Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

+ 1

⁺ENde wij medehelpende vermanen dat ghy die gratie Godts te vergheefs niet en ontfanghet

+ A

2

(want hy seyt). Inden ghenamen tijt heb ick v verhoort, ende inden dach der salicheyt heb ick v gheholpen, Siet nv hier den ghenamen tijt, siet nv hier den dach der salicheyt,

3

niemanden gheuende eenich ledtsel, op dat onsen dienst niet mispresen en worde,

4

maer laet ons in allen dinghen ons seluen bewijsen als Godts dienaers, in veel lijdtsaemheyt, in tribulatien in nooden, in benautheden,

5

in slaghen, in kerkers, in oploopen, in arbeyden, in wakinghen, in vastinghen

6

in suyuerheyt, in wetenheyt, in lanckmoedicheyt, ⁺in soeticheyt, inden heylighen gheest, in ongheueynsder

+ B

[p. *874]

liefden,

7

in dwoert der waerheyt, in die cracht Gods, doer die wapenen der rechtuerdicheyt ter rechter ende ter slinckerhandt,

8

doer glorie ende onedelheyt, doer quade fame ende goede fame, als verleyders ende nochtans warachtighe, als die onbekent sijn ende nochtans bekent,

9

als steruende, ende siet wy leuen, als ghecastijt ende niet ghedoot,

10

als droeuige maer altijt blijde sijnde, als behoeftighe, maer veel menschen rijck makende, als niet hebbende, ende alle dinghen besittende.

* 11

Onsen mont is gheopent tot v lieden o ghi Corinthianen ons herte is verbreyt.

12

⁺Ghy en wort niet benaut in ons, maer ghy sijt benaut in v binnenste.

+ C

13

Maer ghy den seluen loon hebbende (ick segt v als mijn kinderen), wilt oock verbreyt worden.

14

+ En wilt gheen iock trecken metten ongheloouighen. Want wat ghemeynscap heeft die rechtuerdicheyt met die ongerechticheyt? oft wat geselscap heeft dat licht met die duysternisse?

15

Maer wat ghelijcknisse heeft Christus met Belial? Oft wat deel heeft die gheloouighe metten ongheloouighe?

16

⁺ende wat eendrachticheyt heeft den tempel Godts metten Afgoden? want ghy sijt den tempel des leuenden Gods, ghelijck Godt seyt, Want ic sal in hen woonen ende in hen wandelen, ende ic sal haerlieden Godt wesen. ende sij sullen mijn volck wesen.

+ D

17

Waerom gaet wt dat midden van henlieden, ende wort ghescheyden seyt die heere, ende dat onsuyuere en wilt niet geraken,

18

ende ic sal v lieden ontfanghen, ende ick sal v lieden wesen tot eenen vader, ende ghy lieden sult my wesen tot sonen ende dochteren, seyt die heere almachtich.