Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde alst ghesciet was dat wij te scepe voeren, van hen vertrocken sijnde, soo sijn wij met eenen rechten loop ghecomen te Choen, ende sdaechs daer nae te Rhoden, ende van daer te Pataram,

+ A

2

Ende doen wij gheuonden hadden een scip oueruarende tot in Phenicen, so hebben wij daer inclimmende gheuaren,

3

Maer doen wi begonsten ghesien te worden van Cypren, verlatende dat ter slincker hant sijn wij gheuaren in Syrien ende ghecomen tot Tyrum, want daer soude het scip ontladen,

4

Ende doen wij daer discipelen gheuonden hadden, soo sijn wij daer ghebleuen seuen daghen, die welcke seyden Paulo door den gheest, dat hy niet optrecken en soude in Ierusalem,

5

Ende als die daghen ouerleden waren, soo reysden wij ende ghinghen voorts, ende sij alle gheleydden ons met hen huysvrouwen ende kinderen tot buyten die stadt, ende met gheboochde knien hebben wij opden oeuer ghebeden,

6

Ende als wij malcanderen te Gode beuolen hadden, soo sijn wij int scip gheclommen, ⁺ende sij sijn wederom ghegaen tot hen wooninghen,

+ B

7

Maer wij doen die scipuaert voleyndt was, sijn wij van Tyro nederwaerts ghegaen tot Ptolomaiden, Ende als wij die broeders ghegroet hadden, soo sijn wij eenen dach bi hen ghebleuen,

8

Maer tsanderdaechs ghereyst sijnde, sijn wij ghecomen te Cesarien, Ende gaende int huys van Philippus den euangeliste, die een vanden seuenen was sijn wij by hem ghebleuen,

9

Ende dese hadde vier dochteren maechden propheterende,

10

Ende doen wij vertoefden een deel daghen, soo is daer ouerghecomen van Iudeen een propheet Agabus ghenoemt,

11

Doen dese tot ons ghecomen was

[p. *848]

soo heeft hy Paulus riem ghenomen ende bindende sijns selfs handen ende voeten heeft hy gheseyt. Dit seyt die heylighe gheest, Den man (wiens riem dit is) sullen die Ioden in Ierusalem alsoo binden, ende leueren hem in die handen der Heydenen,

12

Dwelck als wij ghehoort hadden soo baden wij, ende die van dier plaetsen waren, dat hy niet opwaerts en ghinghe te Ierusalem,

13

Doen heeft Paulus gheantwoort, ende gheseyt. ⁺Wat doet ghy weenende ende mijn herte bedruckende? Want ick ben bereet niet alleen ghebonden te worden maer oock te steruen in Ierusalem om den naem des Heeren Iesu,

+ C

14

Ende doen wij hem dat niet en consten ontgheuen soo hebben wij gherust segghende. Den wille des Heeren moet ghescieden,

15

Ende nae dese daghen bereydt sijnde, sijn wij opwaerts ghereyst in Ierusalem,

16

Ende daer sijn sommighe vanden discipelen wt Cesarien met ons ghecomen, brenghende met hen gheleydt eenen (by den welcken wij herberghen souden) Iasonem van Cypren, eenen ouden discipele,

17

Ende doen wij te Ierusalem ghecomen waren soo hebben ons die broeders gheerne ontfanghen,

18

Ende sdaechs daer nae soo ghinck Paulus met ons tot Iacobum, ende alle die ouders sijn daer vergadert,

19

Die welcke als hy ghegroet hadde, ⁺soo vertelde hy van stuck te stucke wat Godt al ghedaen hadde onder die Heydenen door sijnen dienst,

+ D

20

Ende doen sijt ghehoort hadden soo loofden sij grootelijck den Heere ende sij hebben hem gheseyt. Broeder ghy siet wel hoe veel duysenden datter ghelooft hebben vanden Ioden ende die sijn allegader neerstighe onderhouders der wet,

21

Maer sij hebben ghehoort van v, dat ghy leert een afsceydinghe van Moyses, allen den Ioden die onder die heydenen sijn, segghende dat sij hen kinderen niet en moeten besnijden, nocht ooc wandelen nae die ghewoonte,

