Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺OVer al wort onder v lieden ghehoort oncuyscheyt ende sulcke oncuyscheyt, als oock onder die heydenen niet en is, alsoo datter een sijns vaders huysvrouwe hebben soude.

+ A

2

Ende ghy sijt opgheblasen, ende en hebt niet meer rouwe ghehadt, op dat hy wt het midden van v lieden soude wechghedaen worden, die dat werck ghedaen heeft.

3

Ic voerwaer van v versceyden metten lichaem, maer tegenwoerdich metten gheest, ⁺heb nu gheordeelt als teghenwoerdich, den ghenen die alsoe ghedaen heeft,

+ B

4

inden naem ons Heeren Iesu Christi, v lieden tsamen vergadert sijnde met mijnen gheest, met die cracht ons heeren Iesu,

5

alsulcken ouer te leueren satane tot verderfenisse des vleesch, op dat den gheest behouden sij inden dach ons Heeren Iesu Christi.

6

V gloriatie en is niet

[p. *865]

goet. En weet ghy niet dat een luttel heue dat heel deech versuert.?

+ 7

Suyuert reyn wt den oude heue, op dat ghi moecht wesen een nieuwe beslach, alsoe ghy ongheheeft sijt. Want Christus ons Paeschlam is ten offer gheslaghen.

8

Hier om laet ons feeste houden niet inden ouden heue, noch in den heue der quaetheyt, ende der archeyt, ⁺maer in die in die ongheheefde brooden der puerheyt, ende der waerheyt.

+ C

* 9

Ick heb v lieden ghescreuen in eenen brief. En houdt gheen ghemeynscap metten oncuysschen menschen,

10

niet voerwaer metten oncuysschen van deser werelt, oft metten ghierighen, oft roouers, oft den afgoden dienende, want anders haddi moeten wt deser werelt gaen.

11

Maer nu heb ick v ghescreuen gheen ghemeynscap te hebben, eest dat sulck die een broeder ghenoemt wort, ⁺een oncuysch mensch is, oft ghierich, oft den afgoden dienende, oft een lasteraer, oft een dronckaert, oft een roouer, met alsulcken en suldi oock gheen spijse nemen.

+ D

12

Want wat gaet my aen te ordeelen vanden ghenen die buyten sijn? En ordeelt ghy niet van die ghene die binnen sijn?

13

Want die ghene die buyten sijn, sal Godt ordeelen. Neemt den quaden wech wt v seluen.