Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xiiij. Capittel.

1

⁺VOlcht die liefde, bemint neerstelijck die gheestelijcke gauen, maer aldermeest dat ghy moecht propheteren.

+ A

2

Want die met vreemde talen spreect, die en spreect den menschen niet, maer Gode. Want niemant en hooret, maer doer den gheest spreect hy verholentheden.

3

Want wie propheteert die spreect den menschen tot ghestichticheyt, ende vermaninghe ende troostinghe.

4

Wie vreemde talen spreect die sticht sij seluen, maer wie propheteert die sticht die kercke.

5

Ende ick wille dat ghy alle spreect met vreemde talen, maer meer dat ghi propheteert. Want hy is meerder die propheteert, ⁺dan die met talen spreect, ten si by auontueren dat hijt verclaere, dat die kercke daer mach ghestichticheyt af nemen.

+ B

6

Maer nu broeders eest dat ick tot v lieden come, met talen sprekende, wat profijt sal ick v lieden doen, ten sij dat ick tot v lieden spreke oft in openbaringhe, oft in wetenheyt, oft in prophetie, oft in leeringhe?

7

Want oock die dinghen die sonder ziele sijn gheluyt gheuende tsij een trompet, oft een herpe, ten sij dat die een ondersceyt der toouen gheuen, hoe salmen weten watter gheblasen wort metten trompet, oft metter herpen ghespeelt?

8

Want eest dat het trompet een onseker gheluyt gheeft, wie sal hem ten strijde bereyden?

9

Alsoo oock ten sij dat ghy doer die tonghe een besceydelijcke sprake gheeft, hoe salmen verstaen datter gheseyt wort? Want ghy sult sijn als in die locht sprekende.

10

⁺Daer sijn soo veele (te weten) manieren van talen in dese werelt, ende daer en is niet sonder stemme.

+ C

11

Aldus eest dat ick die bediedinghe der stemmen niet en verstae, soe sal ick hem totten welcken ick spreke onuerstandelijck wesen, ende die my toespreect oock my onuerstandelijck.

12

Alsoe ghy oock, aenghesien dat ghy nauolghers der gheesten sijt, soect tot der kercken ghestichticheyt, dat ghy moghet oueruloedich wesen.

13

Ende daerom die met talen spreect, die bidde dat hijt mach bedieden.

14

Want eest dat ick bidde metter tonghen, soe bidt mijnen gheest, maer mijn verstant is sonder vrucht.

15

Wat eest dan? Ick sal bidden metten gheest, ick sal oock bidden metten verstande. Ick sal singhen metten gheest, ick sal oock singhen metten verstande.

16

Voerts meer, eest dat ghy ghebenedijt metten gheest, die in die plaetse van den leeken is. ⁺Hoe sal hy Amen segghen ouer v benedictie? Want hy en verstaet niet wat ghy segt.

+ D

17

Want voerwaer ghy danct wel, maer die andere en wort niet ghesticht.

18

Ick danck mijnen Godt dat ick met die tale van v allen spreke.

19

Maer in die kercke wil ick vijf woerden in mijnen sin spreken om dat ick andere menschen mach onderwijsen, lieuer dan thien duysent woerden in een vreemde tale.

20

Broeders en wilt gheen kinderen worden nae die sinnen, maer nae die quaetheyt weest cleyn kinderen, maer nae die sinnen weest volmaect.

21

Want in die wet is ghescreuen. Ick sal met anderen tonghen ende met anderen lippen spreken tot desen volcke, ende alsoo en sullen sij my noch niet verhooren, seyt die Heere.

22

Aldus sijn die talen tot een teeken niet den gheloouighen, maer

[p. *870]

den ongheloouighen, maer die prophetien en sijn niet voor die ongheloouighe, maer voor die gheloouighe

23

⁺Daerom eest dat die heele kercke te samen coemt, ende dat sij alle met talen spreken, ende datter in quamen leeken oft ongheloouighe, en sullen die niet segghen dat ghy raest?

+ E

24

Maer eest dat sij alle propheteren, ende datter inne coemt een ongheloouighe oft ongheleerde, die wert van hen allen ghestraft ende van hen allen gheordeelt

25

die verholentheden sijnder herten worden openbaer, ende alsoo op sijn aensicht vallende sal hy Godt aenbidden, belijdende dat warachtelijc God in v lieden is.

26

Hoe eest dan broeders? Als ghi te samen coemt een ieghelijc van v lieden heeft eenen psalm, hy heeft een leeringhe, hy heeft een openbaringhe, hy heeft een tale, hy heeft een bediedinghe, latet alle ter ghestichticheyt gheschieden,

27

⁺Tsij oft iemant met een tale spreect dat doe hy sijn tweede oft ten minsten sijn derder, ende dat deen nae den anderen, ende latet eenen beduyden,

+ F

28

Maer eest datter gheen bedieder en is, soo sal die swijghen in die kercke, maer spreken tot sij seluen ende tot Gode.

29

Maer die propheten sullen twee of drij spreken ende die andere sullent ordeelen,

30

maer eest dattet iemant anders gheopenbaert wordt die daer sittende is, soo swijghe die ierste,

31

Want ghy moghet alle deen nae dander propheteren, op dat sij alle moghen leeren, ende alle moghen vermaent werden,

32

ende die gheesten der propheten sijn den propheten onderdanich,

33

want Godt en is gheen Godt des tweedrachts, maer des vreedts, ghelijc ick oock in alle kercken leere,

34

Die vrouwen sullen in die kercke swijghen, want hen en wort niet toeghelaten te spreken, maer onderdanich te sijn, alsoo die wet seyt,

35

⁺Maer eest dat si iet willen leeren, soo laetse dat thuys van haren mans vraghen, want tis eender vrouwen leelijck te spreken in die kercke,

+ G

36

Oft is v van v lieden het woort Gods voortcomen? oft eest tot v lieden alleen ghecomen?

37

Eest datter iemant scijnt een propheet te wesen, oft gheestelijck, die bekenne dat ick v lieden scrijue, want het sijn des Heeren gheboden,

38

Maer soo wie onwetende is, die en sal niet gheweten worden,

39

Hierom broeders staet nae dat propheteren, ende met talen te spreken en wilt niet verbieden,

40

maer laet alle dinghen eersaemlijc ende met ghescictheyt ghescieden onder v lieden.