22

Daerom wat eest? Die menichte moet emmers vergaderen, want sij sullen hooren dat ghy ouerghecomen sijt,

23

Hierom doet dit dat wi v segghen? Wij hebben vier mannen hebbende een ghelofte op hen

24

dese met v genomen hebbende, heylicht v met henlieden, ⁺ende becostighet dat sij hen hoofden scheren, ende sij sullen alle weten dat het tghene dat sij van v ghehoort hebben valsch is, maer dat ghy wandelt ooc seluer onderhoudende die wet,

+ E

25

Maer vanden ghenen die ghelooft hebben vanden Heydenen hebben wij ghescreuen, ordeelende dat sij hen souden onthouden van tghene dat den afgoden gheoffert is, ende van bloede, ende versmachte dieren, ende van oncuyscheyt,

26

Doen is Paulus (de mannen mede ghenomen hebbende, ende ghesuyuert met hen) des anderen daechs inden tempel ghegaen, vercondighende die voleyndinghe van die daghen der suyueringhen, tot dat voor een ieghelijcken van henlieden een offerande gheoffert worde,

27

Maer doen daer seuen daghen verloopen waren, soo hebben die Ioden die van Asien waren (als sij hem in den tempel ghesien hadden) alle tvolck opgheruct, ende sij hebben hen handen aen hem gheslaghen roepende.

28

⁺Ghy Israhelijtsche mannen helpt, dit is die mensch die teghen tvolck, ende die wet, ende dese plaetse alle menschen op alle plaetsen leerende is, Ende daer toe heeft hy oock die Heydenen inden tempel ghebracht ende hy heeft dese heylighe plaetse ontsuyuert

+ F

29

(want sij hadden Trophimum den Ephesiaen in die stadt met hem ghesien, den welcken si meynde dat Paulus ooc inden tempel gheleyt hadde)

30

Ende die gheheel stadt is beroert geweest, ende daer is eenen toeloop des volcs ghesciet, Ende grijpende Paulum trocken sij hem wten tempel, ende ter stont sijn die doeren ghesloten,

31

Ende doen sij hem begheerden te dooden, soo eest den capiteyn ouer duysent mannen vander benden ghebootscapt dat gheheel Ierusalem in werringhe was,

32

Die welcke ter stont met hem nemende die ruyters ende honderste mannen, is afgheloopen tot henlieden die welcke (als sij den capiteyn ghesien hadden ende die ruyters, soo hebben sij opghehouden van Paulum te slaen,

33

Doen heeft die Capiteyn aencomende hem aenghegrepen ende hy gheboodt, datmen binden soude met twee ketenen, ende hy vraechde wie hy was, ende wat hy ghedaen hadde,

34

Ende die een riep dit ende dander dat, in die menichte, Ende doen hy niet sekerlijck en conste verstaen om tsgheruchts wille, ⁺so heeft hy hem doen leyden inden legher,

+ G

35

Ende doen hy ghecomen was aen die trappen, soo eest gheschiet dat hy ghedraghen worde vanden ruyters om tghewelt des volcs,

36

want hem volchde een menichte volcs roepende. Doet hem wech,

37

Ende doen Paulus begonste ingheleydt te worden inden legher, soo seyt hy totten Capiteyn. Mach ick wat spreken tot v? Die welcke heeft gheseyt. Condy griex spreken?

38

En sijdi niet die Egiptenaer, die voor dese daghen den oploop verwect hebt, ende hebt wtgheleyt in die woestijne vier duysent heymelijcke moordenaren?

39

Ende Paulus heeft tot hem gheseyt. Ick ben voorwaer een Ioetsch man van Tharsen in Cilicien, een borgher van een stadt die niet onbekent en is, Maer ick bidde v, laet my spreken totten volcke,

40

Ende als hijt toeghelaten hadde, So heeft Paulus op die trappen staende metter hant een teeken ghegeuen totten volcke, ende alsser een groote stillicheyt ghemaect was, soo heeft hijse aenghesproken in hebreusscher talen segghende.