Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺MAer van die dinghen daer ghy my af ghescreuen hebt. + Het is den mensch goet gheen vrouwe aen te tasten,

+ A

2

maer om der oncuyscheyt wille, soe hebbe een ieghelijck sijn huysvrouwe, ende elcke huysvrouwe hebbe haren man.

3

Der huysvrouwen sal die man die scult betalen, desghelijck oock die huysvrouwe den man.

4

Die vrouwe en heeft haers lichaems gheen macht, maer die man. Desghelijcs oock die man en heeft sijns lichaems gheen macht, maer die vrouwe.

5

En wilt malcanderen niet vercorten, dan bijauontueren wt eendrachtich consent eenen tijt lanck, op dat ghy v moecht verleghen ter bedinghen, ende dan keert weder te samen, op dat v satanas niet en becore, om uwer onghetijdicheyt wille.

6

Maer dit seg ick wt toelaten, niet wten ghebode.

7

Maer ick wil dat alle die menschen waren ghelijck ick selue, Maer een ieghelijck heeft sijn eyghen gaue van Gode, die eene voerwaer aldus, maer die ander alsoo.

8

⁺Maer ick segghe den onghehouden ende den weduwen, het is hen goet eest dat sij alsoo blijuen, ghelijck ick.

+ B

9

Maer eest dat sij hen niet en onthouden, soo laetse houwen. Want tes beter houwen dan bernen.

* 10

Maer den ghenen die inden houwelijcken versaemt sijn, ghebiede, niet ick, maer die Heere, dat die huysvrouwe van haren man niet en sceyde,

11

maer eest dat sij af ghesceyden is, datse onghehouwet blijue, oft met haren man weder versoent worde. Ende de man en verlate sijn huysvrouwe niet.

12

Want den anderen seg ick, niet die Heere. Eest dat eenich broeder een ongheloouighe huysvrouwe heeft, ende dat dese consenteert met hem te woonen dat hy die niet en verlate.

13

Ende soo wat vrouwe eenen ongheloouighen man heeft, ende die consenteert met haer te woonen, dat sij den man niet en verlate.

14

⁺Want die ongheloouighe man is gheheylicht doer den gheloouighe vrouwe, ende die ongheloouighe vrouwe is gheheylicht doer den gheloouighen man. Want anders souden v kinderen onreyn wesen, maer nu sijn sij heylich,

+ C

15

maer eest dat die ongheloouighe wech gaet, soe laet hem wech gaen. Want een broeder oft suster en is tot die slauernie niet verbonden in aldusdanighe dinghen, maer inden vrede heeft ons Godt gheroepen.

16

Want waer wt weet ghy vrouwe oft ghy den man sult salich maken? oft waer wt weet ghy man oft ghi die vrouwe sult salich maken?

17

dan eenen ieghelijcken alsoot die Heere ghedeylt heeft. Alsoo Godt eenen ieghelijcken gheroepen heeft, alsoo wandele hy, ende ghe-

[p. *866]

lijck ick in alle kercken leere.

18

Esser iemant besneden gheroepen? ⁺die en neme gheen onbesnedenheyt aen. Isser iemant in die onbesnedenheyt gheroepen? die en laet hem niet besniden.

+ D

19

Die besnijdenisse en is niet, ende die onbesnedenheyt en is niet, maer dat onderhouden van Gods gheboden.

20

+ Een ieghelijck blijue inden roep daer hy in gheroepen is,

21

Sijdi een slaue gheroepen? en acht dat niet. Maer oock al moechdi vrij worden, soo ghebruyct die knechtscap lieuer.

22

Want die inden Heere gheroepen is een knecht, die is een ghevrijde des Heeren. Desghelijcs wie vrij gheroepen is, die is een knecht Christi.

23

Ghy sijt met eenen Prijs ghecocht, en wilt niet worden der menschen knechten.

24

Een ieghelijck broeder blijue in Gode int ghene daer hy in gheroepen is.

* 25

⁺Ende vanden maechden en heb ick gheen ghebodt des Heeren, maer ick gheue raet, als die bermherticheyt vercreghen hebbe vanden Heere, om dat ick ghetrouwe soude sijn.

+ E

26

Daer om houde ick voerwaer dit goet te wesen om des aenstaenden noots wille, dattet goet is den mensche alsoe te sijne.

27

Sijt ghy verbonden met eender huysvrouwen? en wilt gheen ontbindinghe soecken. Sijt ghy onghebonden van een huysvrouwe? en wilt gheen huysvrouwe soecken.

28

Maer eest dat ghy een huysvrouwe neemt, soe en hebdi niet ghesondicht. Ende eest dat een maghet houwet, soo en heeft sij niet ghesondicht. Maer nochtans sullen alsulcke tverdriet des vleechs hebben. Maer ick spare v lieden.

29

Aldus dit seg ick v lieden broeders, den tijt is cort, van nu voert aen eest tijt, dat oock die ghene die huysvrouwen hebben sijn sullen als gheen hebbende,

30

⁺ende die weenen als niet weenende, ende die blijde sijn, als niet blijde sijnde, ende die coopen, als niet besittende,

+ F

31

ende die dese werelt ghebruycken, als oft sij die niet en ghebruycten. Want dat wesen van deser werelt gaet voerbi.

32

Maer ick wille dat ghi sonder sorchuuldicheyt sult wesen. Die sonder huysvrouwe is, die is besorgt voer tghene dat den Heere aengaet, hoe dat hy Gode behaghen mach.

33

Maer die met een huysvrouwe is die is besorgt met die dinghen die der werelt aengaen, hoe dat hy sijnder huysvrouwen behaghen mocht, ende hy is ghedeelt.

34

Ende een onghehoude vrouwe, ende een maecht die denct tghene dat den Heere aengaet, dat sij mocht heylich sijn aen lichaem ende aen gheest. Maer die ghehouwet is die peyst op die dinghen die der werelt aengaen, hoe sij haren man mocht behaghen.

35

Maer dit segghe ick tot v lieden profijt, niet om dat ick v eenen strick aenwerpen soude, ⁺maer dat ick v vermanen soude tot dat ghene dat eersaem is, ende dat vrijcheyt gheeft den Heere sonder letsel te dienen.

+ G

36

Maer eest sake dat iemanden duncket, dattet hem scande scijnt te sijne van sijnder maghet om dat sij ouer haer iaren ghecomen is, ende dattet soo moet wesen, soo doe hy dat hy wilt, sij en sondicht niet eest dat sij houwet.

37

Want die in sijn herte ghestelt heeft vaste, gheenen noot hebbende, maer macht hebbende van sijnen wille, ende dat hy dit goet gheordeelt heeft in sijn herte, sijn maghet te behouden, die doet wel.

38

Aldus die sijn maghet ten houwelijcken bestelt, die doet wel, ende diese niet en bestelt die doet beter.

39

Een vrouwe is aen die wet ghebonden, soo langhe als haer man leeft, maer eest dat haer man ontslapen is, soo is sij vrij gheworden, sij trouwe den welcken sij wilt, alleenlijck inden Heere.

40

Maer sij sal saligher sijn, eest dat sij alsoo blijft, nae mijnen raet. Ick houde voerwaer dat ick oock den gheest Godts hebbe.