Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

[p. *858]

+ 1

⁺ALdus en isser nu gheen verdoemenisse den ghenen die in Christo Iesu sijn, die nae den vleessche niet en wandelen.

+ A

2

Want die wet vanden gheest des leuens in Christo Iesu heeft my verlost van die wet der sonden, ende der doot.

3

Want dat der wet ommoghelijck was, midts dat sij cranck was doert tvleesch, dat heeft Godt ghedaen, sendende sijnen sone in die ghelijckenisse des sondichs vleeschs, ende heeft die sonde int vleesch verdoemt doer die sonde,

4

om dat die rechtuerdichmakinghe der wet soude veruult worden in ons, die nae tvleesch niet en wandelen, maer nae den gheest.

5

Want die nae den vleesch sijn, die hebben smaeck int tghene datten vleesch aengaet, maer die nae den gheest sijn, hebben ghevuelen van tgene dat den gheest aengaet.

6

Want die wijsheyt des vleeschs is die doot, maer die wijsheyt des gheests is leuen ende vrede.

7

Want die wijsheyt des vleeschs is Gods viant. ⁺Want sij en is der wet Gods niet onderdanich, Want sij dat ooc niet en vermach.

+ B

8

Ende die int vleesch sijn, en moghen Gode niet behaghen.

9

Maer ghy en sijt int vleesch niet, maer inden gheest. Eest nochtans alsoe dat den gheest Gods in v lieden woont. Maer eest dat iemant den gheest Christi niet en heeft, dese en is sijne niet.

10

Maer eest dat Christus in v lieden is, soe is het lichaem voerwaer doot om die sonde, maer den gheest leeft om die rechtuerdichmakinghe.

11

Maer eest dat den gheest van hem die Iesum vanden dooden verwect heeft in v woont, soe sal hy die Iesum Christum vanden dooden verwect heeft oock leuende maken v steruelijcke lichamen, ⁺om sijnen gheest die in v woont.

+ C

12

Daer om broeders sijn wy sculdenaers niet den vleesche, dat wy nae tvleesch souden leuen,

13

want eest dat ghy nae tvleesch leeft, soe suldi steruen, maer eest dat ghy doer den gheest die wercken des vleeschs doodet, soe suldi leuen.

14

Want alle die doer den gheest Gods ghedreuen worden, dat sijn Godts kinderen.

15

Want ghy en hebt niet ontfanghen den gheest der slauernien weder om in die vreese, maer ghy hebt ontfanghen den gheest der opneminghen der kinderen, in den welcken wi roepen Abba (vader)

16

Want die selue gheest gheeft ghetuyghenis onsen gheest dat wy Gods kinderen sijn.

17

Ende eest dat wy kinderen sijn, soe sijn wy ooc erfghenamen, te weten erfghenamen Gods, ende mede erfghenamen Christi. * Eest nochtans alsoe dat wij medelijden, op dat wy mede gheglorificeert worden.

+ 18

⁺Want ick houde dat dlijden van desen tijt niet weert ghenoech en is der toecomender glorien die in ons sal gheopenbaert wesen.

+ D

19

Want het verbeyden van die creatuere verwacht die openbaringhe van Godts kinderen.

20

Want die creatuere is der ydelheyt onderhauich sonder haren wille, maer om sijnen wille diese onder gheworpen heeft in die hope.

21

Want die selue creatuere sal oock verlost worden van den dienst der verderffenissen totter vrijheyt der glorien der kinderen Godts.

22

Want wy weten wel dat alle creatuere versucht, ende als barende arbeyt tot noch toe.

23

Ende niet alleen sij, maer ooc wy selue die des gheests ierste vruchten hebben versuchten selue ooc in ons, nae dat opnemen der kinderen Gods, verwachtende die verlossinghe ons lichaems.

* 24

⁺Want doer die hope sijn wy salich gheworden, Maer die hope die ghesien wort, en is gheen hope. Want dat iemant siet, hoe hoept hi dat?

+ E

25

Maer eest sake dat wy hopen tghene dat wy niet en sien, soe verwachten wy dat doer patientie.

26

Desghelijcs soe helpt oock den gheest onse crancheyt. Want wat wy bidden souden alsoot behoort dat en weten wi niet. Maer die gheest begheert selue voer ons, met onsprekelijcke suchtinghen.

27

Maer die de herten ondersoect die weet wat den gheest begheert, dat hy nae Gode bidt voer die heylighen.

+ 28

Ende wy weten dat den ghenen die Godt liefhebben alle dinghen mede wercken totten goede den ghenen die nae het opset heylich geroepen sijn.

29

Want die hy te voren gheweten heeft, ⁺die heeft hy ooc te voren ghescict, dat sij souden ghelijck worden den beelde sijns soens, op dat die selue sijn soude een ierste gheboren sone onder veel broeders.

+ F

30

Ende die hi te voren ghescict heeft, die selue heeft hi ooc gheroepen, ende die hy gheroepen heeft, die heeft hy oock rechtuerdich ghemaect, ende die hy rechtuer dichghemaect heeft, die heeft hy oock gheglorificeert.

31

Wat sullen wy dan hier toe segghen? is Godt voer ons, wie mach teghen ons?

32

Die welcke ooc sijnen eyghenen sone niet ghespaert en heeft, maer heeft dien voer ons allen gheleuert. Hoe en heeft hy ons dan met dien alle dinghen niet ghegheuen?

33

Wie salder teghen Gods wtuercorene clachtich sijn? Tis Godt die rechtuerdich maect.

34

Wie isser die verdoemen sal? Christus Iesus is die ghene die ghestoruen is, ia oock die verresen is, ⁺die ter rechter hant Godts is, die oock bidt voer ons.

+ G

35

Wie sal ons dan sceyden van die liefde Christi? Tribulatie? oft benautheyt? oft hongher? oft naectheyt? oft perikel? oft veruolghinghe? oft sweert?

36

(ghelijck daer ghescreuen is, Om uwen wille worden wy ghedoot alle den dach, wy sijn gheacht als scapen die ter toot ghescict zijn)

37

maer in alle dese verwinnen wy doer hem die ons bemint heeft.

38

Want ick ben seker, dat noch doot, noch leuen, noch enghelen, noch heerscappien, noch crachten, noch teghenwoerdighe, noch toecomende dinghen, noch stercheyt,

39

noch hoocheyt, noch diepte, noch gheen ander creatuere ons en sal moghen sceyden van die liefde Gods, die welcke is in Christo Iesu onsen Heere.