Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺ENde doen wij ontcomen waren, soo hebben wij vernomen dat het eylant Mitelene ghenaemt was, Maer die Barbaren en bewesen ons gheen cleyn beleeftheyt,

+ A

2

want een vier stokende hebben sij ons alle vermaect, om den reghen die ouer ons quam, ende die coude,

3

Ende doen Paulus een menichte van rijseren vergadert hadde, ende die gheleyt hadde opt vier ende daer een adere van die hitte wtghecomen was soo is die in sijn hant gheuaren,

4

Ende doen die Barbaren saghen die beeste hangende aen sijn hant soo seyden sij tot malcanderen, Voorwaer dese mensch is een dootslagher, den welcken (als hy wter zee ontcomen is) die wrake niet en laet leuen,

5

Maer hy die beeste int vier afscuddende en heeft gheen quaet gheuoelt,

6

⁺maer sij meynden dat hy soude gheswollen hebben ende ter stont gheuallen ende ghestoruen, Maer doen sij langhe verbeydden, ende saghen dat hem niet quaets en ghesciede, haren sin veranderende seyden si dat hy God was,

+ B

7

Ende op die plaetsen waren die hoeuen vanden prince des eylants Publius ghenaemt, die welcke ons ontfanghende heeft ons drij daghen vriendelijc ghetracteert,

8

Ende het ghebuerde dat Publius vader van die febres, ende vanden rooden loop ghequelt te bedde lach, Totten welcken is Paulus inghegaen ende doen hi ghebeden hadde, ende sijn handen op hem gheleydt, soo heeft hy hem ghenesen,

9

Doen dat ghesciet was, ⁺soo quamen ooc tot hem alle dien in dat eylant siecten hadden, ende sij worden ghenesen,

+ C

10

die welcke ons ooc met veel eeren gheeert hebben, ende doen wij te scepe wech voeren, soo hebben sij ons mede ghegheuen dat ons van noode was,

11

Ende nae drij maenden voeren wij in een scip van Alexandrien dwelc in dat eylant ouer ghewintert hadde, het welc hadde een baniere der Castoren,

12

Ende doenwij ghecomen waren tot Siracusen soo hebben wij daer ghebleuen drij daghen,

13

Ende van daer rontsomme aen dlant varende sijn wij ghecomen te Rhegien ende doen nae eenen dach als den suyden wint waeydde, soo sijn wij ten tweeden dach ghecomen te Puteolen,

14

⁺ende doen wij aldaer broeders gheuonden hadden, so sijn wij ghebeden daer te blijuen by hen seuen daghen, ende alsoo sijn wi te Roome ghecomen,

+ D

15

Ende van daer doent die broeders ghehoort hadden, so sijn si ons te ghemoete ghecomen tot Appius marct toe, ende die drij tauernen, Die welcke als Paulus ghesien hadde, soo heeft hy Godt danckende betrouwen ghenomen,

16

Maer als wij te Roome ghecomen waren, soo eest Paulo gheorlooft dat hy alleen blijuen soude met eenen ruyter die hem bewaerde,

17

Ende nae den derden dach heeft hy te samen gheroepen die principaelste der Ioden, Ende als sij te samen ghecomen waren, soo seyde hy henlieden. ⁺Ghy mannen broeders, ic niet teghen ons volc doende, oft onser vaderen ghewoonte ben ghebonden van Ierusalem gheleuert in die hant der Romeynen,

+ E

18

Die welcke (als sij van my een ondersoeck ghedaen hadden) hebben my willen vrij laten gaen om datter gheen sake des doots in my en was,

19

Maer want die Ioden daer teghen seyden, soo ben ick bedwonghen gheweest aenden keyser te appelleren, niet als oft ick erghers af mijn volc wilde beschuldighen,

20

Aldus om dese sake heb ick ghebeden om v lieden te sien ende aen te spreken, want om die hope van Israel ben ick met deser ketenen omuanghen

21

Maer sij hebben tot hem gheseyt. Wij en hebben noch brieuen van v ontfanghen wt Iudeen, noch gheen broeder aencomende en heuet ons ghebootschapt, ⁺oft yet quaets van v gheseyt,

+ F

22

Maer wij begheren van v te hooren wat ghy gheuoelt, Want van dese secte is ons kenlijc datmen dier tot alle plaetse wederseyt.

23

Ende doen si hem eenen dach ghestelt hadden, soo sijnder tot hem vele ghecomen in die herberghe, den welcken hy verclaerde, betuyghende het rijck Gods ende hen wijsmakende van Iesu wt Moyses wet, ende wt die propheten van smorghens totten auont toe,

24

Ende die sommighe gheloofden tgene datter gheseyt worde, maer die sommighe en gheloofdens niet,

25

Ende doen sij onder malcanderen niet ouer een en quamen soo sceydden sij van een Paulo segghende een woort dat die heylighe gheest wel gheseyt heeft door Isaiam den propheet tot onse vaderen

26

seggende. ⁺Gaet henen tot dit volc ende segt tot henlieden. Metter ooren suldijt hooren ende niet verstaen, ende siende suldijt sien ende niet bekennen,

+ G

27

want therte van desen volcke is dick gheworden, ende metten ooren hebben sij swaerlijc ghehoort ende hen ooghen hebben si toe ghedruct, dat sij by auontuere niet sien en souden metten ooghen ende metten ooren hooren metter herten verstaen, ende dat sij bekeert worden ende dat ickse ghenase

28

Daerom v sij bekent dat den Heydenen ghesonden is dese salicheyt Gods, ende sij sullent hooren,

29

Ende doen hy dit gheseyt hadde, soo sijn die Ioden van hem wtghegaen hebbende onder malcanderen veel twistighe vraghen,

30

Ende hy is twee gheheel iaren ghebleuen in sijn gheleyde, ende hy ontfincse alle die tot hem quamen

31

prekende het rijck Gods, ende leerende datter is vanden Heere Iesu Christo met alder vrijcheyt onuerboden.

Hier voleynden die wercken der Apostelen.