Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xiij. Capittel.

[p. *861]

1

⁺ALle ziele sij den ouersten machten onderdanich. Want daer en is gheen macht dan van Godt. Ende soe watter is, dat is van Gode ghescict.

+ A

2

Daerom die der macht wederstaet die wederstaet gods ordinancie. Ende die wederstaen die crijghen hen seluen die verdoemenisse.

3

Want die ouerste en sijn niet tot vreese den goeden wercke, maer den quade. Maer wilt ghy die macht niet vreesen? Doet goet, ende ghy sult lof van haer hebben.

4

Want sij is Godts dienaer, v ten goede. Maer eest dat ghy quaet doet, soe vreest, want sij en draecht sonder sake dat sweert niet. Want sij is Gods dienaer, ⁺een wreker ter gramscappen, den ghenen die quaet doet.

+ B

5

Daer om weest onderdanich van noots weghen, niet alleen om die gramscap, maer oock om die conscientie.

6

Want daer om gheeft ghi oock tribuyten, want sij sijn Gods dienaers, tot dat selue dienende.

7

Daer om betaelt eenen ieghelijcken dat ghi sculdich sijt. Wien ghi tribuyt sculdich sijt, dien gheeft tribuyt. Wien tol, gheeft tol, wien vreese, gheeft vreese, wien eere, gheeft eere.

+ 8

En weest niemanden iet sculdich, ⁺dan dat ghy malcanderen lief hebbet. Want die sijnen naesten bemint, die heeft die wet volbracht.

+ C

9

Want, ghy en sult gheen ouerspel doen. Ghi en sult niet dootslaen. Ghy en sult niet stelen. Ghy en sult gheen valsch ghetuyghenis gheuen. Ghy en sult niet begheren, ende so wat ander ghebodt datter meer is, dat wort in dit woert begrepen. Ghi sult uwen naesten lief hebben ghelijk v seluen.

10

Die liefde des naesten en doet gheen quaet. Daer om die veruullinghe des wets is die liefde.

* + 11

Ende sonderlinghe wetende den tijt, Dattet nu die vre is vanden slaep op te staen. Want nu is onse salicheyt naerder, dan doen wy ierst gheloofden.

12

⁺Den nacht is voerghegaen ende den den dach is aenghecomen. Daer om laet wech worpen die wercken der duysterheyt, ende aendoen die wapenen des lichts.

+ D

13

Laet ons als inden dach eerbaerlijck wandelen, niet in brasserien ende dronckenscappen, niet in slaepcameren ende oneerbaerheden, niet in kijuagien ende nijdicheden.

14

Maer doet aen den Heere Iesum Christum. * Ende dat vleesch en besorgt niet nae die wellusticheden.