Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺DAerom wat sullen wi segghen dat Abraham onse vader gheuonden heeft nae tvleesch?

+ A

[p. *856]

2

Want is Abraham wt die wercken gherechtuerdicht soo heeft hy glorie, maer niet by Gode,

3

Want wat seydt die scriftuere? Abraham heeft Gode ghelooft, ende tis hem gherekent ter rechtuerdicheyt,

4

Maer den ghenen die werct en wort den loon niet toe gherekent van gratien, maer van scult,

5

Maer den ghenen die niet en werct, maer ghelooft in hem die den ongoddelijcken rechtuerdich maect, wort sijn ghelooue gherekent ter rechtuerdicheyt, nae dat voornemen van Godts gratie.

6

Ghelijck Dauid ooc seyt, die salicheyt des menschs te wesen den welcken God die rechtuerdicheyt toerekent sonder wercken,

7

⁺Salich sijnse der welcker sonden vergheuen sijn ende der welcker sonden bedect sijn,

+ B

8

Salich is die man den welcken Godt die sonde niet toegherekent en heeft,

9

Hierom dese salicheyt blijft die in die besnijdenisse, oft ooc in die onbesnedenheyt? Want wij segghen dat Abrahe tghelooue gherekent is ter rechtuerdicheyt,

10

Hoe is dat dan gherekent? wt die besnijdinghe, oft in die onbesnedenheyt? Niet in die besnijdinghe maer in die onbesnedenheyt,

11

Ende hy heeft dat teeken der besnijdinghen ontfanghen, eenen seghel van die rechtuerdicheyt des gheloofs, die welcke is in die onbesnedenheyt, op dat hy een vader sijn soude der gheender die gheloouen door die onbesnedenheyt, op dat dien oock soude gherekent worden ter rechtuerdicheyt,

12

ende dat hy sijn soude een vader der besnijdinghen, niet alleen den ghenen die wter besnijdinghen sijn, ⁺maer oock den ghenen die nauolghen die voetstappen des gheloofds, welck daer is in die onbesnedenheyt ons vaders Abraham,

+ C

13

Want door die wet en is Abrahe die ghelofte niet ghedaen oft sijnen sade dat hy erfghenaem der werelt sijn soude, maer door die rechtuerdicheyt des gheloofs,

14

Want eest sake dat sij die wter wet sijn, erfghenamen sijn, soo is dat ghelooue ydel gheworden, die belofte te niet ghedaen,

15

want die wet werct gramscap, Want daer gheen wet en is, daer en is oock gheen ouertredinghe,

16

Daerom sijn sij wten ghelooue op dat die belofte vast soude wesen nae die gratie alle den sade, niet hem die wter wet is alleen, maer hem ooc die wt Abrahams ghelooue is, die een vader is van ons allen,

17

alsoo daer ghescreuen is. (Ick hebbe v eenen vader van veel volcken ghestelt) voor Gode, den welcken ghy ghelooft hebt, die leuende maect die dooden, ende roept die dinghen die niet en sijn, als die ghene die sijn,

18

die welcke teghen hope in die hope ghelooft heeft, om dat hi worden soude een vader van veel luyden, ⁺nae dat hem gheseyt is Alsoo sal v saet wesen ghelijck die sterren des hemels ende dat sandt der zee,

+ D

19

Ende hy en is niet cranck gheworden int ghelooue, nocht hi en heeft niet aenmerct sijn verstoruen lichaem, als hy by nae hondert iaren oudt was, ende den verstoruen buyc van Sara,

20

Ooc en heeft hy in die belofte Gods niet ghetwijfelt door wantrouwicheyt, maer is versterct gheweest doort ghelooue, gheuende Gode die glorie,

21

seer sekerlijck wetende dat Godt alle dat hy gheloeft heeft oock machtich is te doen,

22

Daerom eest hem oock gherekent ter rechtuerdicheyt,

23

Ende ten is alleen niet ghescreuen om sijnen wille, dattet hem gherekent is ter rechtuerdicheyt,

24

maer oock om onsen wille, den welcken dat sal gherekent worden, als wij in hem gheloouen, die Iesum Christum onsen Heere verwect heeft van die dooden,

25

die gheleuert is om onse misdaden, ende verresen is om onse rechtuerdich makinghe.