Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺BRoeders voerwaer den wille mijns herten, ende tghebedt tot Godt ghesciet voer hen ter salicheyt.

+ A

2

Want ick gheue hen ghetuyghenis, dat sij een vierighe begheerte hebben Godt nae te volghen, maer niet nae die wetenheyt.

3

Want sij niet wetende Gods rechtuerdicheyt, ende willende hen eyghen rechtuerdicheyt oprechten, en sijn der rechtuerdicheyt Godts niet onderdanich.

4

Want het eynde der wet is Christus, ter salicheyt alle den ghenen die gheloouen.

5

Want Moyses heeft ghescreuen, soe wat mensch die rechtuerdicheyt doet die wter wet is, die sal daer in leuen.

6

Maer die rechtuerdicheyt die wten ghelooue is die seyt aldus, En segt in v herte niet. Wie sal in den hemel climmen? Dat is Christum van bouen afbrenghen.

7

Oft wie sal nederdalen inden afgroont? ⁺dat is Christum van die dooden weder roepen.

+ B

8

Maer wat seyt die scriftuere? By is dat woert in uwen mont, ende in v herte dat is dwoert des gheloofs dat wy vercondighen.

+ 9

Want eest sake dat ghy belijdt in uwen mont den Heere Iesum, ende in v herte ghelooft dat Godt hem vanden dooden verwect heeft, soe suldi salich worden.

10

Want metter herten ghelooftmen ter rechtuerdicheyt, maer metten monde wort die belijdinghe ghedaen ter salicheyt.

11

Want die scriftuere seyt, Alle die in hem ghelooft die en sal niet bescaemt worden.

12

Want daer en is gheen ondersceyt tusschen den Ioden ende Griecken. Want tis een Heere van allegader, ⁺rijck ouer alle die ghene die hem aenroepen.

+ C

13

Want alle die den naem des Heeren aenroept, sal salich wesen.

14

Hoe sullen sij dan aenroepen den ghenen daer sij niet in ghelooft en hebben? Oft hoe sullen sij hem gheloouen dien sij niet ghehoort en hebben? Ende hoe sullen sijt hooren, sonder predicant?

15

Ende hoe sullen sij preken, ten sij dat sij ghesonden worden? alsoe dat ghescreuen is, Hoe schoon sijn die voeten der gheender die den vrede vercondighen, die goede dinghen vercondighen.

16

Maer sij en sijn alle der Euangelien niet ghehoorsaem. Want Isaias seyt, Heere wie heeft onsen ghehoore ghelooft?

17

⁺Daer om is het ghelooue wt den ghehoore, ende dat ghehoor doer dwoert Christi.

+ D

18

Maer ick segghe. En hebben sijt niet ghehoort? Ende voerwaer hen gheluyt is wtghegaen tot allen landen, ende hen woerden tot die eynden vanden omganck der eerden.

* 19

Maer ick segghe, En heuet Israel niet bekent? Moyses heeft ierst gheseyt, Ick sal v tot doer een volck dat gheen volck en is brenghen tot nydighe achteruolghinghe, doer een onwijs volck sal ick v brenghen tot verstoornissen.

20

Isaias is oock cloeck ende seyt, Ick ben gheuonden van die ghene die my niet en soecken, ick heb my openbaerlijck vertoont den ghenen die nae my niet en vraechden.

21

Ende tot Israel seyt hy, Den gheheelen dach heb ick mijn handen wtghereyct tot dat volck dat niet en ghelooft, ende teghen my spreect.