Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺MAer vanden gheestelijcken saken en wil ick niet dat v ombekent sij broeders.

+ A

2

+ Ghy weet wel hoe dat ghy doen ghy heydenen waert tot die stomme afgods beelden nae dat ghy gheleyt wordet, gaende waert.

3

Daer om maeck ick v lieden kenlijck, dat niemant in den gheest Gods sprekende Iesum en vervloect. Ende niemant en mach segghen. Heere Iesus dan in den heylighen gheest.

4

Maer daer sijn menigherley gratien, maer tes eenen gheest.

5

Ende daer sijn menigherley diensten, maer tes een Heere.

6

Ende daer sijn menigherley wercken, maer tes een Godt, diet al werct in eenen ieghelijcken.

7

Ende eenen ieghelijcken wort een openbaringhe des gheests ghegheuen ten profijte.

8

Den eenen voerwaer wort ghegheuen die sprake der godlijcker wijsheyt doer den gheest, ende den anderen die sprake der wetenheyt, nae den seluen gheest.

9

Den anderen tghelooue in den seluen gheest. ⁺den anderen die gratie der ghesontmakinghen, in den eenighen gheest,

+ B

10

den anderen dat wercken der mirakelen, den anderen die prophetie, den anderen dat ondersceyden der gheesten, den anderen die versceyden manieren der talen, den anderen dat wtlegghen der talen.

11

Maer alle dese dinghen werct die selue eenighe gheest, deylende eenen ieghelijcken nae dat hy wilt.

* 12

Want ghelijck dat lichaem een is, ende heeft veel leden, ⁺ende alle die leden des lichaems al sijn sij vele) sijn nochtans een lichaem alsoo is Christus oock,

+ C

13

Want voorwaer wij sijn in eenen gheest in een lichaem ghedoopt, tsij oft wi Ioden sijn oft Heydenen, tsij knechten, oft vrije menschen, ende wij sijn alle met eenen gheest ghelaeft,

14

Want het lichaem en is niet een ledt maer veel leden,

15

Eest dat den voet seyt. Want ick die hant niet en ben, soo en ben ick vanden lichaem niet, en is die daerom vanden lichaem niet?

16

Ende eest dat die oore seyt, Want ic die ooghe niet en ben, so en ben ic van den lichaem niet, en is si daerom vanden lichame niet?

17

waer tgheheel lichaem een ooghe, waer soude tghehoor sijn?

[p. *869]

Waert heel tghehoor, waer soude het rieken sijn?

18

Maer nu heeft Godt die leden ghestelt een ieghelijck van dien int lichaem, alsoe hy ghewilt heeft.

19

Maer waren sij alle een ledt waer soude dlichaem sijn.

20

Maer nu sijnt voerwaer veel leeden, ende een lichaem.

21

Ende die ooghe en mach niet segghen totter hant. Ick en heb ws van gheenen doene. Oft wederom het hooft den voeten. Ghy en sijt my niet nootelijck.

22

Maer die leden des lichaems die de crancste scijnen te wesen, sijn veelmeer die nootelijcste,

23

ende die wy houden die onedelste leden ons lichaems te sijne, dese legghen wy die meeste eere aen, ende die ons oneerlijcste leden sijn, die hebben die meeste eere.

24

Maer ons eerlijcke leden en behoeuen des gheens, maer Godt heeft dat lichaem alsoo ghemenghet, gheuende die meeste eere den ghenen diet meest behoefden,

25

op datter gheenen twist en soude sijn int lichaem, maer dat die leden voer malcanderen souden eendrachtelijck besorcht sijn.

26

⁺Ende eest dat het een ledt iet lydt, soe hebben alle die leden medelijden, ende eest datter een ledt glorieert, soe verblijden hen daer mede alle die leden.

+ D

27

Maer ghy sijt het lichaem Christi, ende leden van dlet.

28

Ende die sommighe heeft Godt voerwaer in die kercke ghestelt ten iersten Apostelen, ten tweeden propheten, ten derden leeraers, daer nae myrakel doenders, daer nae die gratien der ghesontmakinghen, behulpsaemheden, regimenten, menigherhande manieren van talen,

29

Sijnt alle Apostelen? Sijnt al Propheten? Sijnt alle leeraers?

30

Sijnt alle myrakel doenders? Hebben sij alle die gratien van ghesont te maken? Spreken sij alle met versceyden talen? Sijnt alle beduyders?

31

Maer volcht die beste gauen. Ende noch bewijse ick v lieden eenen hoogheren wech.