Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

+ 1

⁺VVant wij weten dat wij (eest dat ons eertsch huys van deser wooninghen ontbonden wort) een timmeringhe hebben van Gode, een eewich huys niet met handen ghemaect inden hemel,

+ A

2

want daerom suchten wij oock begherende met die wooninghe die inden hemel is ouerghecleet te worden,

3

eest nochtans alsoo dat wij ghecleedt, ende niet naect gheuonden worden,

4

Want ooc wy die in dit tabernakel sijn suchten beswaert sijnde, om dat wij niet en willen ontcleedt sijn maer ouerghecleedt worden op dat verslonden mocht worden tghene dat steruelijc is, van dleuen,

5

⁺maer die ons daer toe bereydt, dats Godt, die ons ghegheuen heeft den pant des gheests,

+ B

6

Daerom altijt betrouwende ende wetende dat wy als wy int dlichaem sijn, vreemdelinghen vanden Heere sijn

7

(want wy wandelen doort ghelooue, niet door claer ghesicht)

8

maer wij sijn cloeck ende wij hebben eenen goeden wille meer om vreemdelinghen te worden vanden lichaem, ende teghenwoordich te sijn by den Heere,

9

Ende daerom sijn wij vlitich tsij oft wij by hem sijn, oft van hem om hem te ghenoeghen

10

Want wij alle moeten vertoont worden voor Christus rechterstoel, op dat een ieghelijck ontfanghe sijn eyghen behoorte des lichaems, nae dat hy ghedaen heeft goet oft quaet,

11

Daerom dit wetende raden wij den menschen die vreese God, ⁺maer Gode sijn wij openbaer, maer ick hope dat wij oock in uwe conscientien openbaer sijn.

+ C

* 12

Wij en prijsen ons seluen niet wederom aen v lieden, maer wij gheuen v lieden ocsuyn om te glorieren van ons, op dat ghy wat hebben moecht teghen die ghene die int aenschijn gloriëren, ende niet int herte,

13

want het sij oft wij metten ghedachte te vele doen dat doen wij gode, oft dat wi machtich sijn dat doen wij vlieden,

14

want die liefde Christi dringt ons, dit achtende, want eest sake datter een voor alle ghestoruen is, soo sijn sij alle ghestoruen,

15

ende voor allen is Christus gestoruen, op dat ooc die ghene die leuen nv voortaen hen seluen niet leuen en souden, maer hem, die voor hen ghestoruen is ende verresen,

16

Daerom voortaen en kennen wy niemanden nae den vleesche, Ende al hebben wij Christum nae den vleesche ghekent, ⁺maer nv voorts en kennen wij hem niet,

+ D

17

Daerom isser in Christo eenighe nieuwe creatuere, die oude dinghen sijn voorby ghegaen, siet alle dinghen sijn nieuwe gheworden,

18

Ende alle dinghen sijn wt Gode, die ons versoent heeft met sij seluen door Christum, ende heeft ons ghegheuen den dienst der versoeninghen,

19

want Godt was in Christo die werelt met hem versoenende, dien niet wijtende hen misdaden, ende hy heeft in ons ghestelt dwoort der versoeninghen,

20

Daerom sijn wij legaten in Christus stadt als oft Godt door ons vermanende ware, wij bidden hertelijck in Christus stadt laet v versoenen met Gode,

21

hem die gheen sonde en kende heeft hy voor ons tot sonde ghemaect, om dat wij souden worden Godts rechtuerdicheyt in hem.