Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .vij. Capittel.

1

⁺EN weet ghy niet broeders (want ick spreeck den ghenen die de wet weten) dat die wet in den mensche heerschappie heeft, soo langhe tijt als sij leeft?

+ A

2

Want een vrouwe die onder den man is, soo langhe die man leeft, is sij ghebonden aen die wet, maer eest dat haer man sterft, soo is sij ontbonden van die wet des mans,

3

Daer om als die man noch leeft, soo sal sij een ouerspeelstere ghenoemt worden, eest dat si met eenen anderen man versaemt is, Maer eest dat haer man doodt is soo is sij los van des mans wet, alsoo dat sij gheen ouerspeelstere en is eest dat sie met eenen anderen man is,

4

Aldus mijn broeders ghy sijt oock ghestoruen der wet door Christus lichaem, om dat ghy eens anders sijn soudt, die vanden dooden verresen is, om dat wij Gode souden vrucht voorts brenghen,

5

⁺Want doen wij int vleesch waren, doen wrachten die lusten der sonden, die door die wet waren in onse leden, om dat sij der doot soude vrucht voorts brengen,

+ B

6

Maer nv sijn wij ontbonden van die wet der doot daer wij in ghehouden waren, alsoo dat wij dienen souden in die nieuwicheyt des gheests, ende niet in die oudtheyt der letteren,

7

Wat sullen wij dan segghen? is die wet sonde? Dat si verre, Maer die sonde en heb ick niet ghekent dan door die wet, want die begheerlijcheyt en soude ick niet gheweten hebben, ende seyde die wet niet. Ghi en sult niet begheren,

8

Maer die sonde een ocsuyn ghenomen hebbende door tghebodt heeft in my ghewracht alle begheerlijcheyt, want sonder die wet was die sonde doot,

9

Maer ick leefde voortijts sonder die wet, Maer doen tghebodt comen was, soo is die sonde wederom leuendich gheworden,

10

Maer ick ben ghestoruen, ende tis beuonden dat het ghebodt dwelck ten leuen was, my gheworden is ter doodt,

11

⁺want die sonde een oorsake ghenomen hebbende door tghebodt, heeft my verleydt, ende daer door ghedoodt,

+ C

12

Aldus is die wet emmer heylich, ende tghebodt is heylich, ende rechtuerdich, ende goet,

13

Daerom dat goet is, is my dat die dood gheworden? Dat sij verre, maer die sonde om dat sij soude openbaer worden sonde te wesen, heeft my door tgoet die doot ghewrocht, Om dat die sonde soude worden bouen maten seer sondighende door tghebodt,

14

want wij weten wel dat die wet gheestelijck is, maer ick ben vleeschelijck, vercocht onder die sonde,

15

Want dat ick doe dat en verstaen ick niet, want dat ick wille dat en doen ick niet, maer dat ick hate dat doen ick,

16

Ende eest dat ick doe tghene dat ick niet en wille, soo consenteere ick der wet dat sij goet is,

17

Ende alsoo en doe ick nv dat selue niet, maer die sonde die in mijn woont,

18

Want ick weet wel datter in my, dat is in mijn vleesch gheen goet en woont, want het willen heb ick by my, maer het goet te volbrenghen dat en vinde ick niet,

19

want ick en doe niet het goet dat ick wille, ⁺maer tquaet dat ick niet en wille, dat doe ick,

+ D

20

Maer eest dat ick doe tghene dat ick niet en wille, soo en doe ick nv dat selue niet, maer die sonde die in my woont,

21

Aldus vinde ick door die wet, als ic goet doen wille, dat my tquaet aencleeft,

22

Want ick heb een behaghen in die wet Godts nae den inwendighen mensch,

23

maer ick sie een ander wet in mijn leden, strijdende teghen die wet mijns verstants, ende my vanghende in die wet der sonden die in mijn leden is.

24

(Ick onsalich mensch, wie sal my verlossen van dlichaem deser doodt?

25

Die gratien Godts, door Iesum Christum onsen Heere) Aldus diene ick selue met die redene der wet Godts maer nae dat tvleesch, der wet der sonden.