Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺VVat heeft dan die Iode meer? oft welc is tprofijt der besnijdenissen?

+ A

2

Vele in alle manieren Ten iersten want hen betrout sijn die woorden Godts,

3

want wat leydt daer aen, al eest dat die sommighe van henlieden niet ghelooft en hebben? Heeft hen ongheloouicheyt Gods ghelooue ydel ghemaect? Dat sij verre,

4

Want Godt is warachtich, maer alle mensch is loghenachtich, alsoot ghescreuen is, Op dat ghy moecht gherechtuerdi cht worden in v woorden, ende verwinnen als ghy gheordeelt wort,

5

Maer eest dat onse ongherechticheyt die rechtuerdicheyt Godts prijselijck maect wat sullen wij segghen? Is God dan daerom ongherechtich dat hy daer ouer vergramt?

6

Ick spreeck nae den mensch, Dat sij verre, Anders hoe sal Godt dese werelt ordeelen?

7

want eest dat Godts waerheyt door mijn loghene oueruloedigher gheworden is tot sijnder glorien, waer om worde ick dan noch als een sondaer gheordeelt?

8

⁺ende niet (als wij gheblasphemeert worden, ende ghelijc die sommighe spreken dat wi seggen) laet ons quaet doen datter goet af come, der welcker verdoemenisse rechtuerdich is,

+ B

9

Hoe dan? Gaen wij hen te bouen? gheensins, Want wij hebben met redenen ghetoont dat die Ioden ende griecken alle onder die sonde sijn,

10

alsoot ghescreuen is. Daer en is niemant rechtuerdich,

11

daer en is niemant verstandich, daer en is niemant Godt soeckende,

12

Sij sijn alle besijden afghegaen, sij sijn te samen onnut gheworden, daer en is niemant die goet doet, daer isser oock niet een,

13

Een open graf is hen kele, met haren tonghen deden sij bedriegelijck. Venijn der aderen is onder hen lippen,

14

der welcker mont is vol vermaledijdinghen ende bitterheyt,

15

snel sijn hen voeten om bloet wt te storten,

16

verderuinghe ende onsalicheyt sijn in hen weghen,

17

ende den wech des vreedts en hebben si niet ghekent,

18

daer en is gheen vreese Godts voor hen ooghen.

+ 19

⁺Maer wij weten wel dat soo wat die wet spreect, dat spreect sij tot die ghene die in die wet sijn, op dat alle mont ghestopt worde, ende dat alle die werelt Gode onderworpen worde,

+ C

20

want wt die wercken der wet en sal gheen vleesch gherechtuerdicht worden voor hem, want door die wet is die kennisse der sonden

21

maer nv is die rechtuerdicheyt Gods sonder die wet gheopenbaert, betuycht van die wet ende van die propheten,

22

Te weten die rechtuerdicheyt Godts door tghelooue Iesu Christi, in allen ende op allen die in hem gheloouen, want daer en is gheen ondersceyt,

23

want si hebben allegader ghesondicht, ende hebben van noode die glorie Gods,

24

Rechtuerdich ghemaect om niet door sijn gratie, door die verlossinghe die in Christo Iesu is,

25

den welcken Godt voorghestelt heeft tot een versoeninghe doort ghelooue in sijn bloet, tot een vertooninghe sijnder rechtuerdicheyt, ⁺om die verghiffenisse der voorgaender sonden, in Gods ghedoochsaemheyt,

+ D

26

tot een vertooninghe van sijnder rechtuerdicheyt in desen tijt, op dat hy mach rechtuerdich sijn, ende rechtuerdich makende den ghenen die daer is wten ghelooue Iesu Christi.

* 27

Waer is dan v gloriacie? Sij is wtghesloten, Door welcke wet? der wercken? Neen si maer door die wet gheloofs,

28

Want wij houden voorwaer dat die mensch gerechtuerdicht wort, door tghelooue, sonder die wercken des wets,

29

Oft is hy alleen der Ioden God? en is hi der Heydenen Godt ooc niet? Iae hy is vrij ooc der Heydenen God,

30

want tis emmer een God die die besnijdenisse rechtuerdich maect wten ghelooue, ende die onbesnedenheyt door tghelooue,

31

Doen wij dan die wet te niet door tghelooue? Dat sij verre, maer wij beuestighen die wet.