Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DErret iemant van v lieden hebbende een sake teghen eenen anderen hem laten vonnissen by die ongherechtighe, ende niet by die heylighe.

+ A

2

En weet ghy niet dat die heylighe van die werelt ordeelen sullen? Ende eest dat doer v lieden die werelt sal gheordeelt worden, sijt ghy dan onweerdich die van die minste saken soudt ordeelen?

3

En weet ghy niet dat wy die enghelen sullen ordeelen? Hoe veel te meer weerlijcke saken?

4

Daer om eest dat ghy weerlijcke saken hebt te ordeelen, die alder versmaetste die in die kercke sijn die stelt om te ordeelen.

5

Tot uwer scanden seg ick dit. En isser niemant onder v alsoo wijs die soude moghen vonnissen tusschen sijnen broeder?

6

Maer dinghet den eenen broeder metten anderen broeder int recht ende dat by die ongheloouighe?

7

⁺Nu esser voerwaer in alder manieren een misdaet onder v lieden dat ghy onder malcanderen te rechte gaet. Waer om en lijt ghi niet lieuer onrecht? Waer om en verdraechdi niet lieuer onghelijck?

+ B

8

Maer ghy doet onrecht ende veronghelijct, ende dat den broeders.

9

+ En weet ghy niet dat die ongherechtighe dat rijck Godts niet besitten en sullen? En wilt niet dolen. Noch oncuyssche menschen, noch afgoden dienende, noch ouerspeelders,

10

noch onnatuerlijcke oncuyscheyt bedrijuende, noch Sodomie doende, noch dieuen, noch ghierighe, noch dronckaerts, noch lasteraers, noch roouers, en sullen dat rijck Godts besitten.

11

Ende aldusdanighe hebdy voerwaer gheweest, maer ghy sijt afghewasschen, maer ghy sijt gheheylicht, maer ghy sijt gherechtuerdicht, inden naem ons Heeren Iesu Christi, ende in den gheest ons Gods.

* 12

+ ⁺Alle dinghen sijn my gheorlooft, waer alle dinghen en sijn niet orberlijck. Alle dinghen sijn my gheorlooft, maer ick en sal onder niemants macht ghebracht worden.

+ C

13

Die spijse behoort den buyck toe, ende den buyck der spijsen. Maer Godt sal desen ende die verderuen. Ende het lichaem en behoirt der oncuyscheyt niet, maer den Heere, ende die Heere den lichaeme.

14

Maer Godt heeft oock den Heere verwect, ende hi sal ons verwecken doer sijn cracht.

15

En weet ghy lieden niet dat v lichamen Christus leden sijn? Sal ick dan nemende Christus leden, ⁺die maken leden van eender hoeren? Dat sij verre.

+ D

16

En weet ghy niet, dat die ghene die eender ghemeynder vrouwen aenhanct met haer een lichaem wort? Want sij twee (seyt hy) sullen in een vleesch sijn.

17

Maer die den Heere aenhanct, die is eenen gheest.

* 18

Vliedt die oncuyscheyt. Alle sonde die een mensche doet die is buyten dlichaem, maer die oncuyscheyt bedrijft die sondicht in sijn lichaem.

19

En weet ghy niet dat v leden eenen tempel sijn des heylichs gheests, die in v is, den welcken ghy van Gode hebt, ende en sijt v selfs niet?

20

Want ghy sijt ghecocht met eenen grooten prijs, eert ende draecht Godt in v lichaem.