Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺SIet ick come tot v dese derde reyse, Inden mont van twee oft drije ghetuyghen sal alderley woort staen,

+ A

2

Ick hebt te voren gheseyt, ende ick segt te voren als teghenwoordich, ende nv niet teghenwoordich den ghenen die te voren ghesondicht hebben, ende alle den anderen, die ick niet sparen en sal, eest sake dat ick wederom come,

3

Begheerdi eens een bewijsinghe te hebben van hem die in my spreect Christus? ⁺die in v lieden niet cranck en is, maer machtich is in v lieden,

+ B

4

want al is hi ghecruyst wt crancheyt, hy leeft nochtans wt die cracht Godts want wij sijn oock cranck in hem, maer wij sullen met hem leuen wt die cracht Godts in v lieden,

5

Ondersoect v seluen oft ghy int ghelooue sijt, proeft ghy v seluen, Oft en kendi v seluen niet, dat Christus Iesus in v lieden is? ten sij dat ghy by auontueren verworpen sijt,

6

⁺Maer ick hope dat ghy wel kent dat wij niet verworpen en sijn,

+ C

7

Ende wij bidden God, dat ghy niet quaets en doet, niet om dat wij goet souden scijnen, maer om dat ghy dat goet is doen soudt, ende dat wij souden als verworpen sijn,

8

want wij en vermoghen niet teghen die waerheyt, maer voor die waerheyt,

9

Want wij sijn blijde om dat wij cranck sijn, ende dat ghi machtich sijt, Dat bidden wy ooc, v lieder volcomenheyt,

10

⁺Daerom scrijue ic dit niet teghenwoordich, op dat ick teghenwoordich niet straffelijcker doen en moet, nae die macht welc die Heere my ghegheuen heeft ter ghestichticheyt ende niet ter onstichticheyt.

+ D

11

Maer voorts broeders verblijt v, weest volmaect, vermaent, hebt een ghevoelen, hebt vrede, ende Godt des vreedts ende der liefden sal met v lieden sijn.

12

Groet malcanderen met een heylich cussen. Het groeten v alle die heylighen.

13

Die gratie ons Heeren Iesu Christi, ende die liefde Gods ende die ghemeynscap des heylichs gheests sij met v allen. Amen.

Hier voleynt die tweede Epistel van sinte Pauwels totten Corinthien.