Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

+ 1

⁺MAer ick make v kenlijck broeders het euangelie dat ick v ghepreect hebbe, dwelck ghy oock ontfanghen hebt daer ghy ooc in staet

+ A

2

ende daer door dat ghy oock salich wort, by wat redene dat ick v lieden ghepreect hebbe eest dat ghijt behouden hebt, ten sij dat ghi te vergheefs ghelooft hebt

3

Want ick hebbe v lieden ghegheuen ten iersten dwelc ick oock ontfanghen hebbe, dat Christus ghestoruen is voor onse sonden, nae die scriftueren,

4

ende dat hy begrauen is, ende dat hy verresen is ten derden daghe, nae die scriftueren,

5

ende dat hy ghesien is van Cephas, ende daer naer van die elue,

6

Daer nae is ghesien gheweest meer dan van vijf hondert broeders te samen, van die welcke die sommighe tot nu toe blijuen, maer die sommighe sijn ontslapen,

7

⁺Daer nae is hy ghesien van Iacobus, ende daer na van alle die apostelen,

+ B

8

maer ten laetsten van allen, als van eenen verworpelinck is hy van my oock ghesien gheweest,

9

Want ic ben die minste vanden apostelen, die niet weerdich en ben een apostel ghenoemt te worden, want ick Gods kercke veruolcht hebbe,

10

maer door die gratie Gods ben ick dat ick ben, ende sijn gratie en heeft in my niet ledich gheweest. * Maer ick heb meer dan si alle ghearbeyt maer niet ick, maer die gratie Gods met my,

11

Want het tsij ick, oft sij, wij preken alsoo, ende alsoo hebt ghy ghelooft.

+ 12

Maer eest dat van Christo ghepreect wort dat hy vander doot verresen is, Hoe segghen die sommighe onder v lieden, dat die verrijsenisse der dooden niet en is?

13

maer eest dat die verrijsenisse der dooden niet en is, soo en is Christus oock niet verresen,

14

Ende eest dat Christus niet verresen en is, soo is dan ons predicatie ydel, ende v ghelooue is ooc ydel,

15

ende soo worden wij gheuonden Gods valsche ghetuyghen, want wij hebben ghetuyghenis gheseyt teghen Godt dat hy Christum verwect heeft, den welcken hy niet verwect en heeft, eest dat die dooden niet en verrijsen

16

want eest dat die dooden niet en verrijsen, so en is Christus ooc niet verresen,

17

⁺Ende eest dat Christus niet verresen en is soo is v ghelooue ydel, ende ghy sijt al noch in v sonden,

+ C

18

Aldus die in Christo ontslapen sijn die sijn dan ooc verloren,

19

want eest dat wij alleen in dit leuen sijn hopende in Christo, soo sijn wij die allendichste van alle menschen,

20

Maer nu is Christus verresen vander doot, dierste vrucht van die ghene die slapen,

21

want voorwaer door eenen mensch is de doot comen, ende door eenen mensch die verrijsenisse der dooden,

22

Ende ghelijck in Adam alle menschen steruen, alsoo sullen sij oock in Christo alle leuendich ghemaect worden,

23

Maer een ieghelijc in sijn ordene. * Dierste vrucht is Christus, daer nae die ghene die Christo toebehooren, die in sijn toecoemste ghelooft hebben,

24

Daer nae het eynde als hy trijck sal gheleuert hebben Gode ende den vader, Als hy sal te niet ghedaen hebben alle heerlijcheyt ende ouerheyt ende ghewelt,

25

Maer hy moet regneren, tot dat hy alle de vianden ghestelt hebbe onder sijn voeten,

26

maer ten laetsten sal vernielt worden die viandelijcke doot, want hy heuet alle onder sijn voeten gheworpen, Ende als hy seydt.

27

Alle dinghen sijn hem onderworpen, dats sonder twijfel, sonder den ghenen die hem alle dinghen onderworpen heeft,

28

⁺Ende als hem alle dinghen sullen onderworpen wesen, dan sal die sone selue hem ooc onderdaen wesen, die sij seluen alle dinghen onderdaen ghemaect heeft, op dat Godt al sij in allen,

+ D

29

Oft anders wat sullen sij doen die voor die dooden ghedoopt worden eest dat die dooden ganschelijc niet en verrijsen? Waerom worden si ooc voor die ghedoopt?

