Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺GHy mannen broeders ende vaders hoort na die redene die ick v nv gheue

+ A

2

(Maer doen sij ghehoort hadden dat hy in hebreusscher talen sprack tot hen, soo hebben sij noch meerder stilte ghehouden,

3

Ende hy seyt). Ick ben een Ioetsch man gheboren te Tharsen in Cilicien, maer opgheuoedt in dese stadt, aen die voeten van Gamaliel gheleert nae die waerheyt van onser vaderen wet, een vierich naeuolgher der wet ghelijc ghy allegader heden sijt,

4

Die desen wech veruolcht hebbe totter doot toe, bindende ende leuerende in gheuanghenissen mannen ende vrouwen

5

ghelijck die prince der priesteren my ghetuyghenis gheeft, ende alle die outste gheborene, ⁺vanden welcken ick brieuen nemende aen die broeders reysde naer Damascum, om dat ick van daer die gheuanghen brenghen soude te Ierusalem, datse ghepuniert souden worden.

+ B

6

Ende het is ghesciet doen ick reysde ende quam by Damascus ten middaghe, dat my rontsomme onuersiens wten hemel bescenen heeft een groot licht,

7

ende vallende neder ter aerden, heb ick ghehoort een stemme seggende tot my. Saule Saule, waerom veruolchdi mi?

8

Ende ick heb gheantwoort. Wie sijdi Heere? Ende hy heeft gheseyt tot my? Ic ben Iesus van Nazareth den welcken ghy veruolcht?

9

Ende die met my waren hebben voorwaer dlicht ghesien, maer sij en hebben die stemme niet ghehoort des gheens die met my sprack,

10

⁺Ende ick heb gheseyt. Wat sal ic doen Heere? Ende die Heere heeft tot my gheseyt. Staet op ende gaet in Damascum, ende daer sal v van als gheseyt worden wat ghy doen moet,

+ C

11

Ende doen ic niet en sach om die groote claerheyt van dien lichte, soo ben ic gheleydt metter hant van mijnen ghesellen ghecomen in Damasco,

12

En-

[p. *849]

de Ananias, een man, nae die wet ghetuyghenis hebbende van alle den Ioden daer woonende,

13

comende tot my ende by my staende heeft my gheseyt. Saule broeder siet op, ende ic heb hem aenghesien op die selue vre,

14

⁺Ende hy seyde. Onser vaderen Godt heeft v te voren gheordineert, dat ghy sijnen wille soudt kennen, ende sien soudt den rechtuerdighen, ende hooren een stemme wt sijnen mont,

+ D

15

want ghi sult sijn ghetuyghe sijn tot alle menschen, van die dinghen die ghi ghesien hebt ende ghehoort,

16

Ende nv waerom toeft ghi? Staet op ende laet v doopen, ende wascht v sonden af aenroepende sijnen naem,

17

Ende het is ghesciet doen ick wederom quam in Ierusalem, ende badt inden tempel, dat ick worde in een opghetrockenheyt des herten

18

ende dat ick sach hem segghende tot my. Haest v, ende gaet haestelijck wt Ierusalem, want sij en sullen v ghetuyghenis van my niet ontfanghen,

19

Ende ic heb gheseyt. ⁺Heere sij weten wel, dat ick was sluytende inden kerker, ende slaende in alle Sinagogen die ghene die in v gheloofden,

+ E

20

ende doen ghestort worde tbloet van Stephanus uwen ghetuyghe, soo stont ick daer by, ende ick consenteerdet, ende ick bewaerde die cleederen der gheender die hem doodden,

21

Ende hi heeft tot my gheseyt. Gaet henen, want ick sal v tot die Heydenen verre senden,

22

Ende sij hoorden hem tot dat woort toe, ende sij hebben hen stemmen opghehauen segghende. Doet wech vander eerden alsulcken, want ten is niet behoorlijck dat hy leue,

23

Ende doen sij riepen, ende hen cleederen afwierpen ende ghestubbe in die locht wierpen,

24

soo heeft die capiteyn gheboden datmen hem leyden soude inden legher, ende met gheesselen slaen, ⁺ende hem pijnighen, op dat hi weten soude om wat sake datse hem alsoo aenriepen,

+ F

25

Ende doen sij hem met banden ghebonden hadden, soo seyt Paulus totten hondersten man by hem staende, Eest v gheorlooft eenen Roomschen mensch die niet verdoemt en is te gheesselen?

26

Het welc als die honderste man ghehoort hadde, soo is hy aenden ouercapiteyn vander benden ghegaen, ende heeft hem ghebootscapt seggende. Wat suldy doen? want dese mensch is een borgher van Roomen,

27

Ende die ouercapiteyn tot hem comende heeft hem gheseyt. Segt my, sijdi een Romeyn? Ende hy heeft gheseydt. Ia ick,

28

Ende die ouercapiteyn heeft gheantwoort. Ic heb om een groote somme ghelts deser stadt borgherscap vercreghen, Ende Paulus seyde, ⁺Maer ick bent gheboren,

+ G

29

Ende ter stont sijnse van hem ghegaen die hem ghepijnt souden hebben, Ende die ouercapiteyn heeft oock ghevreest, nae dat hy vernomen hadde dat hy een borgher van roome was, ende dat hy hem ghebonden hadde,

30

Maer des anderen daechs willende neerstelijcker weten om wat sake dat hy vanden Ioden besculdicht worde, heeft hy hem ontbonden, ende heeft gheboden dat die priesters tsamen comen souden ende alle den raet, ende Paulum voorts brenghende heeft hi hem ghestelt tusschen henlieden.