Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

+ 1

⁺PAVLVS een dienaer Iesu Christi een gheroepen apostel wtghesceyden tot deuangelie Godts

+ A

2

(dwelc hy voortijts beloeft hadde door sijn propheten in die heylighe scriftueren)

3

van sijnen sone die hem gheworden is wt Davids sade na den vleesche,

4

ende die nae den gheest die heylich maect, te voren is gheordineert een crachtich sone Godts, wt die verrijsenisse der dooden ons Heeren Iesu Christi,

5

door den welcken wij ontfanghen hebben die gratie ende dapostelscap om onderdanich te sijne den ghelooue in alle die Heydenen om sijnen naem,

6

onder die welcke ghi ooc sijt vanden gheroepenen Iesu Christi.

* 7

Allen die te Roome sijt Godts beminde gheroepen heylighen, Gratie sij v ende vrede van Gode onsen vader, ende van onsen Heere Iesu Christo,

8

Ten iersten soo danc ick voorwaer mijnen God door Iesum Christum voor v allen, om dat v ghelooue vercondicht wort ouer alle die werelt,

9

⁺Want Godt is mijn ghetuyghe, den welcken ick diene in mijnen gheest int euangelie sijns soons, dat ick sonder ophouden uwer ghedachtich ben,

+ B

10

altijt in mijn ghebeden, biddende oft ick in eenigher voeghen ten laetsten eens een gheluckighe reyse mocht hebben door den wille Godts tot v lieden te comen,

11

want ick begheer v lieden te sien, op dat ick v mocht iet mede deylen van gheestelijcker gratien, om v te verstercken,

12

dat is om mede ghetroost te worden in v lieden door uwe ende mijn ghelooue dat wij onderlinghen hebben,

13

Maer ick en wil niet dat v onbekent sij broeders, dat ick dicmael heb voorghenomen tot v lieden te comen (ende ick ben belet gheweest tot nv toe) op dat ick eenighe vrucht mocht hebben onder v lieden, ghelijck ick ooc hebbe onder dander Heydenen,

14

Den Griecken ende Barbaren den wijsen ende onwijsen ben ick een schuldenaer,

15

Aldus (soo vele alst in my is) ben ick bereedt v lieden ooc die te Roome sijt het euangelie te vercondighen.

16

Want ick en scame my van deuangelie niet, want het is een cracht Godts ter salicheyt hen allen diet gheloouen, ierstmael den Ioden, ende oock den Griecken,

17

⁺want die rechtuerdicheyt Gods wort daer in gheopenbaert wten ghelooue int ghelooue alsser ghescreuen is, Ende die rechtuerdighe leeft wten ghelooue,

+ C

18

want die gramscap Godts wort gheopenbaert wten hemel ouer alle ongoddelijcheyt ende onrechtuerdicheyt sulcker menschen, die Godts waerheyt in ongherechticheyt onthouden,

19

Want watmen van Godt kennen mach dat is openbaer in hen, want Godt heuet hen gheopenbaert,

20

want sijn onsienlijcke dinghen worden bescouwet doort verstant, van dat scepsel der werelt, door sulcke dinghen die ghemaect sijn. Oock mede sijn eewighe macht ende sijn Godtheyt, alsoo dat sij gheen onscult en hebben,

21

Want als sij Godt ghekent hadden, soo en hebben sij hem als God niet gheeert, oft ghedanct, maer sij sijn ydel gheworden in hen ghedachten, ende hen onwijs herte is verdonckert gheworden,

22

want segghende hen seluen wijs te wesen, sijn sij dwasen gheworden,

23

ende sij hebben die glorie van den onbederffelijcken Godt verandert in die ghelijckenisse van eens bederffelijcs menschen beelt ende der voghelen, ende der vieruoetigher beesten, ende der cruypender dieren,

24

Daerom heeftse God gheleuert, in die begheerten haers herten in onsuyuerheyt, also dat sij haren lichamen versmaetheden aendoen souden in hen seluen,

25

die Godts waerheyt verandert hebben in loghenen, ⁺ende hebben gheeert ende ghedient den scepsel meer dan den scepper, die ghebenedijt is inder eewicheyt Amen.

+ D

26

Daerom heeftse Godt gheleuert, in scandelijcke lusten, want hen vrouwen hebben verandert het natuerlijck ghebruyck, in sulck ghebruyck dat teghen natuer is,

27

Desghelijcs oock die mannen, latende dat natuerlijck ghebruyck der vrouwen, sijn hittich gheworden in hen lusten tot malcanderen, mans met mans vuylicheyt bedrijuende, ende den loon (die daer toe behoorde) van haerder dolinghe in hen seluen ontfanghende,

28

Ende ghelijck sij niet gheacht en hebben God te kennen, soo heeftse God gheleuert in eenen verkeerden sin, dat sij doen souden tghene dat niet en behoort,

29

veruult met alle boosheyt quaetheyt, oncuysheyt, ghiericheyt, archeyt, vol nijdicheyt, dootslach, twist, bedriechlijcheyt, quaetwillicheyt,

30

oorblasers, lasteraers, scimpers, houerdighe, opgheblasen, quaet vinders, den ouders onghehoorsaem,

31

onuerstandich, onvriendelijck, onghetrouwe, onghenadich,

32

Die welcke, als si Gods rechtuerdicheyt ghekent hebben, en hebben niet verstaen, dat die ghene die sulcke dinghen doen, der doot weerdich sijn, niet alleen diese doen, maer oock die consenteren den ghenen diese doen.