Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺DEn crancken int ghelooue neemt tot v, niet met werringhen der ghedachten.

+ A

2

Want die eene ghelooft dat hi alle dinghen eten mach, maer die cranck is die ete moes.

3

Die ghene die eet, en versmade niet den ghenen die niet en eet, ende die niet en eet, en verordeele niet den ghenen die eet. Want Godt heeft hem opghenomen.

4

Wie sijt ghy die eens anders knecht ordeelt? Hy staet oft valt sijnen heere ende hy sal staen. Want Godt is machtich hem op te rechten.

5

Want die eene ordeelt tusschen den eenen dach ende den anderen dach, maer die andere ordeelt elcken dach. Laet eenen ieghelijck sijnen sin daer in volghen.

6

Die den dach acht die acht dien den Heere. Ende die eet, die eet den Heere. Want hy danct Gode. Ende die niet en eet, die en eet niet den Heere, ⁺ende hy danct Gode.

+ B

7

Want niemant van ons en leeft sij seluen, ende niemant en sterft sij seluen.

8

Want tsij oft wy leuen, soe leuen wy den Heere, tsij oft wy steruen, soe steruen wy den Heere. Daer om tsij oft wy leven, oft steruen, wy behooren den Heere toe.

9

Want daer om is Christus ghestoruen ende verresen, om dat hy ouer die leuende ende doode heerscappie hebben soude.

10

Maer waer om ordeelde ghy uwen broedere? Oft ghi waer om versmaeddi uwen broedere? Want wy sullen alle staen voer Christus rechterstoel.

11

Want daer is ghescreuen. Ick leue seyt die Heere, Want my sullen alle knien gheboocht worden, ende alle tonghen sullen Gode belijden.

12

Aldus sal een ieghelijck van ons lieden voer sij seluen Gode reden gheuen.

13

⁺Daer om en laet ons voerts malcanderen niet meer verordeelen, maer ordeelt dat meer, dat ghy uwen broeder gheen struycksele oft arghernisse en stelt.

+ C

14

Ick weet ende betrouwe inden Heere Iesu datter niet ghemeyn en is van sij seluen, dan den ghenen die iet ghemeyn acht te sijne, dien eest ghemeyn.

15

Want eest dat v broeder om die spijse bedroeft wort, soe en wandelt ghy nu voerts nae die liefde niet. En wilt hem met uwer spijsen niet verliesen om den welcken Christus ghestoruen is.

16

Daer om en laet ons goet niet gheblameert worden.

17

Want het rijck Godts en is noch spijse noch dranck, maer rechtuerdicheyt, ende vrede, ende blijscap inden heylighen gheest.

18

Want wie daer om Christo dient, ⁺die behaecht Gode, ende hy is vanden menschen ghepresen.

+ D

19

Daer om laet ons volghen dat ghene dat totten vrede dient, ende laet ons malcanderen bewaren, dat tot ghestichticheyt dient.

20

En wilt om die spijse Godts werck niet bederuen. Alle dinghen sijn voerwaer reyn, maer tis quaet den mensche diet met verargernisse eet.

21

Tes goet gheen vleesch teten ende gheenen wijn drincken, nocht tghene daer v broeder hem aen stoot, oft daer hy af verargert wort, oft cranck wort.

22

Hebt ghy tghelooue? Hebt dat by v seluen, voer Gode. Salich is hy die sij seluen niet en ordeelt int ghene dat hy prijst.

23

Maer die ghene die ondersceyt, eest dat hijt eet, soe is hy verdoemt, want hy dat niet wten ghelooue en etet. Ende alle dat wten ghelooue niet en is, dat is sonde.