Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺MAer Agrippa heeft tot Paulum gheseyt. V wort gheorlooft te spreken voor v seluen, Doen heeft Paulus met wtgherecter hant hem begonst te verantwoorden,

+ A

2

Van alle tghene daer ick af beclaecht worde vanden Ioden coninc Agrippa, acht ick my gheluckich te sijne, aenghesien dat ick my heden by v verantwoorden sal,

3

aldermeest want ghy wel weet alle die ghewoonten ende vraghen die onder die Ioden sijn, Waerom soo bidde ick v dat ghy my ghedoochsaemlijck hoort,

4

Ende voorwaer mijn leuen van mijnder ioncheyt dwelck van ierst gheweest is onder mijn volck in Ierusalem kennen alle die Ioden,

5

kennende my te voren van ierst (wilden sij ghetuyghenis gheuen) dat ick nae die sekerste maniere van leuen van onser religien heb gheleeft een Phariseus,

6

⁺Ende nv in die hope der beloften die tot onsen vaderen ghedaen is van Gode, staen ick den ordeel onderworpen,

+ B

7

in die welcke ons twaelf gheslachten nacht ende dach dienende hopen te comen, Van welcker hopen ick beticht worde vanden Ioden o coninc,

8

Waerom duncket by v lieden onghelooffelijc te sijne, eest dat God die dooden verwect?

9

Ende ick hadde voorwaer ghemeynt dat ick teghen den naem Iesu van Nazareth soude veel hebben moeten doen ter contrarien,

10

dwelck ick oock ghedaen hebbe te Ierusalem, ende veel vanden heylighen heb ick in kerkers ghesloten, hebbende vanden princen der priesteren macht ghenomen, ende als sij ghedoodt worden soo droech ick dat vonnis ouer,

11

Ende door alle die Sinagogen henlieden dicmael pijnighende, dwanck ickse te blasphemeren, ⁺ende noch meer teghen hen rasende, veruolchde ick henlieden tot in die vreemde steden,

+ C

12

om welcke saken doen ic ghinc nae Damascum met machte ende orlof van die princen der priesteren,

13

soo heb ick inden middach opden wech ghesien (o coninck) dat mij wten hemel een licht meerder dan die claerheyt der sonnen omscenen hadde, ende die ghene die tsamen met my waren,

14

Ende doen wij allegader ter eerden neder gheuallen waren, soo heb ick ghehoort een stemme tot my sprekende in hebreusscher talen, Saule Saule waerom veruolchdi my? het is v hart teghen een steeck yser metten voeten te stooten,

15

Ende ick seyde. Wie sijt ghi Heere? ⁺Maer die Heere seyde. Ick ben Iesus den welcken ghi veruolcht,

+ D

16

Maer richt v op, ende staet op v voeten? Want daerom heb ick v gheopenbaert, om dat ick v maken soude een dienaer ende een ghetuyghe der dinghen die ghy ghesien hebt, ende van tghene daer ick v in openbaren sal,

17

verlossende v van die natien ende Heydenen tot die welcke ick v nv sende,

18

om hen ooghen open te doen, dat sij bekeert moghen worden van die duysternissen totten lichte, ende van Satanas macht tot Gode, op dat sij ontfanghen moghen verghiffenisse van sonden, ende een deel onder die heylighe door tghelooue dat in my is,

19

Daerom o coninc Agrippa, ick en heb der hemelscher openbarighen niet ongheloouich geweest,

20

⁺Maer den ghenen die te Damasco sijn ierstmael, ende te Ierusalem, ende ouer alle dlantscap van Iudeen, ende den Heydenen, vercondichde ic dat sij penitencie doen souden, ende hen bekeeren souden tot Godt, doende weerdighe wercken der penitencien.

+ E

21

Om dese sake hebben die Ioden (doen ic inden tempel was) mi ghe-

[p. *852]

uanghen ende arbeyden willende my dooden,

22

⁺Maer gheholpen sijnde door die helpe Godts, stae ick nog tot opden dach van heden betuyghende den minsten ende den meesten, niet seggende buyten tghene dat die propheten ende Moyses geseyt hebben toecomende te sijne

+ F

23

oft Christus lijden soude, oft hy dierste wt die verrijsenisse der dooden, het licht soude vercondighen den volcke ende den Heydenen,

24

Doen hy dese dinghen sprac ende hem verantwoorde, soo heeft Festus met luyder stemmen gheseyt. Paule ghy raest, groote gheleertheyt brenght v tot ontsinnicheyt,

25

Ende Paulus. Ick en rase niet (seyt hy) o alderbeste Feste, maer ick spreke woorden der waerheyt ende der soberheyt,

26

Want die coninck weet hier af totten welcken ic cloeckelijc spreke, want ick meyne dat hem van desen dinghen niet onbekent en is, want gheen van desen en isser in eenighen hoec ghesciet,

27

⁺Gheloofdi ghy coninc Agrippa den propheten? Ick weet wel dat ghi die ghelooft,

+ G

28

Maer Agrippa seyde tot Paulum. Op een luttel na beweecht ghi my kersten te worden,

29

Ende Paulus seyde. Ick wensche bi Gode, int luttel ende int groote niet alleen v maer ooc alle diet heden hooren alsulck te worden als ic ben, wtghenomen dese banden,

30

Ende die coninck is opghestaen, ende die president ende Bernice, ende die by hem saten,

31

Ende doen sij op een sijde ghegaen waren soo spraken sij tot malcanderen segghende. Dese man en heeft niet misdaen dat der doot oft der gheuanghenissen weerdich is,

32

Maer Agrippa heeft Festo gheseyt Desen man hadde men moghen laten vrij gaen, en hadde hy aen den keyser niet gheappelleert.