Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

+ 1

⁺ALsoo sal ons een mensch houden als Christus dienaers, ende bedienders van Gods verholentheden.

+ A

2

Hier wort nu ghesocht onder die bedienders datter iemant ghetrouwe mach gheuonden worden.

3

Maer tes my voer dminste dat ick van v lieden gheordeelt worde oft van den menschelijcken daghe. Maer ic en ordeele my selue ooc niet.

4

Want ic en ken my seluen niet besculdich, maer nochtans daer doer en ben ic niet gherechtuerdicht, maer die my ordeelt dats Godt.

5

Daer om en wilt voer den tijt niet ordeelen, tot dat die Heere coemt die ooc verlichten sal die verborghentheden der duysternisse, ende openbaren die raden der herten, ende dan sal eenen ieghelijcken lof sijn van Gode.

* 6

⁺Maer dese dinghen broeders heb ic by een ghelijckenisse bediet op mi ende Apollo, om uwen wille, op dat ghi in ons soudt leeren dat die eene (meer dant voerscreuen is) teghen den andere niet opgheblasen en worde, om eens anders wille.

+ B

7

Want wie ondersceydt v? Ende wat hebdi dat ghy niet ontfanghen en hebt? Ende eest dat ghijt ontfanghen hebt, waer om glorieerdi, als oft ghijt niet ontfanghen en hadt?

8

Ghy sijt nu versaedt gheworden, ghy sijt nu rijck gheworden, sonder ons regneert ghy, ende och oft ghy regneerdet, op dat wy oock met v lieden mochten regneren.

9

Want ick meyne voerwaer dat Godt ons die alderleste Apostelen ghetoont heeft als die der doot toeghescict sijn. Wat wij sijn een toonsel gheworden der werelt, ⁺ende den enghelen, ende den menschen.

+ C

10

Wy sijn dwaes om Christus wille, maer ghy sijt voersienich in Christo. Wy sijn cranck, maer ghy sijt sterck, ghy sijt edel, maer wy onedel.

11

Tot op dese vre toe sijn wy oock hongherich ende dorstich ende maect, ende wy worden met halslaghen gheslaghen, ende sijn sonder seker stede,

12

ende wy arbeyden werkende met onsen handen, wy worden vermalendijt, ende wy ghebenediden, wy lijden veruolghinghe, ende wy verdraghent.

13

Wy worden ghelastert, ende wy bidden. Als vuylnisse van deser werelt sijn wi gheworden alder menschen verworpsel tot noch toe,

14

Dit en scrijf ick v niet om dat ick v lieden beschamen soude, maer als mijn alderliefste kinderen vermane ick v lieden,

15

want al hebdy thien duysent leermeesters in Christo, ⁺maer ghy en hebt niet veel vaders, want in Christo Iesu heb ic v lieden door deuangelie voort ghebracht

+ D

16

Daerom bidde ick v weest mijn naeuolghers,

17

Daerom heb ick tot v lieden ghesonden Timotheum die mijn alderliefste sone is, ende ghetrou inden Heere, die welcke v vermanen sal, mijn weghen die in Christo Iesu sijn, ghelijck ick tot alle plaetsen in alle kercken leere.

18

Als oft ick tot v niet comen en soude, alsoo sijnder sommighe opgheblasen.

19

Maer ick sal tot v lieden comen corts, eest dat die Heere wilt, ende ick sal kennisse nemen niet van die woorden der gheender die opgheblasen sijn, maer vander cracht.

20

Want het rijck Godts en is in die woorden niet, maer in die cracht.

21

Wat wildi? dat ic metter roeden tot v lieden come, oft metter liefden, ende metten gheest der saechtmoedicheyt?