Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ALdus segghe ic, Heeft Godt sijn volck verstooten? Dat sij verre. Want ick ben oock een Israelijt wt Abrahams sade van Beniamins gheslachte.

+ A

2

Godt en heeft sijn volck niet verstooten, dat hy voer ghekent heeft. Oft en weeti niet wat die scriftuere seyt van Elias, Hoe dat hy Godt verwect teghen Israel?

3

Heere v propheten hebben sy ghedoot, v outaren hebben sij omghegrauen ende ick ben alleen ouerghebleuen, ende sij soecken mijn ziele.

4

Maer wat seyt hem die goddelijcke antwoerde? Ick heb voer my ghelaten seuen duysent mannen, die hen knien niet gheboocht en hebben voer Baal.

5

Alsoe eest oock in desen tijt. Die bleuelinghen nae die verkiesinghe der gratien sijn salich gheworden.

6

Eest dan wt gratien, soe en eest nu wt die wercken niet. Oft anders en is die gratie nu gheen gratie.

7

Hoe eest dan? Dat Israel ghesocht heeft, dat en heeft hy

[p. *860]

niet vercreghen, maer die verkiesinghe heuet vercreghen, maer die andere sijn blint ghemaect,

8

also daer ghescreuen is, Godt heeft hen ghegheuen eenen nopende gheest, ooghen dat sij niet sien en souden, ende ooren datse niet hooren en souden, tot op den dach van heden toe.

9

⁺Ende Dauid seyt, Laet hen tafel worden tot eenen strick, ende tot een gheuanghenisse, ende tot een verarghernisse, ende tot een vergheldinghe hen lieden.

+ B

10

Laet hen ooghen verduystert worden dat sij niet en sien, ende haren rugghe maect altijt crom.

11

Daer om segt ick, Hebben sij alsoe ghestruyckelt, dat sij vallen souden? Dat sij verre. Maer wt hen misdaet, is den heydenen salicheyt ghesciet dat sij hen souden nauolghen.

12

Als dan hen misdaet der werelt rijcdom is, ende hen verminderinghe, den rijcdom der heydenen. Hoe veel te meer hen volheyt?

13

Want ick seg v lieden ghy heydenen, Alsoe langhe als ick voerwaer ben der heydenen Apostel, soe sal ic mijnen dienst eerlijck maken,

14

oft ick in eenigher manieren mijn vleesch mocht verwecken tot nauolghinghe, ende dat icker sommighe van dien mocht salich maken.

15

Want eest sake dat het verlies van hen lieden een versoeninghe der wereld is, hoedanich sal die aenneminghe sijn, anders dan het leuen van die dooden?

16

Ende eest dat het beproefsel heylich is, soo is den clont oock heylich. ⁺Ende is die wortele heylich, soe sijn die tacken oock heylich.

+ C

17

Maer eest datter sommighe vanden tacken ghebroken sijn, ende dat ghy als ghy eenen wilden olijfboom waert, daer in ghegreffijt sijt ende sijt deelachtich gheworden van die wortele ende vetticheyt des olijfbooms,

18

en wilt niet glorieeren teghen die tacken. Eest dan dat ghy glorieert, ghy en draecht die wortele niet, maer die wortel v.

19

Ghy segt dan. Die tacken sijn ghebroken om dat ick daer in soude ghegreffijt worden.

20

Wel, om die ongheloouicheyt sijn sij ghebroken, maer ghy staet door tghelooue, en wilt gheen hooch gheuoelen hebben, maer vreest.

21

Want eest dat Godt den natuerlijck tacken niet ghespaert en heeft, dat hy bijauontueren v oock niet en spaere.

22

Daer om siet aen die goetheyt ende die strengicheyt Godts, te weten in die ghene die gheuallen sijn die strengicheyt, ende in v, die goetheyt Gods, eest dat ghy blijft in die goetheyt, want anders suldi oock wtghehouden worden.

23

Maer oock eest dat die andere niet en blijuen in die ongheloouicheyt, soe sullen sij weder om daer in ghegreffijt worden. Want Godt is machtich hen weder om in te greffien.

24

⁺Want eest dat ghy wt eenennatuerlijcken wilden olijfboom ghesneden sijt, ende teghen natuere ghegreffijt sijt in eenen goeden olijfboom. Hoe veel te meer sullen sij (die nader natueren sijn) ghegreffijt worden in haren eyghen olijfboom?

+ D

25

+ Want broeders ick en wil niet dat ghy onwetende sijt deser verborghentheyt (op dat ghy niet en sijt by v seluen wijs) dat die blentheyt eens deels ghesciet is in Israel, tot dat die volheyt der heydenen incomen soude,

26

ende dat also gheheel Israel soude salich worden. Alsoe daer ghescreuen is, Hy sal comen wt Sion, die afnemen sal ende afkeeren die ongoddelijcheyt van Iacob.

27

Ende dit sal hen testament sijn van my, als ick hen sonden sal wech ghenomen hebben.

28

Nae deuangelie sijn sij voerwaer vianden om v lieder wille, maer nae die verkiesinghe sijn sij dalderlieftste om die vaderen.

29

Want die gauen ende den roep Godts sijn sonder berouwen.

30

Want ghelijck ghi lieden somtijts oock Gode niet ghelooft en hebt, maer hebt nu bermherticheyt vercreghen om hen ongheloouicheyt.

31

Alsoe en hebben dese nu oock niet ghelooft in uwe bermherticheyt op dat sij oock souden bermherticheyt vercrijghen.

32

Want Godt heuet alle besloten in die ongheloouicheyt, om dat hy haerder alle ontfermen soude.

* 33

O diepte der rijcdommen van die wijsheyt ende wetentheyt Gods, hoe ombegrijpelijck sijn zijn ordeelen, ende hoe ombesporich sijn zijn weghen?

34

Want wie heeft den sin des Heeren ghekent? Oft wie heeft sijn raetsman gheweest?

35

Oft wie heeft hem ierst iet ghegheuen, ende datment hen wederom loonen sal?

36

Want wt hem ende doer hem, ende in hem sijn alle dinghen, hem sij glorie inder eewicheyt. Amen.