Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺EN ben ick niet vrij? En ben ick gheen Apostel? en heb ick Christum Iesum onsen Heere niet ghesien? En sijt ghy niet mijn werck inden Heere?

+ A

2

Ende al en ben ick den anderen gheen Apostel, ick bent nochtans v lieden. Want ghy sijt den seghel van mijnder Apostelscap inden Heere.

3

Mijn verantwoerden by die ghene die my vraghen is dit.

4

En hebben wy gheen macht te eten, ende te drincken?

5

En hebben wy gheen macht een vrouwe die een suster is al om mede te leyden, ghelijck die andere Apostelen, ende die broeders ons Heeren, ende Cephas?

6

Oft en heb ick alleen ende Barnabas die macht niet dit te doen?

7

Wie strijt op sijns selfs soudie tot eenighe tijden? Wie plant eenen wijngaert, ende en eedt van diens vruchten niet? Wie voedt een cudde, ende en eet van dat melck des cudden niet?

8

Seg ick dit nae den mensch? En seyt die wet dit niet?

9

Want daer is ghescreuen in Moyses wet. Ghy en sult den muyl van den dorschenden osse niet toebinden. Sorgt Godt voer die ossen?

[p. *867]

10

Oft seyt hy dit voerwaer om onsen wille? Want om onsen wille isser ghescreuen. Dat die ghene die ackert, ackeren moet op hope, ende die dorscht, op hope van vrucht te ontfanghen.

11

Eest dat wy v gheestelijcke dinghen ghesaeyt hebben, eest groot dat wy uwe vleeschelijcke dinghen mayen?

12

Eest dat die andere uwer macht deelachtich sijn, waer om niet veel te meer wy? Maer wy en hebben dese macht niet ghebruyct, maer wy verdraghent al, om dat wy gheen hinder en souden doen der euangelien Christi.

13

En weet ghy lieden niet dat die ghene die in die heyleghe plaetse wercken oock eten van tghene dat van die gheheylichde plaetse is, ende dat die den outaer dienen oock des outaers deelachtich sijn.

14

Alsoo heuet die Heere oock gheordineert den ghenen diet euangelie vercondighen, van deuangelie te leuen.

15

⁺Maer ick en heb gheen van desen ghebruyct. Ende ick en heb dese dinghen niet ghescreuen, om dat my alsoo souden ghedaen worden. Want het is my beter te steruen, dan dat iemant mijn glorie soude ydel maken.

+ C

16

Want al eest dat ick het euangelie preke, dat en is my gheen glorie. Want den noot dwingt my daer toe. Want wee my eest dat ick deuangelie niet en preke.

17

Want eest dat ict gheerne doen, soo heb ick loon, maer eest dat ict noode doe, soo is my den dienst betrouwet.

18

Welck is dan mijnen loon? Dat ic Deuangelie prekende, dat doe vrij om niet op dat ick mijn macht niet en misbruycke int euangelie.

19

Want doen ick vrij was van ieghelijcken, soo heb ick my seluen een knecht van allegader ghemaect, om dat icker meer soude winnen.

20

Ende ick ben den Ioden gheworden als een Iode, om dat ick die Ioden soude winnen,

21

den ghenen die onder die wet waren, als oft ick onder die wet ware (daer ick nochtans selue onder die wet niet en was) om dat ick hen die onder die wet waren soude winnen, den ghenen die sonder wet waren, als oft ick sonder wet gheweest hadde (daer ick sonder Godts wet niet en was, maer was in Christus wet) om dat icse winnen soude, die sonder wet waren.

22

⁺Ick ben cranck gheworden den crancken, om dat ick die crancke soude winnen. Eenen ieghelijcken ben ict al gheworden, om dat icse alle salich maken soude.

+ D

23

Ende ick doe alle dinghen om deuangelie op dat ick dies deelachtich mocht worden.

24

+ En weet ghy niet dat die ghene die in die loopplaetse loopen, alle gader voerwaer loopen, maer een ontfanct den prijs? Loopt alsoo dat ghy vercrijghen moecht.

25

Ende alle die in eenen camp strijdt, die onthoudt hem seluen van alle dinghen, ende die doen dat voerwaer om dat sij een verganckelijcke croone souden ontfanghen, maer wy een onuerganckelijcke.

26

Daer om loop ick alsoo, niet als int ontseker, ick strijde alsoo, niet als die locht slaende.

27

Ick castijde mijnen lichaem, ende brenghe dat ondert bedwanck, op dat ick bijauontueren (als ick den anderen ghepreect hebbe) selue niet verworpen en worde.