Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde Paulus den raet aensiende heeft gheseyt Ghy mannen broeders. Ick heb met een gheheel goede conscientie verkeert voor Godt, tot opden dach van heden toe,

+ A

2

Maer die prince der priesteren Ananias heeft gheboden den ghenen die by hem stonden dat sij hem aenden mont slaen souden,

3

Doen seyde Paulus tot hem. God sal v slaen ghi ghewitte wandt, Ende ghy sittende ordeelt my nae die wet ende teghen die wet doedi my slaen,

4

Ende die daer by stonden hebben gheseyt. Vermalendijde ghy den ouersten priester Godts?

5

Maer Paulus seyde. Ic en wiste niet broeders dat hy die prince der priesteren is, Want daer is ghescreuen. Den prince ws volcs en suldi niet vermalendijden,

6

Maer Paulus wetende dat het een deel was vanden Sadduceen ende het andere van den Phariseen heeft luyde gheroepen inden raet. Ghy mannen broeders, Ick ben een Phariseus een sone der Phariseen, van die hope ende van die verrijsenisse der dooden worde ick gheordeelt,

7

⁺Ende doen hy dit gheseyt hadde soo isser eenen twist ghecomen tusschen die Phariseen ende Sadduceen, ende die menichte is van een ghesceyden,

+ B

8

want die Sadduceen segghen datter gheen verrijsenisse en is, noch Enghel, noch gheest, Maer die Phariseen belijdense alle beyde,

9

Ende daer is een groot gheroep ghesciet, Ende sommighe vanden Phariseen opstaende streden segghende. Wij en vinden niet quaets in desen mensch, Wat eest dan oft hem eenen gheest aenghesproken heeft oft eenen Enghel?

10

Ende doen daer eenen grooten twist gheworden was, soo heeft die ouercapiteyn vreesende dat Paulus soude van henlieden verschoort worden, gheboden dat die ruyters afcomen souden, ende hem nemen wt dat midden van henlieden ende hem gheleyden tot inden legher

11

Maer des nachts daer nae heeft die Heere by hem staende tot hem gheseyt. ⁺Weest volstandich, want ghelijc ghi van my hebt ghetuycht in Ierusalem, also moet ghy ooc te Roome ghetuyghen,

+ C

12

Maer alst dach gheworden was, soo hebben hen sommighe Ioden vergadert ende hen seluen veruloect segghende dat si niet eten en souden noch drincken tot dat sij Paulum ghedoot hadden,

13

Ende het waren meer dan veertich mannen die dit ghesworen verbont te samen ghemaect hadden

14

die welcke sijn ghegaen tot die princen der priesteren, ende tot die ouders ende hebben gheseyt. Met eenen vloec hebben wij ons seluen veruloect dat wij gheen spijse proeuen en sullen tot dat wij Paulum ghedoot hebben,

15

Daerom laet ghy nv den ouercapiteyn weten metten rade, dat hy hem voorts brenghe tot v lieden, als oft ghy iet sekerders wildet van hem weten, ⁺Maer wij sijn bereydt hem te dooden eer hy by v comen sal,

+ D

16

Maer doen die sone van Paulus suster die laghen ghehoort hadde, soo is hy ghecomen ende ghegaen inden legher ende hy heuet Paulo te kennen ghegheuen,

17

Ende Paulus roepende tot hem eenen vanden honderste mannen seyde. Desen ionghelinck leydt tot by den ouercapiteyn, Want hy heeft hem wat te segghen,

18

Ende die heeft hem mede nemende gheleyt tot den ouercapeteyn ende gheseyt. Die gheuanghen Paulus heeft my ghebeden dat ick desen ionghelinck tot bi v leyden soude, die v wat heeft te segghen,

19

Ende die ouercapeteyn hem metter hant nemende is met hem besonder op een sijde ghegaen, Ende hy heeft hem ghevraecht. Wat eest dat ghy my hebt te kennen te gheuen?

20

Ende hy heeft gheseyt. Die Ioden sijn ouer een comen dat sij v bidden souden dat ghy morghen Paulum soudt voorts brenghen inden raet, ⁺recht oft sij iet sekerders souden willen ondersoecken van hem,

+ E

21

maer ghy en ghelooft hen niet want die sommighe van henlieden meer dan veertich mannen legghen hem laghen, Die welcke hebben hen seluen veruloect niet te eten oft te drincken tot dat sij hem ghedoot hebben, ende sij sijn nv bereet verbeydende v belofte,

22

Aldus heeft die ouercapeteyn den ionghelinc laten gaen, ghebiedende hem dat hijt niemanden segghen en soude dat hy hem dit hadde te kennen ghegheuen,

23

Ende als hy twee honderste mannen tsamen tot hem gheroepen hadde soo heeft hi tot

[p. *850]

hen gheseyt. Bereydt twee hondert crijschknechten dat sij reysen moghen tot Cesarien, ende tseuentich ruyters te peerde, ende twee hondert spiesknechten, van die derde vre des nachts,

24

ende bereydt die lastdraghende beesten, dat sij Paulum daer op settende moghen onghescent brenghen tot Felix den stadthoudere

25

(want hy vreesde dat die Ioden hem by auontueren grijpen souden ende dooden, ende dat hy daer na soude op sprake lijden als oft hy soude hebben willen ghelt nemen) scrijuende eenen brief inhoudende dit.

26

⁺Claudius Lysias wenscht den alder besten president Felici salicheyt

+ F

27

Desen man gheuanghen sijnde vanden Ioden doen hy begonste van henlieden ghedoodt te worden, heb ick daer ouercomende metten heyre verlost, vernomen hebbende dat hy een Romeyn was,

28

ende willende weten die sake die sij hem opleyden, heb ick hem gheleydt tot in haren raet,

29

Den welcken ick heb beuonden besculdicht te worden van sommighe vraghen van haerder wet, maer gheen quaet seyt hebbende dat der doot oft der gheuanghenisse weerdich is,

30

Ende doen my ouerghedraghen was vanden laghen die sij hem bereydt hadden, soo heb ick hem tot v ghesonden, ontbiedende den claghers ooc dat sij by v souden segghen, Blijft ghesont.

31

Maer die ruyters na dat hem gheboden was nemende Paulum hebben hem inder nacht gheleydt tot in Antipatridem,

32

Ende des anderen daechs als sij die ruyters te peerde ghelaten hadden dat die met hem reysen souden, sijn sij wederom ghecomen inden legher,

33

⁺Die welcke als sij te Cesarien ghecomen waren ende den brief ghegheuen hadden den president, soo hebben sij voor hem Paulum oock ghestelt,

+ G

34

Maer doen hijt ghelesen hadde ende ghevraecht van wat prouincie dat hy was, ende verstaende dat hi was van Cilicien,

35

Ic sal v (seyt hy) hooren, als v beclaghers ghecomen sijn, ende hy heeft hem doen bewaren in Herodes rechterhuys.