Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAVLVS een apostel Iesu Christi door den wille Godts ende Thimotheus een broeder, der kercken die in Corinthen is, met alle den heylighen die in gheheel Achaien sijn,

+ A

2

Gratie sij v lieden ende vrede van Gode onsen vadere ende den Heere Iesu Christo

3

Ghebenedijt sij Godt ende die vader ons Heeren Iesu Christi, die vader der bermherticheden, ende God van alder vertroostinghen,

4

die ons vertroost in alle onse tribulacien, op dat wij selue ooc hen moghen troosten die in alle verdructheyt sijn, door die vermaninghe waer door dat wij selue oock vermaent worden van Gode

5

Want ghelijck Christus lijden oueruloedich is in ons, ⁺alsoo is door Christum onse vertroostinghe ooc oueruloedich,

+ B

6

Maer tsij oft wij ghetribuleert worden tis

[p. *872]

om uwe vermaninghe ende salicheyt, tsij oft wij vermaent worden tis om uwe vermaninghe ende salicheyt die welcke werct verdraghelijcheyt van die selue passien, die wij oock lijden,

7

ende ons hope is vaste voor v lieden, wetende dat ghelijc ghi medeghesellen des lijdens sijt, alsoo sult ghy ooc wesen der vertroostinghen,

8

Want wij en willen niet dat v onbekent sij broeders van onse tribulatie, die ghesciet is in Asien, want wij hebben bouen maten seer beswaert gheweest bouen cracht, alsoo dat ons oock verdroodt te leuen,

9

Maer wij hadden in ons seluen een antwoorde des doodts, op dat wij niet en souden sijn in ons seluen betrouwende, maer in Gode, die de doode verwect,

10

die ons van soo grooten perikelen verlost heeft ende verlost, inden welcken wij hopen dat hy ons noch sal verlossen

11

met v lieder hulpe in uwe ghebeden voor ons, ⁺op dat door persoonen van veel ghedaenten van die gaue die in ons is, Godt mach ghedanct worden voor ons,

+ C

12

Want dit is onse glorie, tghetuyghenis van onser conscientien, dat wij in die simpelheyt ende puerheyt Godts, ende niet in vleeschelijcke wijsheyt, maer in die gratie Gods verkeert hebben in dese werelt, maer aldermeest by v lieden,

13

Want wij en scrijuen v gheen ander dinghen, dan die ghy ghelesen hebt, ende weet, Maer ick hope dat ghijt totten eynde toe weten sult,

14

alsoo ghy ons oock ghekent hebt eensdeels, dat wij uwe glorie sijn, ghelijc ghy ooc die onse, inden dach ons Heeren Iesu Christi,

15

Ende in dit betrouwen heb ic ierstmael ghewilt tot v lieden comen, dat ghy die tweede gratie hebben soudt,

16

ende door v lieden doorgaen in Macedonien, ende wederom van Macedonien comen tot v lieden, ende van v lieden gheleydt worden in Iudeen,

17

Daer om doen ic dit ghewilt hadde heb ic dan eenighe lichtuerdicheyt ghebruyct? ⁺Oft dat ick dencke, dencke ick dat naeden vleesch alsoo dat by my soude sijn. Iae ende Neen?

+ D

18

Maer Godt is ghetrouwe, want ons sprake die by v lieden gheweest is, daer en is niet inne Iae ende Neen.

19

Want Godts sone Iesus Christus, die onder v lieden door ons ghepreect is, door my ende Syluanum ende Timotheum en heeft niet gheweest, Iae ende Neen, Maer in hem heeft Iae gheweest,

20

want alle die beloften Godts die daer sijn, die sijn Iae in hem, daerom sijn sij hem oock Amen Gode, tot onser glorien,

21

Maer die ons versterct met v lieden in Christo, ende die ons ghesalft heeft is God,

22

die welcke ons ooc gheteekent heeft, ende heeft den pant des gheests ghegheuen in onse herten,

23

Maer ick aenroepe God tot eenen ghetuyghe op mijn ziele, dat ic v lieden sparende voorts niet meer en ben ghecomen te Corinthen, niet om dat wij ouer v ghelooue heerscappie hebben, maer want wij helpers sijn van uwer blijscappen, want door tghelooue staet ghy.