien, soo en heeft ons vleesch gheen ruste ghehadt, maer wy hebben alle tribulatie gheleden, van buyten strijt, van binnen vreese,

6

Maer Godt die de oetmoedighe vertroost, ⁺die heeft ons oock vertroost in die toecoemste van Titus,

+ B

7

Maer niet alleen in sijn toecoemste, maer ooc in den troost waer mede hy ghetroost is gheweest in v lieden, vertellende ons v lieder begheerte, v weenen, v naerstige sorghe voer my, alsoo dat ick noch meer verblijt was.

8

Want al heb ic v lieden bedroeft in den brief, dat en is my niet berouwen, ende al waert my berouwen siende dat dien brief (al en wast maer tot een luttel tijts) v bedroeft heeft,

9

soo verblijde ick my nv, niet om dat ghy bedroeft sijt gheweest, maer om dat ghi sijt bedroeft gheweest ter penitentien. Want ghi sijt bedroeft gheweest nae Godt op dat ghi nerghers in en soudt hinder lijden wt ons,

10

Want die droefheyt die nae Godt is die werct penitentie ter ghestadigher salicheyt, maer der werelts droefheyt werct die doot,

11

Want siet dit selue dat ghy bedroeft sijt gheweest nae Godt, hoe groote sorchuuldicheit wercket in v lieden, daer toe oock verantwoerdinghen, ⁺daer toe ooc verbolghentheyt, daer toe ooc begheerte, daer toe ooc veruolghinghe, daer toe oock wrake, ⁺in allen dinghen hebdi v seluen bewesen onbesmet te sijne in die sake.

+ C

+ D

12

Daerom al hebbe ic v ghescreuen, dat en is niet ghedaen om dien diet onghelijc ghedaen heeft, nocht om hem diet gheleden heeft, maer om openlijck te toonen onse sorchuuldicheyt die wy hebben om v lieden,

13

voer Gode, daerom sijn wy vertroost gheweest, ende in onse vertroostinghe soo sijn wy veel oueruloedelijcker verblijt gheweest om Titus blijschap, om dat sijnen gheest vermaect was van v allen,

14

ende al heb ick by hem my iet beroemt van v lieden, daer en ben ick niet in beschaemt gheworden, maer ghelijck wy v lieden alle dinghen inder waerheyt gheseyt hebben, alsoo is ons beroemen (dwelck tot Titum is gheweest) warachtich gheworden,

15

ende sijn binnenste sijn oueruloedelijcker in v lieden, ghedenckende uwer alder ghehoorsamheyt, hoe dat ghy met vreesen ende anxt hem ontfanghen hebt.

16

Ick ben blijde dat ick in alle dinghen betrouwen hebbe in v lieden.