Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺VVant wij dan gherechtuerdicht sijn wt den ghelooue, so laet ons vrede hebben tot Gode door onsen Heere Iesum Christum,

+ A

2

door den welcken wij oock hebben eenen toeganck, doort ghelooue tot deser gratien, daer wij in staen, ende glorieren in die hope van die glorie der kinderen Godts,

3

Maer niet alleen dit, maer wij glorieren oock in die tribulatien, wetende dat die tribulacie pacientie voorts brengt,

4

ende die patientie proeuinghe, ende die proeuinghe hope,

5

ende die hope en bescaemt niet, want die liefde Gods is wtghestort in onse herten door den heylighen gheest die ons ghegheuen is.

6

+ Want waerom is Christus (doen wij noch cranc waren nae den tijt) voor die ongoddelijcke gestoruen?

7

Want nauwelijcs en sterft iemant voor eenen rechtuerdighen, want voor eenen goeden soude by auontueren iemant dorren steruen,

8

Maer Godt prijst ons aen sijn liefde tot ons, want (doen wij noch sondaers waren)

9

soo is Christus voor ons ghestoruen, ⁺Daerom veel te meer sullen wij nv gherechtuerdicht sijnde door sijn bloet, verlost sijn van die gramschap door hem,

+ B

10

want eest dat wij, doen wij vianden waren Gode versoent sijn, door die doot sijns soons, veel te meer sullen wij behouden worden in sijn leuen nv wij versoent sijn,

11

Ende niet alleen dit, maer wij glorieren oock in Gode, door onsen Heere Iesum Christum, door den welcken wij nv die versoeninghe ontfanghen hebben.

* 12

+ Daerom ghelijck door eenen mensch die sonde in dese werelt ghecomen is, ende door die sonde die doodt, ende alsoo is die doot in alle menschen voorts door ghegaen, inden welcken sij alle ghesondicht hebben,

13

Want tot die wet toe was die sonde in die werelt, maer die sonde en worde niet gheacht, doen die wet niet en was,

14

maer die doodt heeft gheregneert van Adam tot Moysen toe, ⁺ooc in die ghene die niet ghesondicht en hebben, in die ghelijckenisse van Adams ouertredinghe, die welcke is een figuer vanden toecomenden,

+ C

15

Maer die gaue en is niet ghelijck die misdaet, want eest datter door die misdaet van eenen, vele ghestoruen sijn, veel te meer heeft die gratie Gods ende die gaue door die gratie van eenen mensch Iesu Christo in veel menschen oueruloedich gheweest,

16

Ende ghelijc door eenen die sonde is, also en is die gaue niet, want het ordeel is voorwaer wt een sonde ter verdoemenissen, maer die gratie is wt veel misdaden ter rechtuerdichmakinghe,

17

Want eest sake dat in eens misdaet die doodt heerscappie ghehadt heeft door eenen, veel te meer sullen die ghene die de oueruloedicheyt der gratien ende der gauen ende der rechtuerdicheyt ontfanghen int leuen regneren door eenen Iesum Christum.

18

⁺Aldus ghelijck door eens menschen misdaet doordeel ghecomen is in alle menschen ter verdoemenissen, alsoo is oock door eens menschen rechtuerdicheyt die gratie ghecomen in alle menschen tot rechtuerdichmakinghe des leuens,

+ D

19

Want ghelijck door eens menschens onghehoorsaemheyt veel sondaren ghesteldt sijn, alsoo sullen oock door eens menschens ghehoorsaemheyt vele rechtuerdich ghemaect worden,

20

Maer die wet is hier en tusschen inghecomen om dat die misdaet oueruloedich soude worden Maer daer die misdaet oueruloedich gheweest is, daer heeft die gratie noch oueruloedigher gheweest,

21

op dat (ghelijck die misdaet gheregneert heeft ter doodt) alsoo oock die gratie soude regneren door die rechtuerdicheyt ten eewighen leuen, door Iesum

[p. *857]

Christum onsen Heere.