30

waer toe sijn wij ooc tot allen vren in perikel?

31

Daghelijcs sterue ic om uwer glorien wille broeders, die welcke ick hebbe in Christo Iesu onsen Heere,

32

Eest dat ick (nae die menschelijcke wijse) teghen die wilde dieren ghestreden hebbe te Ephesen wat batet mi eest dat die dooden niet op en staen? laet ons eten ende drincken, want morghen sullen wi steruen

33

En wilt v niet laten verleyden. Quaden clap bederft die goede manieren,

34

ontwaect ghy rechtuerdighe, ende en wilt niet sondighen, want die sommighe en hebben Gods kennisse niet, ick segt tot uwer scanden,

35

Maer iemant seyt. Hoe verrijsen die dooden, in hoedanich lichaem sullen sij comen?

36

⁺Ghi onwijse tghene dat ghi saeyt en wort niet leuende ten sij dat te voren sterue,

+ E

37

ende tghene dat ghy sayet, en sayet ghy niet een sulc lichaem als dat wesen sal, maer een bloot graen, te weten van tarwe oft van eenighen anderen saden,

38

Maer God gheeft dien een lichaem alsoo hi wilt, ende eenen ieghelijcken vanden saden sijn besonder eyghen lichaem.

+ 39

Alle vleesch en is eenderhande vleesch niet, Maer ander is het vleesch der menschen, ander der beesten, ander der voghelen, ende een ander der vis-

[p. *871]

schen,

40

Ende daer sijn hemelsche lichamen ende eertsche lichamen, Maer voorwaer andere is die glorie der hemelscher lichamen ende andere der eertscher,

41

andere is die claerheyt der sonnen, andere die claerheyt der manen ende andere die claerheyt der sterren, Want die een sterre is versceyden van dander sterre in claerheyt

42

alsoo is ooc die verrijsenisse der dooden. Het wort ghesaeyt in verderffelijcheyt ende het sal opstaen in onbederffelijcheyt,

43

het wort gesayet in onedelheyt ende het sal opstaen in glorien, ⁺het wort ghesaeyt in crancheyt, ende tsal opstaen in die cracht,

+ F

44

Het wort ghesaeyt een vleeschelijck lichaem, en tsal opstaen een gheestelijc lichaem Isser een vleeschescelijck lichaem, soo is daer ooc een gheestelijc lichaem, Alsoo daer ghescreuen is.

45

Die ierste mensche Adam is ghemaect tot een leuende ziele, die laetste Adam in eenen leuendich makende gheest,

46

Maer niet ierst tghene dat gheestelijck is, maer dat vleeschelijc is ende daer nae dat ghestelijck is,

* 47

Dierste mensch is vander eerden eertsch, die tweede mensch vanden hemel hemelsch,

48

Sulc als die eertsche is, soo sijn die eertsche, ende sulc als die hemelsche is, soo sijn oock die hemelsche,

49

Hierom ghelijc wij ghedraghen hebben het beelt vanden eertschen, soo laet ons oock draghen het beelt vanden hemelschen,

50

Ende dit seg ic broeders om dat het vleesch ende bloet het rijck Godts niet besitten en moghen noch die bederffelijcheyt en sal die onbederffelijcheyt niet besitten.

51

Siet ic segghe v lieden een verholentheyt, ⁺Wij sullen alle voorwaer verrijsen, maer wij en sullen alle niet verandert worden

+ G

52

In eenen stont in eenen oogheblick, in dat laetste trompet (want dat trompet sal gheclanck gheuen) ende die dooden sullen opstaen onghescent, ende wij sullen verandert worden,

53

want dit bederffelijck lichaem moet onbederffelijcheyt aendoen, ende dit sterffelijck aendoen onsterffelijcheyt,

54

Ende als dit steruelijck die onsteruelijcheyt sal aenghedaen hebben, dan sal gheschieden het woort datter ghescreuen is. Die doot is verslonden in die victorie,

55

o doot waer is v victorie? o doot waer is v steecsel?

56

Ende dat steecsel der doodt is die sonde, maer die cracht der sonden is die wet,

57

Maer Gode si danck die ons victorie ghegheuen heeeft door onsen Heere Iesum Christum,

58

Aldus mijn beminde broeders weest ghestadich ende onberuerlijc, oueruloedende in die wercken des Heeren altijt, wetende dat uwen arbeyt niet ydel en is inden Heere.