Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ICk en wil niet dat v onbekent sij broeders, hoe dat ons vaders alle onder die wolcke gheweest hebben ende alle doer die zee ghegaen sijn,

+ A

2

ende alle doer Moysen ghedoopt gheweest sijn in die wolcke ende in die zee,

3

ende hebben alle gader een gheestelijcke spijse ghegheten,

4

ende alle eenen gheestelijcken dranck ghedroncken (Want sij droncken van den gheestelijcken steen die hen volchde, ende dien steen was Christus).

* 5

Maer in veel van hen lieden en heeft Godt gheen behaghen ghehadt, ⁺want sij sijn nedergheworpen gheweest in die woestijne.

+ B

6

+ Ende dese dinghen sijn ghesciet tot een figuer van ons, dat wy niet en souden sijn begheerende het quaet, ghelijck die oock begheert hebben.

7

Dat ghy oock gheen afgods aenbidders en wort, ghelijck die sommighe van hen lieden, alsoo daer ghescreuen is, Het volck heeft gheseten om teten ende te drincken, ende sij sijn opghestaen om te spelen.

8

Noch en laet ons gheen oncuyscheyt bedrijuen, ghelijck die sommighe van hen lieden oncuyscheyt bedreuen hebben, ende daer isser gheuallen op eenen dach drijentwintich duysent.

9

Noch en laet ons Christum niet tempteren, ghelijck die sommighe van hen lieden ghetempteert hebben, ende sijn vanden serpenten vergaen.

10

⁺Noch en murmureert oock niet, ghelijck die sommighe van hen lieden ghemurmureert hebben, ende sijn vernielt vanden verderuere.

+ C

11

Want alle dese dinghen ghesciedden hen lieden in figuere, maer sij sijn ghescreuen tot onser straffinghen, op die welcke die eynden der euwen ghecomen sijn.

12

Daer om soo wie hem seluen laet duncken dat hy staet, die sie toe dat hy niet en valle.

13

Gheen becoringhe en beuanghe v dan die menschelijck sij. Ende Godt is ghetrouwe die v niet en sal laten tempteren bouen dat ghy vermoecht.

* + ⁺Maer hy sal oock metter temptacien een doercomen gheuen, op dat ghijt soudt connen verdraghen.

+ D

14

Daer om mijn alderliefste vliet van der afgoden dienst.

15

Ick spreeck als den wijsen, ordeelt ghy selue dat ick segghe.

16

Den kelck der benedictien den welcken wy ghebenedijden en eest niet een mededeylinghe des bloets Christi? ende het broot dat wy breken, en eest niet een mededeylinghe van dlichaem des Heeren?

17

⁺Want onser vele sijn een broot, een lichaem alle die van eenen broode mededeylen.

+ E

* 18

Siet Israel nae tvleesch. En sijn sij, (die die slachofferanden eten) niet deelachtich des outaers?

19

Wat seg ick dan? segghe ick dat der afgoden offerande iet is? oft dat den afgod iet is?

20

Maer dat die heydenen ten offer slaen dat offeren sij den duyuelen, ende niet Gode. Maer ick en wil niet dat ghy medeghesellen wordt der duyuelen.

21

Ghi en moecht des Heeren kelck niet drincken ende den kelck der duyuelen. Ghy en moecht van des Heeren tafel niet deelachtich worden, ende van die tafel der duyuelen.

22

⁺Oft willen wy den Heere terghen? Sijn wi stercker dan hy? Alle dinghen sijn my gheorlooft, maer alle dinghen en sijn niet orberlijck.

+ F

23

Alle dinghen sijn my gheorlooft, maer alle dinghen en stichten niet.

24

Niemant en soecke dat sijne is, maer dat eens anders is.

25

Al wat int vleeschuys vercocht wort, dat eet, niet vraghende om die conscientie.

26

Den Heere behoort die eerde toe, ende haer volheyt.

27

Eest dat v iemant vanden ongheloouighen noodt, ende ghy daer gaen wilt, soe eet alle dat v voerghestelt is, niet vraghende om die conscientie.

28

⁺Maer eest datter iemant seyt. Dat is den afgoden gheoffert gheweest, soe en wilt dat niet eten om dien diet te kennen ghegheuen heeft, ende om die conscientie.

+ G

29

Om die conscientie (seg ic) niet die uwe, maer eens anders. Want waerom wort mijn vrijheyt gheordeelt van eens anders conscientie?

30

Eest dat ic met dancbaerheyt mede deyle.

[p. *868]

Waer om worde ick ghelastert om tghene daer ic dancbaer af ben?

31

Daer om tsij oft ghy etet oft drinckket, oft iet anders doet, doet dat al ter glorien Gods.

32

Weest sonder verargheren den Ioden ende den Griecken, ende der kerken Gods,

33

ghelijck ick oock in alle dinghen eenen ieghelijcken behaghe, niet soeckende dat my profitelijck is, maer dat veel menschen dient om salich te worden.