Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel

1

⁺MAer doent gheordineert was dat hy in Italien te scepe varen soude, ende datmen Paulum metten anderen gheuanghenen soude leueren, den hondersten man Iulius ghenaemt, van die keyserlijcke bende,

+ A

2

soo sijn wij opgheclommen in een scip van Adrameten, ende beghinnende te varen omtrent die plaetsen van Asien, hebben wij afghesteken vanden lande, ende Aristarchus den Macedoniaen die van Thessalonica was by ons blijuende,

3

Maer des ander daechs sijn wij ghecomen tot Sidon, Ende Iulius beleefdelijck Paulum tracterende heeft hem laten vrij gaen tot sijnen vrienden ende sij seluen besorghen,

4

Ende doen wij van daer afghesteken waren, soo hebben wij ghesceept onder Cypren om dat die winden contrarie waren,

5

Ende scepende door die zee van Cilicien ende Pamphilien sijn wij ghecomen te Listren welck is een stadt van Licien,

6

ende die honderste man vindende daer een scip van Alexandrien, varende na Italien, ⁺heeft ons daer in ouer ghesedt,

+ B

7

Ende doen wij veel daghen lancsaemlijc voorts voeren, ende nauwelijcs ghecomen waren teghen ouer Gnidum (want den wint ons belette) soo sijn wij ghesceept aen Creten by Sallomonem,

8

ende nauwelijcs daer neffens varende sijn wi ghecomen tot een plaetse die ghenoemt wort goede hauenen, waer by was die stadt Thalassa,

9

Maer alsser veel tijts voorby was, ende dat nv gheen vrij sceepuaert en was, om dat het vasten nv langhe te voren gheduert hadde, soo troostese Paulus

10

segghende tot hen. Ghi mannen ick sien wel dat dese sceepuaert beghint te sijne met hinder ende met veel scaden, niet alleen vanden last ende vanden scepe, maer oock van onse zielen,

11

Maer die honderste man gheloofde meer den stierman ende den piloot, dan tghene dat van Paulus gheseyt worde,

12

Ende doent gheen bequaem hauen en was om daer te ouerwinteren, soo hebbender vele eenen raet ghesloten van daer te scepen, ⁺op dat sij in eenigher manieren comen die te Phenicen daer souden moghen ouerwinteren welc is een hauene van Creten siende teghen den suydtwesten ende den noortwesten wint,

+ C

13

Ende doender eenen suyden wint waeydde meynende dat si nv hen voornemen hadden, doen sij van Assou afghesteken waren, voeren sij voorbi Creten,

14

Maer niet langhe daer nae soo heeft hem eenen stormende wint teghen haer gheheuen die ghenoemt wort den noortoosten wint,

15

Ende doen tscip ghegrepen was, ende niet en conste wederstaen den wint latende het scip den winden, worden wij ghedreuen,

16

Ende tot een eylandt af varende dwelck ghenoemt wort Cauda hebben wij nauwelijcs eenen boodt connen ghecrijghen,

17

Ende dien opghenomen sijnde, soo ghebruycten sij helpe het scip toe bindende, vreesende dat sij int Syrten vallen souden, ende een tonne nederlatende voeren sij alsoo,

18

Maer als wij crachtelijck vant onweder herwaerts ende derwaerts gheworpen waren, soo hebben sij des anderen daechs eenen wtworp ghedaen,

19

ende opden derden dach hebben sij des sceeps ghereetschappen met hen selfs handen wech gheworpen,

20

⁺Ende doender noch sonne noch sterren en scenen binnen veel daghen, ende daer gheen cleyn tempeest aenstaende was, soo was doen alle die hope onser salicheyt benomen,

+ D

21

Ende als sij langhe gheuast hadden, doen heeft Paulus staende int midden van henlieden gheseyt. O ghi mannen het was voorwaer noot dat ghy (my ghehoort hebbende) niet en soudt gheuaren hebben van Creten ende verhoeden dit verdriet ende verlies,

