Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .ij. Capittel.

1

⁺ENde doen ic tot v lieden quam broeders, soe ben ick ghecomen niet in hoocheyt van sprake, oft wijsheyt, vercondighende v lieden dat ghetuyghenisse Christi.

+ A

2

Want ic en heb my niet wtghegheuen iet te weten onder v lieden, dan Iesum Christum, ende dien ghecruyst.

3

Ende ick heb oock in veel crancheyt ende vreese, ende anxt, by v lieden gheweest,

4

ende mijn sprake, ende mijn predicatie en is niet gheweest in beweechlijcke woerden der menschelijcker wijsheyt, maer int vertoonen des gheests ende der cracht,

5

⁺op dat v ghelooue niet en sij in der menschen wijsheyt, maer in die cracht Gods.

+ B

6

Maer die wijsheyt spreken wy onder die volmaecte. Maer niet die wijsheyt deser werelt, oft der princen van deser werelt, die te niet ghedaen worden,

7

maer wy spreken Gods wijsheyt in verholentheden, die verborghen is, die welcke Godt te voren bescict heeft voer die euwe tot onser glorien,

8

die welcke niemant van die princen deser werelt ghekent en heeft. Want hadden sij die bekent sij en souden nemmermeer den Heere der glorien ghecruyst hebben.

9

Maer alsoo daer ghescreuen is. Dat gheen ooghe ghesien en heeft, noch oore ghehoort, noch in des menschen herte niet opcomen en is, ⁺tghene dat die Heere bereyt heeft den ghenen die hem lief hebben,

+ C

10

maer ons heuet Godt gheopenbaert doer sijnen gheest. Want den gheest ondersoect alle dinghen, oock die diepten Godts.

11

Want wie mensch weet wat inden mensch is, dan den gheest vanden mensch die in hem is, alsoe oock dat Gode aengaet en weet niemant dan den gheest Gods.

12

Maer wy en hebben den gheest van deser werelt niet ontfanghen, maer den gheest die wt Godt is, op dat wy weten souden wat dinghen ons van Gode ghegheuen sijn,

13

die welcke wy oock spreken, niet in gheleerde woerden der menschelijcker wijsheyt, maer in die leeringhe des gheests, ⁺gheestelijcke dinghen by gheestelijcke ghelijckende.

+ D

14

Want die vleeschelijcke mensch en begrijpt die dinghen niet die den gheest Gods aengaen. Want het is hem dwaesheyt, ende hy en can die niet verstaen. Want die worden doer den gheest ondersocht.

15

Maer een gheestelijck mensch ordeelt alle dinghen, ende hy en wort van niemanden gheordeelt.

16

Want wie heeft des Heeren sin ghekent die hem leeren mocht? Maer wy hebben Christus sin.