Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

+ 1

⁺VVaert dat ick sprake met der menschen ende enghelen tonghen ende die liefde niet en hebbe, soe ben ick gheworden als een luydende metael, oft een clinckende belle.

+ A

2

Ende al hadde ick die prophetie, ende dat ick kende alle verborghentheden, ende alle wetentheyt, ende al hadde ick alle tghelooue alsoo dat ick berghen veruoerde. Ende ick die liefde niet en hebbe, soe en ben ick niet.

3

⁺Ende eest dat ick totter armer spijse bedeyle alle mijn goeden, ende al leuerde ick mijn lichaem alsoe dat ick verbrant worde, ende ick die liefde niet hebbe, soe en batet my niet.

+ B

4

Die liefde is verduldich, sij is goedertieren. Die liefde en benijdt niet, sij en doet niet qualijck, sij en wort niet opgheblasen,

5

sij en is niet eerghierich, sij en soect niet dat haer toebehoort, sij en wort niet ghecreyt, sij en denct gheen quaet,

6

sij en verblijt haer niet van ongherechticheyt, maer sij verblijt haer met die waerheyt,

7

⁺alle dinghen verdraecht sij, alle dinghen ghelooft sij. Alle dinghen hoept sij, alle dinghen verwacht sij.

+ C

8

Die liefde en vergaet nemmermeer, al sijnt prophetien, sij vergaen, oft sijnt tonghen sij sullen ophouden, oft eest wetenheyt, sij sal te niet ghedaen worden.

9

Want eens deels weten wy, ende eens deels propheteren wy,

10

maer als comen sal dat volmaect is, dan sal te niet ghedaen worden datter eens deels is.

11

⁺Doen ick een cleyn kint was, doen sprack ick als een cleyn kindt, ende ick ordeele als een cleyn kindt, ende ick dachte als een cleyn kint. Maer wanneer ick een man gheworden ben, soe heb ick afgheleyt alle dat kintschelijck was.

+ D

12

Want wy sien nu doer eenen spieghel in een donckerheyt, maer dan sullen wy sien aensicht teghen aensicht. Nu kenne ick eens deels, maer dan sal ick kennen alsoe ick oock ghekent ben.

13

Ende nu blijuen ghelooue, hope, ende liefde, dese drie, maer die meeste van desen is die liefde.