Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺MAer van die dinghen die den afgoden tot sacrificie gheoffert worden, soo weeten wy dat wy alle die wetenheyt hebben. Die wetenscap maect opgheblasen, maer die liefde sticht.

+ A

2

Maer eest datter iemant meynt dat hi iet weet, die en heeft noch niet bekent hoe dat hy weten moet.

3

Maer eest dat iemant Godt lief heeft, dese is van hem bekent.

4

Maer vanden spijsen die den afgoden ten offer gheslaghen worden, weten wy dat den afgodt niet en is in die werelt, ⁺ende datter niemant Godt en is, dan eenen.

+ B

5

Want al eest datter sommighe sijn die ghenoemt worden goden, tsij inden hemel, tsij opder eerden (Want daer sijn voerwaer veel goden ende veel heeren)

6

maer wy en hebben nochtans maer eenen Godt, den vader, wt den welcken dat alle dinghen sijn, ende wy in hem, ende eenen Heere Iesum Christum, doer wien alle dinghen sijn, ende wy doer hem.

7

Maer in een ieghelijck en is die wetenheyt niet. ⁺Ende die sommighe eten als afgodts offer tot noch toe, met een conscientie vanden afgodt, ende hen conscientie, want sij cranck is, wort ontsuyuert.

+ C

8

Maer die spijse en maect ons Godt niet ghename. Want al eten wy daer om en sal ons niet oueren, noch al en eten wy niet, soo en sullen wy niet min hebben.

9

Maer siet toe, dat bijauontueren dese uwe vrijcheyt gheen arghernisse en worde den crancken.

10

Want eest sake dat iemant siet den ghenen die de wetentheyt heeft, ter tafelen sittende daermen der afgoden offer eet, en sal sijn conscientie (want sij cranck is) niet ghesticht worden om der afgoden offer te eten?

11

⁺Ende die crancke broeder sal verloren gaen doer v wetenheyt, om den welcken Christus ghestoruen is?

+ D

12

Maer ghy alsoo sondighende teghen die broeders, ende slaende hen crancke conscientie, sondicht in Christum.

13

Daer om eest dat die spijse mijnen broeder verarghert, soo en sal ick gheen vleesch eten inder eewicheyt, op dat ick mijnen broedere niet en verarghere.