Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺DAerom hebbende desen dienst, nae dat wy bermherticheyt vercreghen hebben, soo en verflauwen wij niet,

+ A

2

maer wi worpen wech die decselen der scanden, niet wandelende in loosheyt noch verualschende het woort Godts, maer door die openbaringhe der waerheyt ons seluen prijselijck makende tot allen conscientien der menschen voor God

3

Eest ooc dan dat ons euangelie bedect is, soe eest bedect in die ghene die verloren gaen,

4

in die welcke die Godt van deser werelt verblint heeft die herten der ongheloouigher, alsoo dat hen niet scijnen en soude dat verlichten van Deuangelie der glorien Christi, die Godts beelt is.

+ 5

⁺Want wy en preken ons seluen niet, maer Iesum Christum, dat hy onse Heere is, maer wy uwe knechten door Iesum,

+ B

6

want Godt die gheseyt heeft dat wt die duysternissen het licht soude schijnen, die heeft selue ghescenen in onse herten, tot verlichten van die wetenheyt der claerheyt Godts, int aensicht Christi Iesu,

7

Maer wij hebben desen scadt in eerden vaten, op dat die hoocheyt si der cracht Godts, ende niet wt ons,

8

in alles lijden wij tribulatie, maer wij en worden niet benauwet, Wij lijden noot maer wij en worden daerom niet vernoyt,

9

wi lijden veruolghinghe, maer wij en worden niet verlaten wij worden verworpen, ⁺maer wij en gaen niet verloren,

+ C

10

altijt dat steruen Iesu in ons lichaem ommedraghende, op dat Iesus leuen ooc gheopenbaert worde in onse lichamen.

* 11

Want wij die leuen, worden altijt ter doot gheleuert om Iesus wille, op dat Iesus leuen oock gheopenbaert worden in ons steruelijck vleesch.

12

Aldus werct die doot in ons, maer dat leuen in v lieden,

13

maer hebbende den seluen gheest des gheloofs alsoo daer ghescreuen is. Ick heb ghelooft daerom hebbe ick ghesproken ende wij gheloouen, daer om dat wij ooc spreken,

14

wetende dat die ghene die Iesum verwect heeft, ons ooc sal met Iesu verwecken, ende stellen met v lieden,

15

⁺Want alle dinghen sijn om uwen wille, op dat die oueruloedighe gratie door vele menschen in danckinghe oueruloeden mach ter glorien Gods,

+ D

16

Daerom en verflauwen wij niet, want al eest dat onse mensch die buyten is verdoruen wort, nochtans die binnen is die wort vernieut van daghe te daghe,

17

Want onse tribulatie des teghenwoordigen tijts seer cort ende licht werct in ons een bouen maten hooghelijck eewich ghewicht der glorien,

18

die welcke niet en aenscouwen die dinghen die ghesien worden, maer die niet ghesien en worden, Want die dinghen die ghesien worden die sijn tijdelijc, maer die niet ghesien en worden, die sijn eewich.