Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .vi. Capittel.

1

⁺VVat sullen wij dan segghen? Sullen wij in die sonde blijuen op dat die gratie mach oueruloedich worden?

+ A

2

Dat sij verre, Want wij die der sonden ghestoruen sijn, hoe sullen wij daer in noch leuen?

+ 3

En weetti niet dat wij alle die ghedoopt sijn in Christo Iesu, in sijn doot ghedoopt sijn?

4

Want wij sijn met hem tsamen begrauen door het doopsel in die doot, Op dat ghelijc Christus verresen is van die dooden, door die glorien des vaders, wij oock alsoo souden in nieuwicheyt des leuens wandelen,

5

Want eest dat wij mede ingheplant sijn gheworden ter ghelijckenissen van sijnder doot, soo sullen wij ooc mede der verrijsenissen ingheplant wesen,

6

Dit wetende dat onsen ouden mensch mede ghcruyst is om dat bedoruen soude worden dat lichaem der sonden op dat wi voort aen der sonden niet dienen en souden,

7

⁺Want die ghestoruen is, die is gherechtuerdicht van die sonde,

+ B

8

Ende eest dat wij ghestoruen sijn met Christo, soo gheloouen wij dat wij te samen leuen sullen met Christo,

9

wetende dat Christus verrijsende van die dooden nu voort aen niet meer en sterft, die doot en sal ouer hem voortaen geen heerscappie meer hebben,

10

Want dat hy gestoruen is, dat is hi der sonden eens gestoruen, maer dat hi leeft, dat leeft hi Gode,

11

Alsoo ooc ghilieden, acht v seluen voorwaer ghestoruen der sonden, maer Gode leuende in Christo Iesu onsen Heere.

* + 12

Daerom en laet die sonde niet regneren in v sterffelijck lichaem om onderdanich te sijn sijnder begheerlijcheden,

13

Maer oock soo en gheuet v leden niet tot wapenen der boosheyt der sonden, maer gheeft v seluen Gode als wten dooden leuende, ende v leden tot wapenen der rechtuerdicheyt Gode,

14

⁺Want die sonde en sal ouer v gheen heerscappie hebben, want ghy en sijt onder die wet niet, maer onder die gratie,

+ C

15

Wat eest dan? sullen wij sondighen om dat wij onder die wet niet en sijn, maer onder die gratie? Dat si verre,

16

En weetty niet dat soo wien ghy v seluen tot knechten gheeft om onderdanich te sijne, dat ghy diens knechten sijt dien ghy onderdanich sijt, tsij oft der sonden ter doot, tsij oft der ghehoorsaemheyt ter rechtuerdicheyt?

17

Maer Gode sij danck, dat ghy gheweest hebt knechten der sonden, maer sijt onderdanich gheworden van herten, in die maniere der leeringhen, in die welcke ghy ouerghegheuen sijt,

18

Maer verlost sijnde van die sonde, sijt ghy knechten gheworden der rechtuerdicheyt.

* 19

+ ⁺Ick spreeck menschelijk om die cranckheyt ws vleeschs, want ghelijck ghy v leden ouer ghegheuen hebt te dienen der onsuyuerheyt ende der ongherechticheyt, totter ongherechticheyt, alsoo gheeft v leden nv te dienen der rechtuerdicheyt ter heylichmakinghen,

+ D

20

Want doen ghy der sonden slauen waert, soo waerdy vrij vander rechtuerdicheyt.

21

Aldus wat vrucht hebdy doen ghehadt in sulcke dinghen daer ghy v nv afscaemt, want het eynde van dien is die doot,

22

Maer nv ghy verlost sijt van die sonde, ende gheworden Gods knechten soo hebdi uwe vrucht in die heylichmakinghe, maer het eynde dat eewich leuen,

23

Want den loon der sonden is die doodt, maer die gratie Godts is deewich leuen in Christo Iesu onsen Heere.