Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺PAVLVS een gheroepen Apostel Iesu Christi, doer den wille Godts, ende Sosthenes een broeder,

+ A

2

der kerken Gods die te Corinthen is, den gheheylichden in Christo Iesu, den gheroepenen heyleghen, met allen den ghenen die den naem ons Heeren Iesu Christi aenroepen, in alle hare ende onse plaetsen.

3

Gratie sij v lieden ende vreede van Gode onsen vader, ende den Heere Iesu Christo.

+ 4

Ick dancke mijnen Godt altijt voer v, in die gratie Gods die v lieden ghegheuen is in Christo Iesu,

5

dat ghy in alles rijck gheworden sijt in hem, in alderley woerden ende in alle wetenheyt

6

(ghelijck dat ghetuyghenis Christi in v lieden gheuesticht is,)

7

alsoe dat v niet en ghebreect in eenighe gratie, verwachtende die openbaringhe ons Heeren Iesu Christi,

8

die welcke v lieden oock sal vestighen totten eynde onstraffelijck tot inden dach der toecoemsten ons Heeren Iesu Christi.

* 9

⁺Godt is ghetrouwe, doer den welcken ghy gheroepen sijt int gheselscap sijns soens Iesu Christi ons Heeren.

+ B

10

Maer ick bidde v broeders doer den naem ons Heeren Iesu Christi, dat ghy allegader eendrachtelijck spreket, ende dat ghy niet en laet tweedrachticheden tusschen v sijn, maer weest volmaect in eenen sin, ende in een wetenheyt.

11

Want my is te kennen ghegheuen van v lieden mijn broeders doer die ghene die te Chloes sijn, datter twisten onder v lieden sijn.

12

Ende dat segghe ick, om dat een ieghelijck van v lieden seyt, Ick ben voerwaer Pauwels discipel. Maer ic Apollos. Maer ick Cephe, Maer ick Christi.

13

Es Christus ghedeelt? Es Paulus voer v lieden ghecruyst? oft sijdi in Pauwels naem ghedoopt?

14

Ick dancke Gode dat ick niemanden van v lieden ghedoopt en hebbe, dan Crispum ende Caium,

15

op dat niemant en segghe dat ghy in mijnen naem ghedoopt sijt.

16

Oock hebbe ick ghedoopt thuysghesin van Stephane. Voerts meer en weet ick niet oft ick iemant anders ghedoopt hebbe.

17

⁺Want Christus en heeft my niet ghesonden om te doopen, maer om het euangelie te preken, niet doer wijsheyt des woerts, op dat het cruys Christi niet verydelt en worde.

+ C

18

Want het woert des cruyces is den ghenen die verloren gaen een dwaesheyt, maer den ghenen die behouden worden, dat is ons, eest die cracht Gods.

19

Want daer is ghescreuen. Ick sal te niet doen die wijsheyt der wijsen, ende die voersienicheyt der voersienigher sal ick verworpen,

20

Waer is die wijse? Waer is die scribe? Waer is die ondersoecker deser werelt? En heeft Godt die wijsheyt deser werelt niet dwaes ghemaect?

21

Want om dat die werelt in Godts wijsheyt Godt niet ghekent en heeft doer haer wijsheyt, soe heuet Gode behaecht doer die dwaesheyt der predicatien die gheloouende salich te maken.

22

Want die Ioden begheren mirakelen, ende die Grieken soecken wijsheyt,

23

maer wy preken den ghecruysten Christum den Ioden voerwaer een arghernisse, ende den Grieken een dwaesheyt,

24

maer den gheroepen Ioden ende Grieken preken wy Christum Godts cracht ende Gods wijsheyt.

25

⁺Want die goddelijcke onwijsheyt is wijser dan die menschen, ende Godts crancheyt is stercker dan die menschen.

+ D

+ 26

Want broeders besiet uwen roep, hoe datter niet veel wijse naden vleesch, niet veel machtighe, niet veel edele gheroepen en sijn.

27

Maer die dwaes sijn voer die werelt die heeft Godt vercoren, op dat hy die wijse bescamen soude ende die crancke der werelt heeft Godt vercoren, om dat hy die stercke bescamen soude,

28

ende die onedele der werelt ende die versmaedde heeft Godt vercoren, ende datter niet en is, op dat hy tghene dat wat is te niet doen soude.

29

Om dat gheen vleesch glorieren en soude voer sijn aensicht.

30

Wt den welcken sijt ghy in Christo Iesu, die ons gheworden is tot wijsheyt van Gode, ende tot rechtuerdicheyt, ende heylichmakinghe, ende verlossinghe,

31

op dat (ghelijck daer ghescreuen is) Soe wie glorieert inden Heere glorieren soude.