Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺MAer ick heb dit selue voor my ghenomen, dat ic wederom met droefheyt niet en soude tot v lieden comen,

+ A

2

want eest sake dat ick v bedroeue, ende wie eest die my mach verblijden, dan die ghene die wt my bedroeft wort?

3

Ende dit selue heb ic v ghescreuen, op dat ick (als ick comen sal) gheen droefheyt op droefheyt en soude hebben, vanden welcken ick my hadde behoort te verblijden, betrouwende in v allen, want mijn blijscap uwer alder blijscap is,

4

want wt veel tribulatien ende benautheden des herten heb ick v lieden ghescreuen met veel tranen, niet om dat ghy soudt bedroeft worden, maer om dat ghy weten soudt wat liefde dat ick hebbe oueruloedelijcker tot v lieden,

5

⁺Maer heefter iemant eenighe droefheyt aenghedaen, die en heeft my niet bedroeft, dat een luttel, op dat ick v allen niet en beswaere,

+ B

6

Den ghenen die al sulck is, dien is ghenoech, dese straffinghe die van veel menschen ghedaen wort,

7

alsoo dat ghijt hem ter contrarien te meer vergheeft ende vertroost, op dat hi by auontueren door te groote droefheyt niet verslonden en worde die alsulck is,

8

waerom bidde ick v lieden, dat ghy in dien wilt die liefde vestighen,

9

Want daerom heb ick oock tot v lieden ghescreuen, op dat ick v beproeuinghe kennen soude oft ghy oock in alles ghehoorsaem sijt,

10

⁺Maer soo wien ghi iet vergheuen hebt dien vergheue ict ooc, want tghene dat ick vergheuen hebbe, eest dat ick iet vergheuen hebbe, dat heb ic om uwen wille vergheuen, inden persoon Christi,

+ C

11

op dat wij niet bedroghen en souden worden van Satana, want sijn ghedachten en sijn ons niet ombekent,

12

maer doen ic tot Troaden ghecomen was om dat Euangelie Christi, ende my die doere gheopent was inden Heere,

13

soo en heb ic gheen ruste ghehadt in mijnen gheest om dat ick niet gheuonden en hadde Titum mijnen broeder, maer henlieden te Gode beuelende ben ick voorts ghereyst in Macedonien,

14

Maer Gode si danc die ons altijt maect verwinders in Christo Iesu, ⁺ende maect openbaer den rueck van sijnder kennissen door ons in allen plaetsen,

+ D

15

want wij sijn Gode eenen goeden rueck Christi, in die ghene die behouden worden, ende in die ghene die verloren gaen,

16

den anderen sijn wij voorwaer eenen rueck des doodts, ter doodt, maer den anderen eenen rueck des leuens, ten leuen, Ende wie is hier toe soo bequame?

17

Want wij en sijn niet gelijcker vele sijn verualschende dat woort Godts maer wt puerheyt, ende als wt Gode, spreken wij voor Gode in Christo.