Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

+ 1

⁺HIer om bidde ick v lieden broeders doer die bermherticheyt Godts, dat ghy v lichamen wilt gheuen tot een leuende heylighe, ende Godt behaghende offerande, dat welcke is uwen redelijcke Gods dienst.

+ A

2

Ende en wilt niet ghelijck worden deser werelt, maer wert verandert in die nieuwicheyt ws sins, om dat ghy beproeuen moecht welc dat Gods goeden ende behaghelijkcken ende volmaecten wille is.

3

Want ick segghe doer die gratie die my ghegheuen is allen den ghenen die onder v lieden sijn, dat hy niet meer van sij seluen en houde dant en betaemt, maer dat hy van sij selue houde matelijck, eenen ieghelijck, alsoe hem Godt ghedeelt heeft des gheloofs mate.

4

⁺Want ghelijck wy in eenen lichame veel leden hebben, ende die leden en hebben alle tselue werck niet,

+ B

5

alsoe sijn wij vele een lichaem in Christo, ende elck besonder die een des anders ledt.

* 6

+ Ende hebbende versceyden gauen nae die gratie die ons ghegheuen is,

7

tsij prophetie, nae die mate des gheloofs, oft dienst int dienen, tsij dat hy leert, in die leeringhe,

8

die vermaent int vermanen, die gheest in simpelheyt. Die ouerste is, in sorchfuldicheyt, die ontfermherticheyt doet, in vrolijcheyt.

9

Liefde sonder gheueynstheyt. Hatende tquaet ende den goede aenhanghende.

10

Met liefde des broederscaps malcanderen lief hebbende. ⁺Met eerbiedinghe malcanderen voercomende.

+ C

11

Met sorchuoldicheyt niet traech. Metten gheest vierich. Den Heere dienende.

12

Doer die hope blijde. In tribulacie verduldich. Int bidden naerstich,

13

Der heylighen nooden te helpe comende, Gheerne herberghende.

14

Ghebendijtse die v veruolghen, Ghebenedijt, ende en wilt niet vermalendijden.

15

Verblijt v met den blijden, Weent metten weenenden,

16

Een gheuoelen met malcanderen hebbende, Gheen hooch gheuoelen hebbende, maer metten oetmoedighen een ghevuelen hebbende. + En wilt niet wijs sijn by v seluen.

17

Niemanden quaet voer quaet loonende, Besorghende goede dinghen, ⁺niet alleen voer Godt, maer oock voer alle menschen.

+ D

18

Eest dat wesen mach, soe verre alst in v lieden is met allen menschen vrede hebbende.

19

Niet v seluen wrekende mijn alderliefste, maer wijct der gramscap. Want daer is ghescreuen, Gheeft my die wrake, ende ick salt loonen seyt die Heere,

20

Maer eest dat v viant hongher heeft, soe spijst hem, eest dat hy dorst heeft, soe gheeft hem te drincken. Want dit doende suldi vierighe colen vergaderen op sijn hooft.

21

En wilt v niet laten verwinnen van tquaet, maer verwint het quaet doer goet.