Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .ix. Capittel.

1

⁺ICk segghe die waerheyt in Christo ick en lieghe niet, mijn conscientie my ghetuyghenis gheuende in den heylighen gheest,

+ A

2

dat ic een groote droefheyt hebbe, ende eenen ghestadighen rouwe mijnder herten.

3

Want ic wenschte selue verbannen te sijne van Christo, voer mijn broederen, die mijn maghen sijn nae den vleesche

4

welck sijn die Israeliten, den welcken toebehoort die verkiesinghe der kinderen, ende die glorie, ende dat testament, ende dat gheuen der wet, ende den Gods dienst ende die beloften,

5

der welcker vaderen sijn gheweest daer Christus wt is nae den vleesche, ⁺die bouen alle is Godt ghebenedijt inder eewicheyt Amen.

+ B

6

Maer niet dattet woert Gods verloren soude gheuallen sijn. Want dese die van Israel sijn, en sijn alle gheen Israelijten,

7

noch oock die Abrahams saet sijn, en sijn alle gheen kinderen, maer in Isaac sal v saet ghenoemt worden,

8

dat is, Ten is soe niet, dat die kinderen des vleeschs sijn, oock Godts kinderen sijn, maer die kinderen der beloften sijn, die worden int saet gherekent.

9

Want het woert der beloften is dit. Nae desen tijt sal ic comen, ende Sara sal eenen sone hebben.

10

⁺Ende niet alleen die, maer oock Rebecca bevrucht sijnde van een versamen Isaacs ons vaders.

+ C

11

Want doen die kinderen noch niet gheboren en waren, oft iet goets ghedaen en hadden oft quaets (op dat Godts opsedt nae

[p. *859]

die verkiesinghe blijuen soude) soe is,

12

niet wt die wercken, maer wt den ghenen die daer roept, tot haer gheseyt, Die meeste sal den minsten dienen

13

alsoe daer ghescreuen is. Iacob heb ick lief ghehadt, Maer Esau hebbe ick ghehaedt.

14

Wat sullen wi dan segghen? Esser ongherechticheyt by Gode? Dat sij verre.

15

Want tot Moysen seyt hy, Ick sal ontfermen wiens ick ontferme, ⁺ende ick sal bermherticheyt doen den ghenen dien ick ontfermen sal.

+ D

16

Daer om en eest niet des gheens diet wilt ende loopt maer des ontfermenden Gods.

17

Want die scriftuere seyt tot Pharao. Daer toe heb ic v verwect, om dat ic in v mijn cracht toonen soude, ende op dat mijnen naem soude vercondicht werden ouer gheheel eertrijck.

18

Daer om ontfermt hy diens hy wilt, ende wien hy wilt dien verhart hy.

19

Hier om segdi my. Waer om besculdicht hy dan noch? Want wie wederstaet sijnen wille?

20

O mensch wie sijdi, dat ghy Gode soudt antwoerden? Seyt eenich maecsel totten ghenen diet ghemaect heeft. Waer om hebdi my alsoo ghemaect?

21

⁺En heeft die eerden potbacker die macht niet, wt den seluen clont eerden te maken een vat ter eeren, ende een ander vat ter scanden?

+ E

22

Heeft dan Godt willende sijn gramscap toonen ende sijn macht bekent maken, verdraghen in veel lydsaemheyt die vaten der gramscap bequaem ter verdoemenissen,

23

om dat hy toonen soude die rijcdommen sijnder glorien in die vaten der bermherticheyt die hy te voren bereyt heeft ter glorien.

24

Die welcke hy oock gheroepen heeft (te weten) ons, niet alleen wten Ioden, maer oock wten heydenen,

25

ghelijck hy in Osee seyt, Ic sal tghene dat mijn volck niet en is, ⁺noemen mijn volck, ende die niet bemindt en is, mijn beminde, ende die gheen bermherticheyt vercreghen en heeft, die bermherticheyt vercreghen heeft.

+ F

26

Ende tsal ghescieden in die Plaetse daer hen gheseyt is, Ghy en sijt mijn volck niet, daer sullen sij ghenoemt worden kinderen des leuende Gods.

27

Ende Isaias roept voer Israel. Al waert tghetal der kinderen van Israel ghelijck het sant der zee, soe sullen die bleuelinghen salich worden.

28

Want het woert is volbrenghende ende vercortende met gherechticheyt. Want een cort woert sal die Heere maken op die eerde,

29

ende ghelijck Isaias te voren gheseyt heeft, Ten ware dat ons die Heere sabboth saet hadde ghelaten, soe waren wy gheworden als Sodoma, ende als Gomorrha souden wy ghelijc sijn.

30

⁺Wat sullen wy dan segghen? Dat die heydenen die niet en sochten die rechtuerdicheyt, die rechtuerdicheyt vercreghen hebben, te weten die rechtuerdicheyt die wten ghelooue is.

+ G

31

Maer Israel volghende die wet der rechtuerdicheyt, en is niet ghecomen tot die wet der rechtuerdicheyt.

32

Waer om dat? Want hy niet wten ghelooue, maer als wt die wercken, die achteruolchde, want sij hebben hen ghestooten teghen den struycsels steen.

33

Alsoe daer ghescreuen is, Siet ick stelle in Sion eenen steen des aenstootsels, ende eenen steen der verarghenissen, ende alle die in hem ghelooft, en sal niet bescaemt worden.