Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺BEghinnen wi wederom ons seluen te prijsen? Oft behoeuen wij ooc ghelijc die sommighe brieueu van recommendatien aen v oft van v lieden?

+ A

2

Onsen brief sijt ghilieden, ghescreuen in onse herten die verstaen wort ende ghelesen van allen menschen,

3

gheopenbaert sijnde dat ghy sijt Christus brief door ons bedient ende ghescreuen, niet met incte, maer metten gheest des leuende Gods, niet in steenen tafelen, maer in vleeschelijcke tafelen des herten.

4

+ Ende wij hebben alsulcken betrouwen door Christum tot Godt,

5

niet dat wij bequaem ghenoech sijn om iet te dencken van ons, als wt ons seluen, maer alle onse bequaemicheyt is wt Godt

6

die ons oock ghemaect heeft bequame dienaers des nieuwen testaments niet nae der letteren maer naeden gheest, ⁺want die letter doodt, maer den gheest maect leuende,

+ B

7

Eest dan dat het bedienen der doot met letteren ghefigureert in steenen gheweest heeft in glorien, alsoo dat die kinderen van Israhel niet en mochten sien in Moyses aensicht, om die glorie sijns aensichts, die te niet ghedaen wort,

8

hoe en sal niet vele meer dat bedienen des geests in glorie sijn?

9

Want eest dat het bedienen der verdoemenissen in glorien is, veel te meer sal dat bedienen der rechtuerdicheijt oueruloedich wesen in glorien.

* 10

Want ten is niet gheglorificeert geweest dat claer gheweest is in dit deel, teghen die ouermatighe glorie,

11

Want eest dat het ghene dat ydel wort met glorien is, veel te meer is in glorien tghene datter blijft,

12

⁺Daerom alsulcke hope hebbende ghebruycken wij groot betrouwen,

+ C

13

ende niet ghelijck Moyses een decsel leyde op sijn aensicht, dat die kinderen van Israel

[p. *873]

niet sien en souden in sijn aensicht, niet sien en souden in sijn aensicht, dwelc ydel ghemaect wert,

14

maer hen sinnen sijn bot gheworden, ⁺want tot opden dach van heden toe blijft dat selue decsel int lesen des ouden testaments niet ontdect (want het wort afghenomen in Christo)

+ D

15

maer tot opden dach van heden toe als Moyses ghelesen wort, soo isser een decsel gheleyt op hen herte,

16

Maer als hy sal bekeert sijn totten Heere, soo sal dat decsel afghenomen worden

17

maer die Heere is eenen gheest, Ende daer den gheest des Heeren is daer is vrijcheyt,

18

Maer wij alle met ontdecten aensichte die glorien des Heeren bescouwende worden in dat selue beelt ouerghefigureert van deen claerheyt tot dander claerheyt, als van des Heeren gheest.