Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺DAerom sijdi sonder ontscult, o mensche soo wie ghi sijt die ordeelt, Want int ghene daer af dat ghi eenen anderen ordeelt, so verdoendi v seluen want ghi doet die selue dinghen die ghi ordeelt,

+ A

2

want wij weten dat het ordeel Godts is nae die waerheyt ouer die ghene die alsulcken dingen doen,

3

Maer meyndi dit o ghy mensch die ordeelt die ghene die sulcke dinghen doen, ende doet die selue, dat ghy ontulieden sult het ordeel Godts.

4

Oft versmaeddy die rijcdommen van sijnder goetheyt ende lijdtsaemheyt, ende lancmoedicheyt, niet wetende dat die goedertierenheyt Godts v ter penitencien aenleydt?

5

Maer nae v hartheyt ende v onboochsaem herte der penitencien,

[p. *855]

soo verghadert ghy v eenen scat der gramschap inden dach der gramscappen, ende der openbaringhen van Godts rechtuerdich ordeel,

6

die eenen ieghelijcken sal gheuen nae sijn wercken,

7

⁺Dat is te weten den ghenen die nae ghedoochsaemheyt des goede wercks, glorie ende eere ende onbederffelijcheyt soecken, het eewich leuen

+ B

8

Ende den ghenen die vander tweedrachticheyt sijn, ende die der waerheyt niet onderdanich en sijn, maer gheloouen der ongherechticheyt, gramscap ende onweerdicheyt,

9

Tribulatie ende banghicheyt in alle ziele vanden mensche die quaet doet, vanden Ioden ierstmael ende den griecken,

10

Maer glorie, eere ende vrede allen den ghenen die goet doen, den Ioden ten iersten ende den griecken.

+ 11

Want daer en is gheen wtnemen van persoonen by Gode,

12

Want alle die sonder wet ghesondicht hebben die sullen sonder wet vergaen, Ende soo wie in die wet ghesondicht hebben, die sullen door die wet gheordeelt worden,

13

Want die hoorders der wet en sijn niet rechtuerdich by Gode, maer die doenders der wet sullen gherechtuerdicht worden,

14

⁺want aenghesien dat die Heydenen die gheen wet en hebben natuerlijck die dinghen der wet doen, sulcke wet niet hebbende sijn hen seluen een wet,

+ C

15

die toonen het werck des wets ghescreuen in hen herten hen eyghen conscientie hen ghetuyghenisse gheuende, ende door die ghedachten malcanderen besculdighende, oft ontsculdighende,

16

inden dach als Godt ordeelen sal die verborghentheden der menschen, nae mijn Euangelie, door Iesum Christum.

* 17

Maer eest dat ghy een Iode toe ghenaemt wort, ende rustet in die wet, ende glorieert in Gode,

18

ende weet sijnen wille, ende prijst die profijtelijcste dinghen gheleert sijnde door die wet,

19

betrout v seluen te sijne eenen leydtsman der blenden, een licht der gheender die in duysternissen sijn,

20

eenen onderwijser der onwijsen eenen meester der onmondigher kinderen hebbende het exemplaer der wetenheyt ende waerheyt in die wet,

21

Daerom ghy die eenen anderen leert, en leert v seluen niet, ghy die preect datmen niet stelen en sal, steelt selue,

22

Ghy die segt datmen gheen ouerspel doen en sal, doet selue ouerspel, Ghy die de afgoden versmaet, berooft Godt van sijn eere,

23

Ghy die in die wet glorieert, onteert Godt door die ouertredinghe der wet

24

⁺(want den naem Godts wort door v lieden gheblasphemeert onder die Heydenen alsoot ghescreuen is)

+ D

25

Die besnijdenisse is voorwaer profijtelijck, eest dat ghy die wet onderhoudt, maer eest dat ghy een ouertreder der wet sijt, soo is v besnijdenisse een onbesnedenheyt gheworden,

26

Daerom eest dat die onbesnedenheyt die rechtuerdicheden der wet bewaert, en sal diens onbesnedenheyt niet een besnijdenisse gherekent worden?

27

ende en sal tghene dat wter natueren onbesneden is die wet volbrenghende v niet ordeelen die door die letter ende besnijdenisse een ouertreder der wet sijt?

28

Want ten is gheen Iode, die dat int openbaer is, noch ten is gheen besnijdenisse, die int openbaer inden vleesche besnijdenisse is,

29

maer die int verborghen een Iode is, dat is een Iode, ende die besnijdenisse des herten is een besnijdenisse inden gheest, niet nae die lettere, welcs lof niet vanden menschen, maer van Gode is.