Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺SYt mijn nauolghers, ghelijck ick ooc Christi ben.

+ A

2

Ende ick prijse v broeders dat ghy in alle dinghen mijnder ghedachtich sijt, ende dat ghy als ic v gheleert hebbe mijn gheboden houdt.

3

Maer ick wil dat ghy wetet dat het hooft van alle man Christus is, ende der vrouwen hooft is die man, maer het hooft Christi dat is Godt.

4

Alle man biddende oft propheterende met bedecten hoofde, onteert sijn hooft.

5

Maer alle vrouwe biddende oft propheterende met onghedecten hoofde, onteert haer hooft. ⁺Want het is soe vele als oft sij ghescoren ware.

+ B

6

Want eest dat een vrouwe niet bedect en wort, soe laet haer hair afghesneden worden. Maer eest eender vrouwen leelijck dat sij ghescoren, oft caluwe ghemaect wort, soe laetse haer hooft bedecken.

7

Die man en moet voerwaer sijn hooft niet bedecken, want hy is dat beelt ende die glorie Gods, maer die vrouwe is des mans glorie.

8

Want die man en is wter vrouwen niet, maer die vrouwe wten man.

9

Want die man en is ooc niet ghescapen om die vrouwe, ⁺maer die vrouwe om den man.

+ C

10

(Daer om moet die vrouwe een decsel hebben op haer hooft, om die enghelen)

11

Maer nochtans die vrouwe en is sonder den man niet, noch die man sonder die vrouwe inden Heere.

12

Want ghelijck die vrouwe vanden man is, alsoe is die man oock doer die vrouwe, maer tis al wt Gode.

13

Ordeelet ghy seluer, betamet eender vrouwen onbedect Godt te bidden?

14

En leert v die natuere dat niet, dattet eenen man scande is eest dat hi sijn hayr lanck laet worden,

15

⁺maer eest dat een vrouwe thair lanck voedet, dats haer glorie. Want het hair is haer tot een decsel ghegheuen?

+ D

16

Maer eest datter iemant schijnt kijuachtich te wesen, wy en hebben alsulcken ghewoonte niet, noch die kercke Godts.

17

Maer dit ghebiede ick v, niet prijsende dat ghy niet int beste, maer int quaetste versaemt.

18

Want voorwaer ten iersten als ghy in die kercke coemt, soo hoore ick datter tweedrachten onder v lieden zijn, ende ick ghelooft eens deels.

19

Want daer moeten tweedrachten sijn, om dat die ghene die gheproeft sijn moghen openbaer worden onder v lieden.

20

+ Aldus wanneer ghi lieden te samen coemt, soe en eetmen daer des Heeren auontmael niet.

21

Want een ieghelijck neemt sijn auontmael te voren om te eten. Ende die eene is voerwaer hongherich, ende die andere is droncken.

22

⁺En hebdi gheen huysen om te eten ende te drincken oft versmaeddi die kerke Gods ende bescaemdi die ghene diet niet en hebben? Wat sal ic v segghen? Prijse ic v lieden daer inne? neen ick en prijse v niet.

+ E

23

Want ic heb vanden Heere ontfanghen tghene dat ick v lieden oock ghegheuen hebbe. Hoe dat die Heere Iesus, inden nacht als hy gheleuert worde heeft ghenomen tbroodt,

24

ende danckende heeft hijt ghebroken ende gheseyt, Neempt ende etet, dit is mijn lichaem, dat voer v sal gheleuert worden, doet dit in mijnder ghedenckenisse.

25

Desghelijcs oock den kelck nae dat hy het auontmael gheten hadde, segghende, ⁺Desen kelck is tnieuwe testament in mijn bloet, doet dit (soe dicwael als ghy dien drincken sult) in mijnder ghedenckenissen.

+ F

26

Want alsoe dicwils als ghy eten sult dit broot, ende desen kelck drincken, soe suldi des Heeren doot vercondighen, tot dat hy comen sal.

27

Daer om soe wie dit broot eedt, oft drinct den kelck des Heeren onweerdelijck die sal sculdich wesen des lichaems ende des bloets des Heeren.

28

Maer die mensche proeue hem seluen, ende ete alsoo van dien broode, ende drincke van den kelcke.

29

⁺Want soe wiet eedt ende drinct onweerdelijck, die eet ende drinct het ordeel voer sij seluen, niet ondersceydende het lichaem des Heeren.

+ G

30

Daer om isser onder v lieden vele sieck ende cranck, ende veel slaepter.

31

Waert soo dat wy ons seluen ordeelden, soe en souden wy niet gheordeelt worden.

32

Maer als wy gheordeelt worden, soe worden wy vanden Heere ghestrafft, op dat wy met deser werelt niet en souden verdoemt worden.

* 33

Daer om mijn broeders, als ghy te samen coemt om te eten, soe verbeyt malcanderen.

34

Eest dat iemant hongher heeft die ete thuys, op dat ghy totten ordeel niet en versaemt. Maer die ander dinghen sal ick bescicken als ick comen sal.