22

Ende nv rade ic v goets moets te sijne, want daer en sal niemants ziel verlies wesen van v allen dan alleen des scheeps,

23

want desen nacht heeft den Enghel Gods by my ghestaen, wien ick toebehoore, ende wien ick diene,

24

seggende. En vreest niet Paule, Ghi moet voor den keyser staen, ende siet Godt heeft v ghegheuen alle die met v te scepe varen,

25

Daerom weest goets moets ghi mannen, want ick ghelooue Gode, ⁺dat dit alsoo sijn sal ghelijck my gheseyt is,

+ E

26

maer wij moeten in een eylant comen,

27

Maer nae dat den veerthiensten nacht ouerquam, als wij voeren in die zee van Adria omtrent der middernacht, soo docht den sceepluyden dat hen eenich lantscap vertoonde,

28

Die welcke oock het dieploot nederlatende hebben gheuonden twintich vadems diepte, ende een luttel van daer verscheyden sijnde, hebben sij gheuonden vijfthien vadems diepte,

29

Maer vreesende dat wi aen eenighe scerpe plaetse comen souden worpende wt dat achterste des sceeps vier anckeren, verlangde hen dat dach worden mocht,

30

Maer als die scipluyden sochten wt dat scip te vlieden, als sij eenen boodt in die zee neder ghelaten hadden, onder tdecsel als oft sij begonsten die anckeren van tvorste des scips wt te worpen,

31

soo heeft Paulus gheseydt totten hondersten man ende tot die crijschknechten, Ten sij dat dese int schip blijuen, ⁺soo en moechdy ghy niet behouden worden,

+ F

32

Doen hebben die crijschknechten die zeelen van den boote afghesneden ende hebben dien laten wtuallen,

33

Ende doent begonste licht te worden, soo badt Paulus hen alle dat sij spijse nemen souden seggende. Tot heden opden veerthiensten dach blijfdi verwachtende al vastende, niet nemende,

34

Daerom bidde ick v lieden, dat ghy spijse neemt om uwer weluaert, want daer en sal niet een hayr van eenich v lieder hooft verloren gaen,

35

Ende doen hy dat gheseydt hadde, nemende broot heeft hy Godt ghedanct int aenschijn van hen allen, ende doen

[p. *853]

hy dat ghebroken hadde, soo heeft hy begonnen teten,

36

ende als sij alle beter ghemoet gheworden waren, so hebben si selue spijse ooc ghenomen,

37

Ende wi waren alle int scip twee hondert sessentseuentich zielen,

38

Ende als sij versaet waren met spijse soo hebben sij het scip verlicht worpende tarwe in die zee,

39

ende doent dach gheworden was, ⁺soo en kenden sij dlant niet, maer sij bemercten een hauene hebbende een oeuere in die welcke dachten sij (waert dat sij consten) het scip wt te stieren,

+ G

40

Ende doen sij die anckeren opghetrocken hadden beualen sij hen der zee, tsamen ontbindende die banden vanden roeren, ende den seylboom opghehauen hebbende nae dat waeyen des wints, voeren sij na den oeuer,

41

Ende als wij ghedreuen waren aen een hooft, hebbende die zee aen beyde sijden soo hebben sij tscip daer aen ghestooten ende het vorste deel bleef vast staende onberoerlijck, maer het achterste deel brack af van die cracht der zee,

42

Ende den raet der crijschknechten was dat sij die gheuanghenen souden dooden, op dat ter niemant (als hy wtgheswommen ware) en soude ontulieden,

43

Maer die honderste man willende Paulum behouden, heeft verboden dat te doen, ende hy heeft gheboden dat die ghene die swemmen conden, hen seluen ierstmael wtworpen souden ende ontulieden, ende ten lande opcomen,

44

ende die andere voerden sij op plancken, ende die sommighe op die stucken die van den scepe waren, Ende alsoo eest ghesciet dat alle die zielen ontquamen te lande.